ਭਾਈ ਤਰਸੇਮ ਸਿੰਘ ਦਾ ਤੁਰ ਜਾਣਾ ਪੰਥ ਤੇ ਪ੍ਰਵਾਰ ਲਈ ਨਾ ਪੂਰਾ ਹੋਣ ਵਾਲਾ ਘਾਟਾ : ਜਥੇਦਾਰ

ਨਵੀਂ ਦਿੱਲੀ, 16 ਮਾਰਚ (ਅਮਨਦੀਪ ਸਿੰਘ): ਸਿੱਖ ਪੰਥ ਦੀ ਪ੍ਰਸਿੱਧ ਧਾਰਮਕ ਸ਼ਖ਼ਸੀਅਤ ਤੇ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੀ ਧਰਮ ਪ੍ਰਚਾਰ ਕਮੇਟੀ ਦੇ ਸਾਬਕਾ ਚੇਅਰਮੈਨ ਭਾਈ ਤਰਸੇਮ ਸਿੰਘ (67) ਦੇ ਅੰਤਮ ਅਰਦਾਸ ਸਮਾਗਮ ਵਿਚ ਜ਼ਮੀਨੀ ਪੱਧਰ ’ਤੇ ਧਰਮ ਪ੍ਰਚਾਰ ਲਈ ਉਨ੍ਹਾਂ ਦੇ ਕੀਤੇ ਗਏ ਕਾਰਜਾਂ ਨੂੰ ਇਤਿਹਾਸਕ ਤੇ ਮਿਸਾਲੀ ਦਸਿਆ ਗਿਆ। ਅੱਜ ਇਥੋਂ ਦੇ ਗੁਰਦਵਾਰਾ ਗੁਰੂ ਨਾਨਕ ਦਰਬਾਰ (ਕਾਬਲੀ ਬਰਾਦਰੀ), ਮਨੋਹਰ ਨਗਰ, ਨੇੜੇ ਸੀਆਰਪੀਐਫ਼ ਕੈਂਪ ਵਿਖੇ ਹੋਏ ਸਮਾਗਮ ਵਿਚ ਰਾਗੀ ਜੱਥਿਆਂ ਨੇ ਗੁਰਬਾਣੀ ਕੀਰਤਨ ਰਾਹੀਂ ਨਿਹਾਲ ਕੀਤਾ।  ਗੁਰਦਵਾਰਾ ਬੰਗਲਾ ਸਾਹਿਬ ਦੇ ਹੈੱਡ ਗ੍ਰੰਥੀ ਭਾਈ ਰਣਜੀਤ ਸਿੰਘ ਨੇ ਅਰਦਾਸ ਦੀ ਸੇਵਾ ਨਿਭਾਈ। ਸਮਾਗਮ ਵਿਚ ਦੂਰੋਂ ਨੇੜਿਉਂ ਵੱਡੀ ਤਾਦਾਦ ਵਿਚ ਸੰਗਤ ਸ਼ਾਮਲ ਹੋਈ। ਇਸ ਮੌਕੇ ਭਾਈ ਤਰਸੇਮ ਸਿੰਘ ਦੀਆਂ ਪੰਥਕ ਸੇਵਾਵਾਂ ਲਈ ਉਨ੍ਹਾਂ ਦੇ ਸਪੁੱਤਰ ਸ.ਮਨਜੀਤ ਸਿੰਘ ਨੂੰੰ ਸਿਰਪਾਉ ਦੀ ਬਖ਼ਸ਼ਿਸ਼ ਕੀਤੀ ਗਈ। ਮਰਹੂਮ ਦੀ ਜੀਵਨ ਸਾਥਣ ਸਰਦਾਰਨੀ ਨਿਰਮਲਜੀਤ ਕੌਰ, ਧੀਆਂ ਰਜਵਿੰਦਰ ਕੌਰ ਤੇ ਸਿਮਰਜੀਤ ਕੌਰ ਤੇ ਹੋਰ ਸਾਕ ਸਬੰਧੀ ਹਾਜ਼ਰ ਸਨ। ਅਪਣੇ ਸ਼ੋਕ ਸੁਨੇਹੇ ਵਿਚ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੇ ਪਰਵਾਰ ਨਾਲ ਡੂੰਘੀ ਹਮਦਰਦੀ ਦਾ ਪ੍ਰਗਟਾਵਾ ਕਰਦੇ ਹੋਏ ਕਿਹਾ, ‘‘ਭਾਈ ਤਰਸੇਮ ਸਿੰਘ ਉੱਚੇ ਸੁੱਚੇ ਜੀਵਨ ਅਤੇ ਮਿੱਠਬੋਲੜੇ ਸੁੁਭਾਅ ਦੇ ਮਾਲਕ ਸਨ।  ਜਿੰਨਾ ਲੰਮਾ ਸਮਾਂ ਪੰਥ ਦੀ ਸੇਵਾ ਨਿਭਾਈ, ਦਾ ਚਲੇ ਜਾਣਾ ਪੰਥ ਤੇ ਪਰਵਾਰ ਲਈ ਨਾ ਪੂਰਾ ਹੋਣ ਵਾਲਾ ਘਾਟਾ ਹੈ।’’