ਪੀਵੀ ਸਿੰਧੂ ਨੇ ਜਿੱਤਿਆ ਸਿੰਗਾਪੁਰ ਓਪਨ ਦਾ ਖ਼ਿਤਾਬ, ਫ਼ਾਈਨਲ 'ਚ ਚੀਨ ਦੀ ਵਾਂਗ ਜ਼ੀ ਯੀ ਨੂੰ ਹਰਾਇਆ

ਸਿੰਗਾਪੁਰ, 17 ਜੁਲਾਈ : ਭਾਰਤੀ ਬੈਡਮਿੰਟਨ ਸਟਾਰ ਪੀਵੀ ਸਿੰਧੂ ਨੇ ਸਿੰਗਾਪੁਰ ਓਪਨ 2022 ਦੇ ਫ਼ਾਈਨਲ ਵਿਚ ਚੀਨ ਦੀ ਵਾਂਗ ਜ਼ੀ ਯੀ ਨੂੰ  21-9, 11-21, 21-15 ਨਾਲ ਹਰਾ ਕੇ ਇਸ ਸੀਜ਼ਨ ਵਿਚ ਅਪਣਾ ਤੀਜਾ ਖ਼ਿਤਾਬ ਜਿਤਿਆ ਹੈ ਅਤੇ ਸਿੰਗਾਪੁਰ ਓਪਨ ਵਿਚ ਅਪਣਾ ਪਹਿਲਾ ਖ਼ਿਤਾਬ ਜਿੱਤ ਲਿਆ ਹੈ |
ਇਸ ਨਾਲ ਸਿੰਧੂ ਬੈਡਮਿੰਟਨ ਸੁਪਰ 500 ਟੂਰਨਾਮੈਂਟ ਦਾ ਖ਼ਿਤਾਬ ਜਿੱਤਣ 'ਚ ਕਾਮਯਾਬ ਰਹੀ | ਜ਼ਿਕਰਯੋਗ ਹੈ ਕਿ ਇਸ ਤੋਂ ਬਾਅਦ ਸਿੰਧੂ ਹੁਣ ਬਰਮਿੰਘਮ ਵਿਚ ਹੋਣ ਵਾਲੀਆਂ ਰਾਸ਼ਟਰਮੰਡਲ ਖੇਡਾਂ ਵਿਚ ਭਾਰਤ ਦੀ ਨੁਮਾਇੰਦਗੀ ਕਰਨ ਜਾ ਰਹੀ ਹੈ |
ਸਿੰਧੂ ਨੇ ਅਹਿਮ ਪਲਾਂ 'ਤੇ ਅਪਣਾ ਸੰਜਮ ਬਰਕਰਾਰ ਰਖਿਆ ਅਤੇ 22 ਸਾਲਾ ਚੀਨੀ, ਮੌਜੂਦਾ ਏਸ਼ੀਆਈ ਚੈਂਪੀਅਨਸ਼ਿਪ ਚੈਂਪੀਅਨ, ਨੂੰ  ਸਖ਼ਤ ਮੁਕਾਬਲੇ 'ਚ 21-9, 11-21, 21-15 ਨਾਲ ਹਰਾਇਆ |
ਸਿੰਧੂ ਦਾ ਮੌਜੂਦਾ ਸੀਜ਼ਨ ਦਾ ਇਹ ਤੀਜਾ ਖ਼ਿਤਾਬ ਹੈ | ਉਸ ਨੇ ਸਈਦ ਮੋਦੀ ਇੰਟਰਨੈਸ਼ਨਲ ਅਤੇ ਸਵਿਸ ਓਪਨ ਦੇ ਰੂਪ ਵਿਚ ਦੋ ਸੁਪਰ 300 ਟੂਰਨਾਮੈਂਟ ਜਿੱਤੇ |
ਸਿੰਧੂ ਨੇ ਉਲੰਪਿਕ ਵਿਚ ਚਾਂਦੀ ਅਤੇ ਕਾਂਸੀ ਦੇ ਤਗਮੇ ਤੋਂ ਇਲਾਵਾ ਵਿਸ਼ਵ ਚੈਂਪੀਅਨਸ਼ਿਪ ਵਿਚ ਇਕ ਸੋਨ, ਦੋ ਚਾਂਦੀ ਅਤੇ ਦੋ ਕਾਂਸੀ ਦੇ ਤਗਮੇ ਵੀ ਜਿੱਤੇ ਹਨ |
ਇਸ ਤੋਂ ਪਹਿਲਾਂ ਸਿੰਧੂ ਸੈਮੀਫ਼ਾਈਨਲ 'ਚ ਜਾਪਾਨ ਦੀ ਸਾਇਨਾ ਕਾਵਾਕਾਮੀ ਨੂੰ  ਹਰਾ ਕੇ ਫ਼ਾਈਨਲ 'ਚ ਜਗ੍ਹਾ ਬਣਾਉਣ 'ਚ ਕਾਮਯਾਬ ਰਹੀ ਸੀ |
 ਸਿੰਧੂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਸਾਇਨਾ ਨੂੰ  ਸਿਰਫ਼ 32 ਮਿੰਟਾਂ ਵਿਚ 21-15 ਅਤੇ 21-7 ਨਾਲ ਹਰਾ ਕੇ ਫ਼ਾਈਨਲ ਵਿਚ ਥਾਂ ਬਣਾਈ |  (ਏਜੰਸੀ)