ਇੰਗਲੈਂਡ ਵਿਚ ਵੀ ਰਹੀ ਵਿਸਾਖੀ ਦੀ ਰੌਣਕ ਸਿੱਖੀ ਬਾਣੇ ਬਣੇ ਰਹੇ ਅੰਗਰੇਜ਼ਾਂ ਲਈ ਖਿੱਚ ਦੇ ਕੇਂਦਰ
ਲੰਡਨ, 17 ਅਪ੍ਰੈਲ : ਵਿਸਾਖੀ, ਜੋ ਸਿੱਖ ਨਵੇਂ ਸਾਲ ਨੂੰ ਦਰਸਾਉਂਦੀ ਹੈ, ਧਾਰਮਕ ਸਮੂਹ ਲਈ ਸਾਲ ਦੀਆਂ ਸੱਭ ਤੋਂ ਮਹੱਤਵਪੂਰਨ ਤਰੀਕਾਂ ਵਿਚੋਂ ਇਕ ਹੈ | ਵਾਢੀ ਦਾ ਤਿਉਹਾਰ ਅਕਸਰ ਦੁਨੀਆਂ ਭਰ ਵਿਚ ਵੱਡੇ ਜਨਤਕ ਸਮਾਗਮਾਂ ਨਾਲ ਮਨਾਇਆ ਜਾਂਦਾ ਹੈ | ਭਾਵੇਂ ਵਿਸਾਖੀ ਦਾ ਦਿਹਾੜਾ ਪੰਜਾਬ ਅੰਦਰ ਬੜੀ ਧੂਮਧਾਮ ਨਾਲ ਮਨਾਇਆ ਜਾਂਦਾ ਹੈ ਪਰ ਹੁਣ ਵਿਦੇਸ਼ਾਂ ਅੰਦਰ ਵੀ ਇਸ ਨੂੰ ਬੜੀ ਸ਼ਰਧਾ ਤੇ ਧੂਮਧਾਮ ਨਾਲ ਮਨਾਇਆ ਜਾਂਦਾ ਹੈ | ਬੀਤੇ ਦਿਨੀਂ ਇੰਗਲੈਂਡ ਤੇ ਨਿਊਜ਼ੀਲੈਂਡ 'ਚ ਵੀ ਵਿਸਾਖੀ ਦੀਆਂ ਰੌਣਕਾਂ ਦੇਖਣ ਨੂੰ ਮਿਲੀਆਂ | ਇਥੇ ਇਹ ਗੱਲ ਖ਼ਾਸ ਰਹੀ ਕਿ ਸਿੱਖੀ ਬਾਣੇ ਵਿਚ ਸਜੇ ਸਿੰਘ ਤੇ ਸਿੰਘਣੀਆਂ ਅੰਗਰੇਜ਼ਾਂ ਲਈ ਖਿੱਚ ਦਾ ਕੇਂਦਰ ਰਹੇ |
ਵਿਸਾਖੀ ਇਕ ਪ੍ਰਮੁੱਖ ਭਾਰਤੀ ਤਿਉਹਾਰ ਹੈ ਜੋ ਪੰਜਾਬੀ ਨਵੇਂ ਸਾਲ ਦੀ ਸ਼ੁਰੂਆਤ ਦੇ ਨਾਲ-ਨਾਲ ਸਿੱਖ ਧਰਮ ਦੀ ਸ਼ੁਰੂਆਤ ਨੂੰ ਇਕ ਵਿਸ਼ਵਾਸ ਵਜੋਂ ਮਨਾਉਂਦਾ ਹੈ | ਇਸ ਦਿਨ ਖ਼ਾਲਸਾ ਪੰਥ ਦੀ ਸਾਜਨਾ ਹੋਣ ਤੋਂ ਬਾਅਦ ਇਹ ਤਿਉਹਾਰ ਧਾਰਮਕ ਬਣ ਗਿਆ ਤੇ ਸਿੱਖੀ ਵਿਚ ਇਸ ਦਿਨ ਦੀ ਮਾਨਤਾ ਹੋਰ ਵੀ ਵਧ ਗਈ | ਇਸ ਦਿਨ ਜਿਥੇ ਨਿਊਜ਼ੀਲੈਂਡ ਤੇ ਆਸਟਰੇਲੀਆ ਵਿਚ ਵਿਸਾਖੀ ਦਾ ਦਿਹਾੜਾ ਪੂਰੇ ਜੋਸ਼ੋ-ਖ਼ਰੋਸ਼ ਨਾਲ ਮਨਾਇਆ ਗਿਆ ਉਥੇ ਹੀ ਕਈ ਹਜ਼ਾਰ ਕਿਲੋਮੀਟਰ ਦੀ ਦੂਰੀ 'ਤੇ ਇੰਗਲੈਂਡ ਦੇ ਬਰਮਿੰਘਮ ਵਿਚ ਵੀ ਵਿਸਾਖੀ ਦੀਆਂ ਰੌਣਕਾਂ ਦੇਖਣ ਨੂੰ ਮਿਲੀਆਂ |
ਇਥੇ ਬਕਾਇਦਾ ਨਗਰ ਕੀਰਤਨ ਸਜਾਇਆ ਗਿਆ, ਨਿਹੰਗ ਸਿੰਘਾਂ ਨੇ ਗਤਕੇ ਦੇ ਜੌਹਰ ਦਿਖਾਏ ਤੇ ਗੁਰੂ ਗ੍ਰੰਥ ਸਾਹਿਬ ਦੇ ਪਾਠਾਂ ਦੇ ਭੋਗ ਪਾਏ ਗਏ | ਉਪਰੰਤ ਗੁਰੂ ਦਾ ਲੰਗਰ ਅਤੁੱਟ ਵਰਤਾਇਆ ਗਿਆ | ਇਸ ਸਮੇਂ ਨਗਰ ਕੀਰਤਨ ਵਿਚ ਪੰਜਾਬੀ ਤੇ ਭਾਰਤੀ ਭਾਈਚਾਰੇ ਦੇ ਲੋਕਾਂ ਤੋਂ ਇਲਾਵਾ ਅੰਗਰੇਜ਼ ਵੀ ਸ਼ਾਮਲ ਹੋਏ ਤੇ ਬਾਅਦ ਵਿਚ ਲੰਗਰ ਪ੍ਰੰਪਰਾ ਬਾਰੇ ਜਾਣ ਕੇ ਅੰਗਰੇਜ਼ ਵੀ ਗਦਗਦ ਹੋ ਉਠੇ | (ਏਜੰਸੀ)
