ਚੀਨ ਕੋਲ ਸਮਝੌਤਿਆਂ ਦਾ ਉਲੰਘਣ ਕਰਨ ਬਾਰੇ ਕੋਈ ਸਪੱਸ਼ਟੀਕਰਨ ਨਹੀਂ : ਜੈਸ਼ੰਕਰ
ਸਿੰਗਾਪੁਰ, 19 ਨਵੰਬਰ : ਵਿਦੇਸ਼ ਮੰਤਰੀ ਐਸ. ਜੈਸ਼ੰਕਰ ਨੇ ਸ਼ੁਕਰਵਾਰ ਨੂੰ ਕਿਹਾ ਕਿ ਭਾਰਤ ਅਤੇ ਚੀਨ ਅਪਣੇ ਸਬੰਧਾਂ ਲਈ ਬੇਹਦ ਖ਼ਰਾਬ ਦੌਰ ’ਚੋਂ ਲੰਘ ਰਹੇ ਹਨ ਕਿਉਂਕਿ ਬੀਜਿੰਗ ਨੇ ਸਮਝੌਤਿਆਂ ਦਾ ਉਲੰਘਣ ਕਰਦੇ ਹੋਏ ਕੁੱਝ ਅਜਿਹੀਆਂ ਗਤੀਵਿਧੀਆਂ ਕੀਤੀਆਂ ਜਿਨ੍ਹਾਂ ਪਿੱਛੇ ਉਸ ਕੋਲ ਹੁਣ ਤਕ ਭਰੋਸੇਯੋਗ ਸਪੱਸ਼ਟੀਕਰਨ ਨਹੀਂ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਚੀਨ ਦੇ ਆਗੂ ਇਸ ਗੱਲ ਦਾ ਜਵਾਬ ਦੇਣ ਕਿ ਦੁਵੱਲੇ ਸਬੰਧਾਂ ਨੂੰ ਉਹ ਕਿੱਧਰ ਲਿਜਾਣਾ ਚਾਹੁੰਦੇ ਹਨ।
ਇਥੇ ਬਲੁਮਬਰਗ ਨਿਊ ਇਕਨਾਮਿਕ ਫ਼ੋਰਮ ਵਿਚ ਕਰਵਾਈ ਗੋਸ਼ਟੀ ਵਿਚ ਇਕ ਸਵਾਲ ਦੇ ਜਵਾਬ ਵਿਚ ਜੈਸ਼ੰਕਰ ਨੇ ਕਿਹਾ,‘‘ਮੈਨੂੰ ਨਹੀਂ ਲਗਦਾ ਕਿ ਚੀਨ ਨੂੰ ਇਸ ਬਾਰੇ ਕੋਈ ਸ਼ੱਕ ਹੈ ਕਿ ਸਾਡੇ ਸਬੰਧਾਂ ਵਿਚ ਅਸੀਂ ਕਿਸ ਥਾਂ ਖੜੇ ਹਾਂ ਅਤੇ ਕੀ ਗੜਬੜ ਹੈ। ਮੇਰੇ ਹਮਰੁਤਬਾ ਵਾਂਗ ਯੀ ਨਾਲ ਮੇਰੀ ਕਈ ਵਾਰ ਮੁਲਾਕਾਤ ਹੋਈ ਹੈ। ਜਿਵੇਂ ਕਿ ਤੁਸੀਂ ਵੀ ਮਹਿਸੂਸ ਕੀਤਾ ਹੋਵੇਗਾ ਕਿ ਮੈਂ ਬਿਲਕੁਲ ਸਪੱਸ਼ਟ ਗੱਲ ਕਰਦਾ ਹਾਂ ਤੇ ਅੰਤ ਵਿਚ ਇਹ ਸਮਝਿਆ ਜਾ ਸਕਦਾ ਹੈ ਕਿ ਸਪੱਸ਼ਟਤਾ ਦੀ ਕੋਈ ਕਮੀ ਨਹੀਂ ਹੈ। ਜੇਕਰ ਉਹ ਇਸ ਨੂੰ ਸੁਣਨਾ ਚਾਹੁੰਦੇ ਹਨ ਤਾਂ ਮੈਨੂੰ ਪੂਰਾ ਭਰੋਸਾ ਹੈ ਕਿ ਉਨ੍ਹਾਂ ਨੇ ਸੁਣਿਆ ਵੀ ਹੋਵੇਗਾ।’’
ਯਾਦ ਰਹੇ ਕਿ ਭਾਰਤ-ਚੀਨ ਦੀਆਂ ਫ਼ੌਜਾਂ ਵਿਚਾਲੇ ਪੂਰਬੀ ਲੱਦਾਖ ਵਿਚ ਸਰਹੱਦੀ ਖਿੱਚੋਤਾਣ ਦੇ ਹਾਲਾਤ ਬੀਤੇ ਸਾਲ ਪੰਜ ਮਈ ਤੋਂ ਬਣੇ ਹੋਏ ਸਨ। ਪੈਂਗੋਂਗ ਝੀਲ ਨਾਲ ਲਗਦੇ ਇਲਾਕਿਆਂ ਵਿਚ ਦੋਹਾਂ ਦੇਸ਼ਾਂ ਵਿਚਾਲੇ ਹਿੰਸਕ ਸੰਘਰਸ਼ ਵੀ ਹੋਇਆ ਸੀ ਅਤੇ ਦੋਹਾਂ ਦੇਸ਼ਾਂ ਨੇ ਅਪਣੇ ਫ਼ੌਜੀ ਅਤੇ ਹਥਿਆਰ ਉਥੇ ਤਾਇਨਾਤ ਕੀਤੇ ਹੋਏ ਹਨ।
ਜੈਸ਼ੰਕਰ ਨੇ ਕਿਹਾ ਕਿ,‘‘ਇਹ ਸਪੱਸ਼ਟ ਹੈ ਕਿ ਚੀਨ ਅਪਣਾ ਵਿਸਤਾਰ ਕਰ ਰਿਹਾ ਹੈ ਪਰ ਚੀਨ ਦੀ ਰਵਈਆ ਜਿਸ ਤਰੀਕੇ ਨਾਲ ਉਸ ਦਾ ਪ੍ਰਭਾਵ ਵੱਧ ਰਿਹਾ ਹੈ, ਉਹ ਬਹੁਤ ਵਖਰਾ ਹੈ ਅਤੇ ਸਾਡੇ ਸਾਹਮਣੇ ਅਜਿਹੀ ਸਥਿਤੀ ਨਹੀਂ ਹੈ, ਜਿਥੇ ਚੀਨ ਪੱਕੇ ਰੂਪ ਨਾਲ ਅਮਰੀਕਾ ਦਾ ਸਥਾਨ ਲੈ ਸਕੇ। ਚੀਨ ਅਤੇ ਅਮਰੀਕਾ ਬਾਰੇ ਸੋਚਣਾ ਸੁਭਾਵਕ ਹੈ।’’ (ਪੀਟੀਆਈ)