ਬੇਨ ਸਟੋਕਸ ਦਾ ਇਕ ਰੋਜ਼ਾ ਕ੍ਰਿਕਟ ਤੋਂ ਸੰਨਿਆਸ ਦਾ ਐਲਾਨ, ਦਖਣੀ ਅਫ਼ਰੀਕਾ ਵਿਰੁਧ ਖੇਡਣਗੇ ਆਖ਼ਰੀ ਮੈਚ

ਨਵੀਂ ਦਿੱਲੀ, 18 ਜੁਲਾਈ : ਇੰਗਲੈਂਡ ਦੀ ਟੈਸਟ ਟੀਮ ਦੇ ਕਪਤਾਨ ਬੇਨ ਸਟੋਕਸ ਨੇ ਇਕ ਹੈਰਾਨ ਕਰਨ ਵਾਲਾ ਫ਼ੈਸਲਾ ਕੀਤਾ ਹੈ। ਇੰਗਲਿਸ਼ ਆਲਰਾਊਂਡਰ ਨੇ ਇਕ ਰੋਜ਼ਾ ਕ੍ਰਿਕਟ ਤੋਂ ਸੰਨਿਆਸ ਦਾ ਐਲਾਨ ਕਰ ਕੇ ਸਾਰਿਆਂ ਨੂੰ ਹੈਰਾਨ ਕਰ ਦਿਤਾ ਹੈ। ਦਖਣੀ ਅਫ਼ਰੀਕਾ ਵਿਰੁਧ ਮੰਗਲਵਾਰ ਨੂੰ ਖੇਡਿਆ ਜਾਣ ਵਾਲਾ ਪਹਿਲਾ ਵਨ-ਡੇ ਉਨ੍ਹਾਂ ਦਾ ਆਖ਼ਰੀ ਵਨ-ਡੇ ਮੁਕਾਬਲਾ ਹੋਵੇਗਾ।
ਸਟੋਕਸ ਨੇ ਐਲਾਨ ਕਰਦੇ ਹੋਏ ਕਿਹਾ, ‘ਇਹ ਫ਼ੈਸਲਾ ਲੈਣਾ ਜਿੰਨਾ ਮੁਸ਼ਕਲ ਸੀ, ਉਸ ਤੱਥ ਤੋਂ ਨਜਿੱਠਣਾ ਓਨਾ ਮੁਸ਼ਕਲ ਨਹੀਂ ਹੈ ਕਿ ਮੈਂ ਅਪਣੇ ਸਾਥੀਆਂ ਨੂੰ ਹੁਣ ਇਸ ਫ਼ਾਰਮੈਟ ’ਚ ਅਪਣਾ 100 ਫ਼ੀ ਸਦੀ ਨਹੀਂ ਦੇ ਸਕਦਾ।’ 31 ਸਾਲ ਦੇ ਸਟਾਰ ਆਲਰਾਊਂਡਰ ਨੇ ਇੰਗਲੈਂਡ ਲਈ 104 ਵਨ-ਡੇ ਮੈਚ ਖੇਡੇ ਹਨ ਤੇ ਇਸ ਦੌਰਾਨ ਉਨ੍ਹਾਂ ਟੀਮ ਦੀ ਜਿੱਤ ’ਚ ਕਈ ਵਾਰ ਅਹਿਮ ਯੋਗਦਾਨ ਦਿਤਾ । ਉਨ੍ਹਾਂ ਨੇ 2019 ’ਚ ਇੰਗਲੈਂਡ ਨੂੰ ਵਨ-ਡੇ ਵਿਸ਼ਵ ਕੱਪ ’ਚ ਜਿੱਤ ਦਿਵਾਉਣ ’ਚ ਅਹਿਮ ਭੂਮਿਕਾ ਨਿਭਾਈ ਸੀ ਤੇ ਲਾਰਡਜ਼ ’ਚ ਖੇਡੇ ਗਏ ਫ਼ਾਈਨਲ ’ਚ ਪਲੇਅਰ ਆਫ਼ ਦੀ ਮੈਚ ਰਹੇ ਸਨ।
 ਸਟੋਕਸ ਨੇ ਉਸ ਮੈਚ ’ਚ ਨਿਊਜ਼ੀਲੈਂਡ ਵਿਰੁਧ 84 ਦੌੜਾਂ ਦੀ ਅਜੇਤੂ ਪਾਰੀ ਖੇਡੀ ਸੀ ਤੇ ਇਕ ਰੋਮਾਂਚਕ ਮੈਚ ’ਚ ਟੀਮ ਨੂੰ ਜਿੱਤ ਦਿਵਾਈ ਸੀ। ਸਟੋਕਸ ਅਪਣਾ ਆਖ਼ਰੀ ਵਨ-ਡੇ ਮੈਚ ਮੰਗਲਵਾਰ ਨੂੰ ਦਖਣੀ ਅਫ਼ਰੀਕਾ ਵਿਰੁਧ ਅਪਣੇ ਘਰੇਲੂ ਮੈਦਾਨ ’ਤੇ ਖੇਡਣਗੇ। 
ਉਨ੍ਹਾਂ ਨੇ 2011 ’ਚ ਆਇਰਲੈਂਡ ਵਿਰੁਧ ਅਪਣਾ ਵਨ-ਡੇ ਡੈਬਿਊ ਕੀਤਾ ਸੀ। ਸਟੋਕਸ ਨੇ ਇਸ ਤੋਂ ਬਾਅਦ ਅਪਣੇ ਵਨ-ਡੇ ਕਰੀਅਰ ’ਚ 2919 ਦੌੜਾਂ ਬਣਾਈਆਂ। ਇਸ ਦੌਰਾਨ ਉਨ੍ਹਾਂ ਦੇ ਬੱਲੇ ਤੋਂ ਤਿੰਨ ਸੈਂਕੜੇ ਤੇ 21 ਅਰਧ ਸੈਂਕੜੇ ਨਿਕਲੇ। (ਏਜੰਸੀ)