ਕਰਨਲ ਅਜੇ ਕੋਠੀਆਲ ਹੋਣਗੇ ਮੁੱਖ ਮੰਤਰੀ ਅਹੁਦੇ ਦਾ ਚਿਹਰਾ : ਕੇਜਰੀਵਾਲ 

ਦੇਹਰਾਦੂਨ, 17 ਅਗੱਸਤ : ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਮੰਗਲਵਾਰ ਨੂੰ  ਉੱਤਰਾਖੰਡ ਫੇਰੀ ਦੌਰਾਨ ਪ੍ਰੈੱਸ ਕਾਨਫ਼ਰੰਸ ਕੀਤੀ | ਇਸ ਦੌਰਾਨ ਉਨ੍ਹਾਂ ਨੇ ਉੱਤਰਾਖੰਡ ਵਿਚ ਵਿਧਾਨ ਸਭਾ ਚੋਣਾਂ 2022 'ਚ 'ਆਪ' ਪਾਰਟੀ ਤੋਂ ਕਰਨਲ ਅਜੇ ਕੋਠੀਆਲ ਨੂੰ  ਮੁੱਖ ਮੰਤਰੀ ਅਹੁਦੇ ਦਾ ਉਮੀਦਵਾਰ ਬਣਾਉਣ ਦਾ ਐਲਾਨ ਕੀਤਾ | 
ਕੇਜਰੀਵਾਲ ਨੇ ਕਿਹਾ ਕਿ ਅਸੀਂ ਦੇਸ਼ ਦੀ ਜਨਤਾ ਤੋਂ ਸੁਝਾਅ ਮੰਗੇ ਹਨ | 'ਆਪ' ਤੋਂ ਮੁੱਖ ਮੰਤਰੀ ਉਮੀਦਵਾਰ ਕਿਸੇ ਨੂੰ  ਬਣਾਉਣਾ ਚਾਹੀਦਾ ਹੈ, ਇਸ 'ਤੇ ਲੋਕਾਂ ਦੇ ਬਿਹਤਰੀਨ ਜਵਾਬ ਆਏ | ਲੋਕਾਂ ਨੇ ਕਿਹਾ ਕਿ ਸਾਨੂੰ ਪਾਰਟੀਆਂ ਨਹੀਂ ਸਗੋਂ ਦੇਸ਼ ਭਗਤ ਫ਼ੌਜੀ ਚਾਹੀਦਾ ਹੈ | ਬਹੁਤ ਵੱਡੇ ਪੱਧਰ 'ਤੇ ਲੋਕਾਂ ਨੇ ਕਿਹਾ ਕਿ ਇਨ੍ਹਾਂ ਪਾਰਟੀਆਂ ਦੇ ਭਰੋਸੇ ਉੱਤਰਾਖੰਡ ਅੱਗੇ ਨਹੀਂ ਵੱਧ ਸਕਦਾ | ਸਾਨੂੰ ਕਰਨਲ ਕੋਠੀਆਲ ਹੀ ਚਾਹੀਦਾ ਹੈ | ਇਹ ਫ਼ੈਸਲਾ 'ਆਪ' ਪਾਰਟੀ ਨੇ ਨਹੀਂ ਸਗੋਂ ਕਿ ਇਥੋਂ ਦੀ ਜਨਤਾ ਨੇ ਲਿਆ ਹੈ | ਕੇਜਰੀਵਾਲ ਨੇ ਕਿਹਾ ਕਿ ਕਰਨਲ ਕੋਠੀਆਲ ਉਹ ਸ਼ਖ਼ਸ ਹਨ, ਜਿਨ੍ਹਾਂ ਨੇ ਅਪਣੀ ਜਾਨ ਦੀ ਬਾਜ਼ੀ ਲਗਾ ਕੇ ਦੇਸ਼ ਦੀ ਰਖਿਆ ਕੀਤੀ | ਜਦੋਂ ਉੱਤਰਾਖੰਡ ਦੇ ਨੇਤਾ ਇਸ ਪ੍ਰਦੇਸ਼ ਨੂੰ  ਲੁੱਟ ਰਹੇ ਸਨ, ਤਾਂ ਇਹ ਸ਼ਖ਼ਸ ਸਰਹੱਦ 'ਤੇ ਦੇਸ਼ ਦੀ ਹਿਫ਼ਾਜ਼ਤ ਵਿਚ ਲੱਗਾ ਸੀ | ਕੁੱਝ ਸਾਲ ਪਹਿਲਾਂ ਕੇਦਾਰਨਾਥ ਆਫ਼ਤ ਆਈ ਸੀ, ਉਦੋਂ ਇਸ ਸ਼ਖ਼ਸ ਨੇ ਅਪਣੀ ਟੀਮ ਨਾਲ ਮਿਲ ਕੇ ਕੇਦਾਰਨਾਥ ਦਾ ਪੁਨਰ ਨਿਰਮਾਣ ਕੀਤਾ ਸੀ, ਹੁਣ ਇਨ੍ਹਾਂ ਨੇ ਉੱਤਰਾਖੰਡ ਦੇ ਨਵ-ਨਿਰਮਾਣ ਦਾ ਬੀੜਾ ਚੁੱਕਿਆ ਹੈ | ਅਸੀਂ ਉੱਤਰਾਖੰਡ ਨੂੰ  ਦੇਵਭੂਮੀ ਕਹਿੰਦੇ ਹਾਂ | ਪੂਰੀ ਦੁਨੀਆ ਤੋਂ ਹਿੰਦੂ ਇਥੇ ਸ਼ਰਧਾ ਨਾਲ ਦਰਸ਼ਨ ਕਰਨ ਆਉਂਦੇ ਹਨ |     (ਏਜੰਸੀ)