ਡੇਰਾਬੱਸੀ ’ਚ ਬਰਡ ਫ਼ਲੂ ਦੇ ਕੇਸਾਂ ਦੀ ਪੁਸ਼ਟੀ ਹੋਈ: ਗਿਰੀਸ਼ ਦਿਆਲਨ
ਡੇਰਾਬੱਸੀ (ਗੁਰਜੀਤ ਸਿੰਘ ਈਸਾਪੁਰ) : ਪੰਛੀਆਂ ਦੀ ਮੌਤ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਭੇਜੇ ਗਏ ਟਿਸ਼ੂ ਦੇ ਨਮੂਨਿਆਂ ਵਿਚ ਨੈਸ਼ਨਲ ਇੰਸਟੀਚਿਊਟ ਆਫ਼ ਹਾਈ ਸਕਿਉਰਿਟੀ ਐਨੀਮਲ ਡੀਸੀਜ਼ (ਐਨ.ਆਈ.ਐਚ.ਐਸ.ਏ.ਡੀ.) ਭੋਪਾਲ ਵਲੋਂ ਵਰਡ ਫ਼ਲੂ ਪਾਏ ਜਾਣ ਦੀ ਪੁਸ਼ਟੀ ਤੋਂ ਬਾਅਦ ਡਿਪਟੀ ਕਮਿਸ਼ਨਰ ਐਸ.ਏ.ਐਸ. ਨਗਰ ਗਿਰੀਸ਼ ਦਿਆਲਨ ਨੇ ਦੱਸਿਆ ਕਿ ਇਸ ਵਾਇਰਸ ਦੇ ਫੈਲਾਅ ਨੂੰ ਰੋਕਣ ਦਾ ਮੁੱਖ ਤਰੀਕਾ ਪ੍ਰਭਾਵਤ ਪੰਛੀਆਂ ਦੀ ਛਾਂਟੀ ਕਰਨਾ ਹੈ। ਪੰਜ ਮੈਂਬਰਾਂ ਵਾਲੀਆਂ 25 ਟੀਮਾਂ ਡੇਰਾਬਾਸੀ ਦੇ ਅਲਫ਼ਾ ਅਤੇ ਰਾਇਲ ਪੋਲਟਰੀ ਫ਼ਾਰਮਾਂ ਵਿਚ ਜਾਨਵਰਾਂ/ ਪੰਛੀਆਂ ਦੀ ਛਾਂਟੀ ਕਰਨ ਦੀ ਸ਼ੁਰੂਆਤ ਹੋਵੇਗੀ। ਇਹਨਾਂ ਪ੍ਰਭਾਵਤ ਖੇਤਰਾਂ ਵਿਚ 50,000 ਤੋਂ ਵੱਧ ਪੰਛੀਆਂ ਦੀ ਮਾਰਨ ਦੀ ਸੰਭਾਵਨਾ ਹੈ।
ਲੋੜੀਂਦੇ ਸੁਰੱਖਿਆ ਉਪਕਰਨਾਂ ਸਮੇਤ ਪੀਪੀਈ ਕਿੱਟਾਂ ਅਤੇ ਫੇਸ ਸ਼ੀਲਡਾਂ ਦੇ ਨਾਲ ਨਾਲ ਜੇਸੀਬੀ ਮਸ਼ੀਨਾਂ ਛਾਂਟੀ ਟੀਮਾਂ ਨੂੰ ਪ੍ਰਦਾਨ ਕੀਤੀਆਂ ਗਈਆਂ ਹਨ ਅਤੇ ਕੁਆਰੰਟੀਨ ਸਬੰਧੀ ਢੁਕਵੇਂ ਪ੍ਰਬੰਧ ਕੀਤੇ ਗਏ ਹਨ।
ਇਸ ਦੌਰਾਨ ਗਿਰੀਸ਼ ਦਿਆਲਾਨ ਨੇ ਦੱਸਿਆ ਕਿ ਇਹਨਾਂ ਖੇਤਰਾਂ ਵਿਚ ਪੋਲਟਰੀ ਪਾਲਣ ਸਬੰਧੀ ਕਿਸੇ ਕਿਸਮ ਦੀ ਵਪਾਰਕ ਗਤੀਵਿਧੀ ’ਤੇ ਨਿਗਾਂਹ ਰੱਖਣ ਲਈ ਪ੍ਰਭਾਵਤ ਖੇਤਰ ਦੇ 10 ਕਿਲੋਮੀਟਰ ਦੇ ਇਲਾਕੇ ਨੂੰ ਕੰਟੇਨਮੈਂਟ ਖੇਤਰ ਬਣਾਇਆ ਗਿਆ ਹੈ। ਜ਼ਿਲ੍ਹੇ ਵਿਚ ਪੰਛੀਆਂ (ਕਾਂ/ ਪ੍ਰਵਾਸੀ ਪੰਛੀ/ ਜੰਗਲੀ ਪੰਛੀਆਂ) ਦੀ ਮੌਤ ’ਤੇ ਨਜ਼ਰ ਰੱਖਣ ਲਈ ਦੋ ਰੈਪਿਡ ਰਿਸਪਾਂਸ ਟੀਮਾਂ (ਆਰਆਰਟੀਜ਼) ਵੀ ਤਾਇਨਾਤ ਕੀਤੀਆਂ ਗਈਆਂ ਹਨ। ਨਿਗਰਾਨੀ ਜਾਰੀ ਹੈ ਅਤੇ ਸੈਂਪਲਿੰਗ ਵਿੱਚ ਵਾਧਾ ਕੀਤਾ ਗਿਆ ਹੈ।
Bird Flu
ਮੁੱਢਲੀਆਂ ਰਿਪੋਰਟਾਂ ਅਨੁਸਾਰ ਏਵੀਅਨ ਇਨਫਲੂਐਂਜ਼ਾ ਵਿਚ ਸ਼ਾਮਲ ਵਾਇਰਸ ਜਾਨਵਰਾਂ ਤੋਂ ਮਨੁੱਖਾਂ ਵਿਚ ਫੈਲ ਸਕਦਾ ਹੈ। ਇਸ ਲਈ ਮਨੁੱਖਾਂ ਵਿੱਚ ਇਸ ਦੀ ਲਾਗ ਦੇ ਲੱਛਣਾਂ ਦਾ ਪਤਾ ਲਗਾਉਣ ਲਈ ਪ੍ਰਭਾਵਿਤ ਪੋਲਟਰੀ ਫ਼ਾਰਮਾਂ ਵਿਚ ਪੰਛੀਆਂ ਨੂੰ ਸੰਭਾਲਣ ਵਾਲੇ ਵਿਅਕਤੀਆਂ ਦੀ ਡਾਕਟਰਾਂ ਵਲੋਂ ਜਾਂਚ ਕੀਤੀ ਜਾਵੇਗੀ।
