ਸਿੱਧੂ ਹੱਥ ਪੰਜਾਬ ਕਾਂਗਰਸ ਦਾ ਪੱਲਾ ਫੜਾਉਣ ਨਾਲ ਕਾਂਗਰਸ ਪੰਜਾਬ 'ਚ ਦਮ ਤੋੜ ਦੇਵੇਗੀ

ਕੈਪਟਨ ਅਮਰਿੰਦਰ ਸਿੰਘ ਨੇ ਸੋਨੀਆ ਗਾਂਧੀ ਨੂੰ  ਲਿਖੀ ਚਿੱਠੀ

ਚੰਡੀਗੜ੍ਹ, 16 ਜੁਲਾਈ (ਭੁੱਲਰ): ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਨਵਜੋਤ ਸਿੱਧੂ ਨੂੰ  ਪੰਜਾਬ ਕਾਂਗਰਸ ਪ੍ਰਧਾਨ ਬਣਾਏ ਜਾਣ ਦਾ ਜ਼ੋਰਦਾਰ ਵਿਰੋਧ ਕੀਤਾ ਹੈ | ਅੱਜ ਨਵਜੋਤ ਸਿੱਧੂ ਦੇ ਪਾਰਟੀ ਪ੍ਰਧਾਨ ਸੋਨੀਆ ਗਾਂਧੀ ਨੂੰ  ਮਿਲਣ ਮੌਕੇ ਹੀ ਕੈਪਟਨ ਵਲੋਂ ਹਾਈਕਮਾਨ ਨੂੰ  ਇਕ ਚਿੱਠੀ ਲਿਖ ਕੇ ਸਿੱਧੂ ਦਾ ਵਿਰੋਧ ਕੀਤਾ ਗਿਆ | ਇਹ ਚਿੱਠੀ ਮੁੱਖ ਮੰਤਰੀ ਦੇ ਓ.ਐਸ.ਡੀ. ਨਰਿੰਦਰ ਸਿੰਘ ਭਾਂਬਰੀ ਲੈ ਕੇ ਪੁੱਜੇ ਸਨ | ਇਸ ਤੋਂ ਪਹਿਲਾਂ ਪੰਜਾਬ ਦੇ ਇੰਚਾਰਜ ਹਰੀਸ਼ ਰਾਵਤ ਨੇ ਇਹ ਇਸ਼ਾਰਾ ਦਿਤਾ ਸੀ ਕਿ ਨਵਜੋਤ ਸਿੱਧੂ ਨੂੰ  ਕਾਂਗਰਸ ਪ੍ਰਧਾਨ ਬਣਾਉਣ ਦਾ ਫ਼ੈਸਲਾ ਲੈ ਲਿਆ ਹੈ | ਇਸ ਤੋਂ ਪਹਿਲਾਂ ਸਿੱਧੂ ਨੇ ਵੀ ਜਨਤਕ ਤੌਰ 'ਤੇ ਐਲਾਨ ਕੀਤਾ ਸੀ ਕਿ ਉਹ ਕੈਪਟਨ ਦੇ ਹੇਠਾਂ ਲੱਗ ਕੇ ਕੈਬਨਿਟ ਮਨਿਸਟਰ ਬਣਨ ਨੂੰ  ਤਿਆਰ ਨਹੀਂ | ਹੁਣ ਕੈਪਟਨ ਅਮਰਿੰਦਰ ਸਿੰਘ ਨੇ ਵੀ ਇਹ ਲਿਖਿਆ ਹੈ ਕਿ ਪੰਜਾਬ ਦੇ ਪੁਰਾਣੇ ਕਾਂਗਰਸੀ ਨਵਜੋਤ ਸਿੱਧੂ ਦੇ ਹੇਠਾਂ ਲੱਗ ਕੇ, ਕਾਂਗਰਸ ਵਿਚ ਰਹਿਣ ਲਈ ਤਿਆਰ ਨਹੀਂ | 
ਕਾਂਗਰਸ ਦੇ ਸੂਤਰਾਂ ਅਨੁਸਾਰ ਕਈ ਕਾਂਗਰਸੀ, ਏਨੇ ਨਿਰਾਸ਼ ਹੋ ਗਏ ਹਨ ਕਿ ਉਹ ਸਿੱਧੂ ਨੂੰ  ਪ੍ਰਧਾਨ ਮੰਨਣ ਦੀ ਬਜਾਏ ਕਿਸੇ ਹੋਰ ਪਾਰਟੀ ਵਿਚ ਰਲਣਾ ਪਸੰਦ ਕਰਨਗੇ | ਕੈਪਟਨ ਨੇ ਕਿਹਾ ਕਿ ਨਵਜੋਤ ਸਿੱਧੂ ਦਾ ਕੰਮਕਾਰ ਦਾ ਤਰੀਕਾ ਪਾਰਟੀ ਲਈ ਠੀਕ ਨਹੀਂ ਰਹੇਗਾ | ਪਾਰਟੀ ਵਿਚ ਫੁੱਟ ਪੈ ਜਾਵੇਗੀ | ਸਿੱਧੂ ਨੂੰ  ਪ੍ਰਧਾਨ ਬਣਾਇਆ ਤਾਂ ਪੁਰਾਣੇ ਕਾਂਗਰਸੀ ਨਰਾਜ਼ ਹੋ ਜਾਣਗੇ | ਕਾਂਗਰਸ ਤੇ ਸਰਕਾਰ ਦੋਹਾਂ ਨੂੰ  ਹੀ ਨੁਕਸਾਨ ਹੋਵੇਗਾ | ਹਿੰਦੂ, ਦਲਿਤ ਤੇ ਹੋਰ ਵਰਗ ਵੀ ਨਰਾਜ਼ ਹੋਣਗੇ | ਕੈਪਟਨ ਨੇ ਇਥੋਂ ਤਕ ਕਹਿ ਦਿਤਾ ਕਿ ਸਿੱਧੂ ਪ੍ਰਧਾਨ ਬਣਿਆ ਤਾਂ ਪਾਰਟੀ ਆਉਂਦੀਆਂ ਚੋਣਾਂ ਵਿਚ ਸੱਤਾ ਤੋਂ ਬਾਹਰ ਵੀ ਹੋ ਜਾਵੇਗੀ | ਕੈਪਟਨ ਨੇ ਸਿੱਧੂ ਨੂੰ  ਪ੍ਰਧਾਨਗੀ ਸੌਂਪੇ ਜਾਣ ਦੀਆਂ ਖ਼ਬਰਾਂ 'ਤੇ ਸਖ਼ਤ ਨਰਾਜ਼ਗੀ ਪ੍ਰਗਟ ਕਰਦੇ ਹੋਏ ਕਿਹਾ ਕਿ ਅਗਰ ਸਿੱਧੂ ਨੂੰ  ਪ੍ਰਧਾਨ ਬਣਾਇਆ ਤਾਂ ਪਾਰਟੀ ਨੂੰ  ਹੋਣ ਵਾਲੇ ਨੁਕਸਾਨ ਦੀ ਜ਼ਿੰਮੇਵਾਰੀ ਵੀ ਹਾਈਕਮਾਨ ਦੀ ਹੋਵੇਗੀ |