ਮਿਹਨਤ ਕਰ ਕੇ ਹੀ ਅਸੀਂ ਆਪਣਾ ਮੁਕਾਮ ਹਾਸਲ ਕਰ ਸਕਦੇ ਹਾਂ : ਮਹਿਕਦੀਪ ਸਿੰਘ
ਜ਼ਿਲ੍ਹਾ ਮਾਨਸਾ ਦਾ ਨੌਜਵਾਨ ਮਹਿਕਦੀਪ ਸਿੰਘ ਸਫ਼ਲਤਾ ਦੀ ਨਵੀਂ ਮਿਸਾਲ ਬਣਿਆ ਹੈ। ਮਾਨਸਾ ਦੇ ਪਿੰਡ ਨੰਗਲ ਕਲਾਂ ਦਾ ਇਹ ਨੌਜਵਾਨ ਭਾਰਤੀ ਹਵਾਈ ਫ਼ੌਜ ’ਚ ਫ਼ਲਾਇੰਗ ਅਫ਼ਸਰ ਬਣਿਆ ਹੈ।
ਇਸ ਅਹੁਦੇ ਤਕ ਪਹੁੰਚਣ ਲਈ ਕੀਤੀ ਮਿਹਨਤ ਬਾਰੇ ਰੋਜ਼ਾਨਾ ਸਪੋਕਸਮੈਨ ਟੀ.ਵੀ. ਨਾਲ ਗੱਲਬਾਤ ਕਰਦਿਆਂ ਮਹਿਕਦੀਪ ਸਿੰਘ ਨੇ ਦਸਿਆ ਕਿ ਉਸ ਨੇ ਫ਼ਲਾਇੰਗ ਅਫ਼ਸਰ ਬਣਨ ਲਈ ਚਾਰ ਸਾਲਾਂ ਤਕ ਸਿਖਲਾਈ ਪ੍ਰਾਪਤ ਕੀਤੀ। ਉਸ ਨੇ ਕਿਹਾ, ‘‘ਮੈਂ ਵਿਆਹ, ਪਾਰਟੀ ਜਾਂ ਹੋਰ ਕਈ ਅਜਿਹੇ ਪਲਾਂ ਬਹੁਤ ਪ੍ਰੋਗਰਾਮਾਂ ਦਾ ਤਿਆਗ ਕਰ ਕੇ ਸਿਰਫ਼ ਆਪਣੀ ਮਿਹਨਤ ਵਲ ਧਿਆਨ ਦਿਤਾ ਜਿਸ ਕਾਰਨ ਮੈਂ ਅੱਜ ਭਾਰਤੀ ਹਵਾਈ ਫ਼ੌਜ ’ਚ ਫ਼ਲਾਇੰਗ ਅਫ਼ਸਰ ਬਣ ਸਕਿਆ। ਮੈਨੂੰ ਫ਼ਲਾਇੰਗ ਅਫ਼ਸਰ ਬਣ ਕੇ ਬਹੁਤ ਖ਼ੁਸ਼ੀ ਮਹਿਸੁਸ ਹੋ ਰਹੀ ਹੈ।’’
ਫ਼ਲਾਇੰਗ ਅਫ਼ਸਰ ਬਣ ਕੇ ਜਦੋਂ ਮਹਿਕਦੀਪ ਅਪਣੇ ਪਿੰਡ ਪਹੁੰਚਿਆ ਤਾਂ ਉਸ ਦਾ ਸਾਰੇ ਪਿੰਡ ਵਾਸੀਆਂ ਨੇ ਨਿੱਘਾ ਸਵਾਗਤ ਕੀਤਾ। ਸਵਾਗਤ ਦੌਰਾਨ ਉਸ ਦੇ ਮਾਤਾ-ਪਿਤਾ ਬਹੁਤ ਭਾਵੁਕ ਹੋ ਰਹੇ ਸੀ ਕਿ ਸਾਡਾ ਬੱਚਾ ਇਸ ਮੁਕਾਮ ’ਤੇ ਪਹੁੰਚਿਆ ਹੈ। ਸਵਾਗਤ ਲਈ ਉਸ ਨੇ ਸਾਡੇ ਪਿੰਡ ਵਾਸੀਆਂ ਦਾ ਧਨਵਾਦ ਕੀਤਾ।
ਮਹਿਕਦੀਪ ਸਿੰਘ ਦੇ ਪਿਤਾ ਜੀ ਨੇ ਦਸਿਆ ਕਿ ਮਹਿਕਦੀਪ ਸਿੰਘ ਦੀ ਪ੍ਰਾਪਤੀ ਦੇਸ਼ ਤੇ ਪਰਵਾਰ ਲਈ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਕਿਹਾ, ‘‘ਜਦੋਂ ਕੋਈ ਬੱਚਾ ਕਿਸੇ ਮੁਕਾਮ ਤੱਕ ਪਹੁੰਚਦਾ ਹੈ ਤਾਂ ਮਾਪਿਆਂ ਲਈ ਮਾਣ ਵਾਲੀ ਗੱਲ ਹੋ ਜਾਂਦੀ ਹੈ। ਮਹਿਕਦੀਪ ਸਿੰਘ ਸਾਡਾ ਤਾਂ ਬੇਟਾ ਹੈ ਹੀ ਪਰ ਹੁਣ ਇਹ ਦੇਸ਼ ਦਾ ਵੀ ਬੇਟਾ ਹੈ। ਮਹਿਕਦੀਪ ਸਿੰਘ ਦਾ ਬਹੁਤ ਚੰਗਾ ਸੁਭਾਅ ਹੈ ਉਹ ਸਾਰਿਆਂ ਨਾਲ ਮਿਲਜੁਲ ਕੇ ਰਹਿੰਦਾ ਹੈ।’’
ਮਹਿਕਦੀਪ ਸਿੰਘ ਦੇ ਮਾਤਾ ਜੀ ਨੇ ਵੀ ਦਸਿਆ ਕਿ ਉਨ੍ਹਾਂ ਨੂੰ ਬਹੁਤ ਖ਼ੁਸ਼ੀ ਹੋ ਰਹੀ ਕਿ ਸਾਡਾ ਬੱਚਾ ਫ਼ਲਾਇੰਗ ਅਫ਼ਸਰ ਬਣਿਆ ਹੈ। ਖ਼ੁਸ਼ੀ ’ਚ ਭਾਵੁਕ ਹੁੰਦੇ ਹੋਏ ਉਨ੍ਹਾਂ ਕਿਹਾ, ‘‘ਅਸੀਂ ਪਰਮਾਤਮਾ ਦਾ ਸ਼ੁਕਰ ਕਰਦੇ ਹਾਂ ਕਿ ਵਾਹਿਗੁਰੂ ਜੀ ਨੇ ਸਾਡੇ ਪਰਵਾਰ ’ਤੇ ਮਿਹਰ ਕੀਤੀ ਤਾਂ ਹੀ ਸਾਡਾ ਬੱਚਾ ਇਹ ਮੁਕਾਮ ਹਾਸਲ ਕਰ ਸਕਿਆ।’’
ਉਨ੍ਹਾਂ ਦਸਿਆ ਕਿ ਮਹਿਕਦੀਪ ਸ਼ੁਰੂ ਤੋਂ ਹੀ ਪੜ੍ਹਨ ਤੇ ਖੇਡਣ ਵਿਚ ਰੁਚੀ ਰੱਖਦਾ ਸੀ ਤੇ ਸਾਰੇ ਪਰਵਾਰ ਨਾਲ ਮਿਲ ਜੁਲ ਕੇ ਰਹਿੰਦਾ ਹੈ। ਉਨ੍ਹਾਂ ਕਿ ਸਾਡੇ ਬੱਚੇ ਵਰਗਾ ਆਗਿਆਕਾਰੀ ਬੱਚਾ ਪਰਮਾਤਮਾ ਸਾਰਿਆਂ ਨੂੰ ਦੇਵੇ। ਉਨ੍ਹਾਂ ਕਿਹਾ ਜਿਹੜੇ ਸਾਡੇ ਸੁਪਨੇ ਰਹਿ ਗਏ ਉਹ ਸਾਡਾ ਬੱਚਾ ਪੁਰੇ ਕਰੇ।
ਮਹਿਕਦੀਪ ਨੇ ਅੱਗੇ ਗੱਲਬਾਤ ਕਰਦੇ ਹੋਏ ਦਸਿਆ ਕਿ ਕਈ ਨੌਜਵਾਨ ਆਪਣਾ ਮੁਕਾਮ ਹਾਸਲ ਕਰਨ ਲਈ ਇਕ ਜਾਂ ਦੋ ਵਾਰ ਕੋਸ਼ਿਸ਼ ਕਰਦੇ ਹਨ ਪਰ ਜੇ ਉਹ ਆਪਣਾ ਮੁਕਾਮ ਹਾਸਲ ਨਹੀਂ ਕਰ ਪਾਉਂਦੇ ਤਾਂ ਉਹ ਕਿਸੇ ਹੋਰ ਖੇਤਰ ’ਚ ਚਲੇ ਜਾਂਦੇ ਹਨ। ਉਸ ਨੇ ਦਸਿਆ, ‘‘ਸਾਨੂੰ ਆਪਣਾ ਮੁਕਾਮ ਹਾਸਲ ਕਰਨ ਲਈ ਬਾਰ ਬਾਰ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ ਹੌਂਸਲਾ ਨਹੀਂ ਛੱਡਣਾ ਚਾਹੀਦਾ, ਜਦੋਂ ਤੱਕ ਅਸੀਂ ਆਪਣਾ ਮੁਕਾਮ ਹਾਸਲ ਨਾ ਕਰ ਲਈਏ। ਉਸ ਨੇ ਦਸਿਆ ਕਿ ਪਹਿਲੀ ਵਾਰ ਮੈਂ ਵੀ ਪਹਿਲੀ ਵਾਰ ਐਸਐਸਬੀ ਦਿਤੀ ਸੀ ਪਰ ਮੈਂ ਉਸ ਵਿਚ ਰਹਿ ਗਿਆ ਸੀ।’’
ਉਸ ਨੇ ਦਸਿਆ ਕਿ ਜਿਹੜੇ ਡਿੱਗ-ਡਿੱਗ ਕੇ ਅੱਗੇ ਵਧਦੇ ਹਨ ਉਹ ਹੀ ਆਪਣਾ ਮੁਕਾਮ ਹਾਸਲ ਕਰਦੇ ਹਨ। ਉਸ ਨੇ ਕਿਹਾ ਕਿ ਸਾਨੂੰ ਕਦੇ ਵੀ ਹਾਰ ਨਹੀਂ ਮਨਣੀ ਚਾਹੀਦੀ ਹਮੇਸ਼ਾ ਅੱਗੇ ਵਧਣ ਲਈ ਟਰਾਈ ਕਰਦੇ ਰਹਿਣਾ ਚਾਹੀਦਾ ਹੈ। ਉਸ ਨੇ ਕਿਹਾ ਜਦੋਂ ਤੱਕ ਅਸੀਂ ਆਪਣਾ ਮੁਕਾਮ ਹਾਸਲ ਨਹੀਂ ਕਰ ਲੈਂਦੇ ਉਦੋਂ ਤੱਕ ਸਾਨੂੂੰ ਕੋਸ਼ਿਸ਼ ਕਰਦੇ ਰਹਿਣਾ ਚਾਹੀਦਾ ਹੈ।
ਮਹਿਕਦੀਪ ਤੋਂ ਦੇਸ਼ ਦੇ ਨੌਜਵਾਨਾਂ ਨੂੰ ਪ੍ਰੇਰਨਾ ਲੈਣੀ ਚਾਹੀਦੀ ਹੈ ਕਿ ਕੋਈ ਮੁਕਾਮ ਹਾਸਲ ਕਰਨ ਲਈ ਸਾਨੂੰ ਬਹੁਤ ਮਿਹਨਤ ਕਰਨੀ ਪੈਂਦੀ ਹੈ, ਨਾ ਕਿ ਇਕ ਦੋਂ ਮੌਕੇ ਖੁਝ ਜਾਣ ’ਤੇ ਹੱਥ ਉਤੇ ਹੱਥ ਰੱਖ ਕੇ ਦਿਲ ਹੋਲਾ ਕਰਕੇ ਅਸੀਂ ਆਪਣੇ ਮੁਕਾਮ ਨੂੰ ਛੱਡ ਕੇ ਬੈਠ ਜਾਈਏ। ਸਾਡੇ ਲਈ ਮਹਿਕਦੀਪ ਸਿੰਘ ਇਕ ਪ੍ਰੇਰਣਾ ਹੈ ਕਿ ਸਾਨੂੰ ਅੱਗੇ ਵਧਣ ਲਈ ਵਾਰ-ਵਾਰ ਮੌਕੇ ਲੱਭਣੇ ਪੈਂਦੇ ਹਨ।
