ਮੁਕੇਰੀਆਂ ਦੇ ਹਰਸਾ ਮਾਨਸਰ ਦੀ ਧੀ ਨੇ ਰਚਿਆ ਇਤਿਹਾਸ, ਇੰਡੀਅਨ ਨੇਵੀ ਵਿਚ ਬਣੀ ਸਬ-ਲੈਫ਼ਟੀਨੈਂਟ

ਮੁਕੇਰੀਆਂ, 16 ਨਵੰਬਰ (ਪਪ): ਉਪਮੰਡਲ ਮੁਕੇਰੀਆਂ ਦੇ ਕਸਬਾ ਹਰਸਾ ਮਾਨਸਰ ਦੀ ਜੰਮਪਲ ਕੋਮਲ ਨੇ ਇੰਡੀਅਨ ਨੇਵੀ ਵਿਚ ਸਬ-ਲੈਫ਼ਟੀਨੈਂਟ ਬਣਨ ਦਾ ਮਾਣ ਹਾਸਲ ਕਰ ਕੇ ਜਿੱਥੇ ਮਾਪਿਆਂ ਦਾ ਨਾਮ ਰੌਸ਼ਨ ਕੀਤਾ ਹੈ, ਉੱਥੇ ਹੀ ਮੁਕੇਰੀਆਂ ਹਲਕੇ ਦਾ ਨਾਂ ਵੀ ਉੱਚਾ ਕੀਤਾ ਹੈ। ਗੁਰੂ ਨਾਨਕ ਇੰਜੀਨੀਅਰਿੰਗ ਕਾਲਜ ਲੁਧਿਆਣਾ ਤੋਂ ਬੀਟੈਕ ਦੀ ਡਿਗਰੀ ਹਾਸਲ ਕਰਨ ਵਾਲੀ ਕੋਮਲ ਨੇ ਭਾਰਤੀ ਜਲ ਸੈਨਾ ਵਿਚ ਤਕਨੀਕੀ ਐਂਟਰੀ ਅਧੀਨ ਰਜਿਸਟ੍ਰੇਸ਼ਨ ਕਰਵਾਈ ਸੀ। ਇਸ ਮਗਰੋਂ ਲਿਖਤੀ, ਸਰੀਰਕ ਪ੍ਰੀਖਿਆ ਤੇ ਹੋਰ ਚੋਣ ਪੜਾਵਾਂ ਵਿਚੋਂ ਗੁਜ਼ਰਨ ਉਪਰੰਤ ਛੇ ਮਹੀਨੇ ਦੀ ਟ੍ਰੇਨਿੰਗ ਕੇਰਲ ਦੇ ਕਨੂਰ ਜ਼ਿਲ੍ਹੇ ਵਿਚ ਸਥਿਤ ਏਜੀਮਾਲਾ ਨਵਲ ਅਕਾਦਮੀ ਤੋਂ ਹਾਸਲ ਕੀਤੀ ਤੇ ਉਸ ਨੂੰ ਐਨਏਆਈ ਵਜੋਂ ਸਬ-ਲੈਫ਼ਟੀਨੈਂਟ ਦੇ ਅਹੁਦੇ ਲਈ ਚੁਣਿਆ ਗਿਆ। ਕੋਮਲ ਦੀ ਪਹਿਲੀ ਪੋਸਟਿੰਗ ਮੁਬੰਈ ਵਿਖੇ ਕੀਤੀ ਗਈ ਹੈ।
  ਖ਼ੁਸ਼ੀ ਵਿਚ ਖੀਵੇ ਹੋਏ ਪਿਤਾ ਠਾਕੁਰ ਅਵਤਾਰ ਸਿੰਘ ਅਤੇ ਮਾਤਾ ਪਰਵੀਨ ਕੁਮਾਰੀ ਨੇ ਪ੍ਰਮਾਤਮਾ ਦਾ ਸ਼ੁਕਰੀਆ ਅਦਾ ਕਰਦੇ ਹੋਏ ਕੋਮਲ ਦੀ ਮਿਹਨਤ ਅਤੇ ਲਗਨ ਨੂੰ ਹੀ ਉਸ ਦੀ ਸਫ਼ਲਤਾ ਦਾ ਰਾਜ ਦਸਿਆ। ਕੋਮਲ ਦੇ ਪਿਤਾ ਠਾਕੁਰ ਅਵਤਾਰ ਸਿੰਘ ਬੀਐਸਐਫ਼ ਵਿਚੋਂ ਹੈੱਡ ਕਾਂਸਟੇਬਲ ਦੇ ਅਹੁਦੇ ਤੋਂ ਸੇਵਾ ਮੁਕਤ ਹੋਏ ਹਨ ਜਦਕਿ ਮਾਤਾ ਗ੍ਰਹਿਣੀ ਹੈ। ਮਾਤਾ-ਪਿਤਾ ਦੇ ਦਸਣ ਮੁਤਾਬਕ ਉਨ੍ਹਾਂ ਬੱਚਿਆਂ ਦੀ ਸਿਖਿਆ ਨਾਲ ਕਦੇ ਵੀ ਸਮਝੌਤਾ ਨਹੀਂ ਕੀਤਾ ਤੇ ਹਮੇਸ਼ਾ ਚੰਗੀ ਸਿਖਿਆ ਹਾਸਲ ਕਰਨ ਲਈ ਪ੍ਰੇਰਿਤ ਕੀਤਾ। ਲੜਕਾ-ਲੜਕੀ ਦੇ ਫ਼ਰਕ ਨੂੰ ਨਕਾਰਦੇ ਹੋਏ ਉਨ੍ਹਾਂ ਬੇਟੀ ਨੂੰ ਵੀ ਬਰਾਬਰ ਦੇ ਮੌਕਿਆਂ ਲਈ ਉਤਸ਼ਾਹਤ ਕੀਤਾ। ਉਨ੍ਹਾਂ ਦਸਿਆ ਕਿ ਕੋਮਲ ਦਾ ਭਰਾ ਵਿਸ਼ਾਲ ਸਿੰਘ ਵੀ ਸਬ-ਲੈਫਟੀਨੈਂਟ ਵਜੋਂ ਚੁਣਿਆ ਜਾ ਚੁੱਕਾ ਹੈ ਤੇ ਅੱਜ ਕਲ ਨਵਲ ਅਕਾਦਮੀ ਵਿਖੇ ਟ੍ਰੇਨਿੰਗ ਹਾਸਲ ਕਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਅਪਣੇ ਬੱਚਿਆਂ ਉਤੇ ਮਾਣ ਹੈ, ਜਿਨ੍ਹਾਂ ਨੇ ਇਲਾਕੇ ਦਾ ਨਾਂ ਰੌਸ਼ਨ ਕੀਤਾ ਹੈ।

ਫ਼ੋਟੋ : ਮੁਕੇਰੀਆਂ--ਨੇਵੀ