ਤਿੰਨ ਸਾਲ ਪਹਿਲਾਂ ਇਰਾਕ ਵਿਚ 40 ਭਾਰਤੀਆਂ ਨੂੰ ਅਗ਼ਵਾ ਕਰ ਲਿਆ ਸੀ ਜਿਨ੍ਹਾਂ ਵਿਚੋਂ 39 ਭਾਰਤੀਆਂ ਨੂੰ ਆਈ.ਐਸ.ਆਈ.ਐਸ. ਦੇ ਅਤਿਵਾਦੀਆਂ ਨੇ ਮਾਰ ਦਿਤਾ ਸੀ।
ਗੁਰਦਾਸਪੁਰ (ਹਰਜੀਤ ਸਿੰਘ ਆਲਮ): ਤਿੰਨ ਸਾਲ ਪਹਿਲਾਂ ਇਰਾਕ ਵਿਚ 40 ਭਾਰਤੀਆਂ ਨੂੰ ਅਗ਼ਵਾ ਕਰ ਲਿਆ ਸੀ ਜਿਨ੍ਹਾਂ ਵਿਚੋਂ 39 ਭਾਰਤੀਆਂ ਨੂੰ ਆਈ.ਐਸ.ਆਈ.ਐਸ. ਦੇ ਅਤਿਵਾਦੀਆਂ ਨੇ ਮਾਰ ਦਿਤਾ ਸੀ। ਉਨ੍ਹਾਂ ਵਿਚੋਂ ਇਕ ਭਾਰਤੀ ਮਜ਼ਦੂਰ ਕਿਸੇ ਨਾ ਕਿਸੇ ਤਰੀਕੇ ਨਾਲ ਉਨ੍ਹਾਂ ਦੇ ਸ਼ਿਕੰਜੇ 'ਚੋਂ ਨਿਕਲ ਕੇ ਭੱਜ ਗਿਆ ਸੀ। ਮੰਗਲਵਾਰ ਨੂੰ ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਵੀ ਇਸ ਗੱਲ ਨੂੰ ਸੰਸਦ 'ਚ ਮੰਨ ਚੁਕੇ ਹਨ। ਪਿਛਲੇ ਸਾਲ ਇਕ ਇੰਟਰਵਿਊ 'ਚ ਹਰਜੀਤ ਮਸੀਹ ਨੇ ਦਸਿਆ ਸੀ ਕੇ ਕਿਵੇਂ ਉਹ ਖੌਫ਼ਨਾਕ ਦਰਿੰਦਿਆਂ ਦੇ ਹੱਥੋਂ ਬਚ ਨਿਕਲਿਆ ਸੀ।
11 ਜੂਨ 2014 ਨੂੰ ਅਤਿਵਾਦੀ ਮਜ਼ਦੂਰਾਂ ਨੂੰ ਅਗ਼ਵਾ ਕਰ ਕੇ ਸ਼ਹਿਰ ਦੀ 'ਅਲ ਕੁਦੁਸ' ਬਿਲਡਿੰਗ 'ਚ ਲੈ ਗਏ। ਹਾਲਾਂਕਿ ਬਿਲਡਿੰਗ 'ਤੇ ਹਵਾਈ ਹਮਲਾ ਹੋਣ ਕਾਰਨ ਅਤਿਵਾਦੀਆਂ ਦਾ ਮਜ਼ਦੂਰਾਂ ਨੂੰ ਇਥੇ ਰੱਖਣ ਦੀ ਯੋਜਨਾ ਕਾਮਯਾਬ ਨਹੀਂ ਹੋਈ। 12 ਜੂਨ 2014 ਨੂੰ ਅਤਿਵਾਦੀ ਮਜ਼ਦੂਰਾਂ ਨੂੰ ਅਲ ਮਸੂਰ ਦੇ ਉਦਯੋਗਿਕ ਖੇਤਰ 'ਚ ਲੈ ਗਏ। ਦੋ ਦਿਨ ਬਾਅਦ ਅਤਿਵਾਦੀਆਂ ਨੇ ਭਾਰਤੀਆਂ ਅਤੇ ਬੰਗਲਾਦੇਸ਼ੀਆਂ ਨੂੰ ਅਲੱਗ ਹੋਣ ਨੂੰ ਕਿਹਾ। ਹਰਜੀਤ ਮੁਤਾਬਕ ਉਨ੍ਹਾਂ ਨੇ ਬੰਗਲਾਦੇਸ਼ੀਆਂ ਨੂੰ ਛੱਡ ਦਿਤਾ ਸ਼ਾਇਦ ਉਹ ਮੁਸਲਮਾਨ ਸਨ, ਨਮਾਜ਼ ਪੜ੍ਹਦੇ ਸਨ ਇਸ ਲਈ। ਇਸ ਤੋਂ ਬਾਅਦ 15 ਜੂਨ 2014 ਨੂੰ ਅਤਿਵਾਦੀ ਇਕ ਵੈਨ 'ਚ ਬੰਦ ਕਰ ਕੇ ਸਾਰੇ 40 ਭਾਰਤੀ ਮਜ਼ਦੂਰਾਂ ਨੂੰ ਇਕ ਅਣਜਾਣ ਪਹਾੜੀ 'ਤੇ ਲੈ ਗਏ। ਇਸ ਤੋਂ ਬਾਅਦ ਸਾਨੂੰ ਇਕ ਲਾਈਨ 'ਚ ਖੜੇ ਕਰ ਕੇ ਗੋਡਿਆਂ ਭਾਰ ਬੈਠਣ ਨੂੰ ਕਿਹਾ ਗਿਆ। ਫਿਰ ਇਕ ਦਮ ਗੋਲੀਆਂ ਚੱਲਣ ਦੀ ਆਵਾਜ਼ ਸੁਣਾਈ ਦਿਤੀ। ਕਰੀਬ ਦੋ ਮਿੰਟ ਤਕ ਗੋਲੀਆਂ ਚਲਦੀਆਂ ਰਹੀਆਂ। ਇਕ-ਇਕ ਕਰ ਕੇ ਲੋਕ ਜ਼ਮੀਨ 'ਤੇ ਡਿਗਦੇ ਗਏ। ਇਕ ਗੋਲੀ ਮੇਰੇ ਪੈਰ 'ਤੇ ਵੱਜੀ ਤੇ ਮੈਂ ਡਿੱਗ ਗਿਆ ਪਰ ਮਰਨ ਦਾ ਨਾਟਕ ਕਰਦਾ ਰਿਹਾ। ਅਤਿਵਾਦੀਆਂ ਦੇ ਡਰ ਨਾਲ ਮੈਂ ਕਈ ਘੰਟੇ ਉਥੇ ਹੀ ਪਿਆ ਰਿਹਾ। ਫਿਰ ਕਿਸੇ ਤਰ੍ਹਾਂ ਉਥੋਂ ਭੱਜ ਆਇਆ।