ਸ. ਰਾਣਾ 15 ਤੋਂ 22 ਅਗਸਤ ਤੱਕ ਆਪਣੇ ਨਿਗਮ ਖੇਤਰ ਦੇ ਸਕੂਲਾਂ ਤੇ ਪਾਰਕਾਂ 'ਚ 500 ਬੂਟੇ ਲਗਾਉਣ

ਨਵੀਂ ਦਿੱਲੀ, 18 ਅਗੱਸਤ (ਸੁਖਰਾਜ ਸਿੰਘ): ਦਿੱਲੀ ਗੁਰਦਵਾਰਾ ਕਮੇਟੀ ਮੈਂਬਰ ਤੇ ਰਜਿੰਦਰ ਨਗਰ ਵਿਧਾਨ ਸਭਾ ਦੇ ਵਾਰਡ ਨੰਬਰ 102 ਐਨ ਤੋਂ ਕੌਂਸਲਰ ਪਰਮਜੀਤ ਸਿੰਘ ਰਾਣਾ ਨੇ ਪ੍ਰਦੂਸ਼ਣ ਨੂੰ ਸਿਹਤ ਲਈ ਭਾਰੀ ਨੁਕਸਾਨਦਾਇਕ ਦੱਸਦੇ ਹੋਏ ਸਾਰੇ ਦਿੱਲੀ ਵਾਸੀਆਂ ਨੂੰ ਇਸ ਨਾਲ ਲੜਨ ਲਈ ਹਰਿਆਵਲ ਪ੍ਰੇਮੀ ਬਣਨ ਅਤੇ ਅਪਣੇ ਆਂਢ-ਗੁਆਂਢ ਦੇ ਖੇਤਰਾਂ 'ਚ ਮੌਜ਼ੂਦ ਦਰਖੱਤਾਂ-ਬੂਟਿਆਂ ਨੂੰ ਬਚਾ ਕੇ ਰੱਖਣ ਅਤੇ ਵੱਧ ਤੋਂ ਵੱਧ ਹੋਰ ਬੂਟੇ ਲਗਾਉਣ ਦਾ ਸੁਨੇਹਾ ਦਿਤਾ ਹੈ। ਸ. ਰਾਣਾ 15 ਤੋਂ 22 ਅਗਸਤ ਤੱਕ ਆਪਣੇ ਨਿਗਮ ਖੇਤਰ ਦੇ ਸਕੂਲਾਂ ਤੇ ਪਾਰਕਾਂ 'ਚ 500 ਬੂਟੇ ਲਗਾਉਣ ਦੀ ਮੁਹਿੰਤ ਤਹਿਤ ਪੂਸਾ ਲੇਨ ਸਥਿਤ ਉਤਰੀ ਦਿੱਲੀ ਨਗਰ ਨਿਗਮ ਪ੍ਰਾਥਮਿਕ ਵਿਦਿਆਲੇ 'ਚ ਬੂਟੇ ਲਗਾਉਣ ਲਈ ਗਏ ਸਨ। ਇਸ ਮੌਕੇ ਉਨ੍ਹਾਂ ਨਾਲ ਸਕੂਲ ਦੀ ਪ੍ਰਿੰਸੀਪਲ ਸ੍ਰੀਮਤੀ ਪੂਨਮ ਅਤੇ ਹੋਰ ਸਕੂਲ ਸਟਾਫ ਵੀ ਮੌਜ਼ੂਦ ਸੀ। ਇਸ ਮੌਕੇ ਪਰਮਜੀਤ ਸਿੰਘ ਰਾਣਾ ਨੇ ਸਕੂਲ 'ਚ ਬੂਟੇ ਲਗਾਉਣ ਤੋਂ ਬਾਅਦ ਸਕੂਲੀ ਵਿਦਿਆਰਥੀਆਂ ਨੂੰ ਹਰਿਆਵਲ ਪ੍ਰਤੀ ਜਾਗਰੂਕ ਹੋਣ ਦਾ ਸੱਦਾ ਦਿਤਾ।
ਉਨ੍ਹਾਂ ਨੇ ਸਕੂਲੀ ਵਿਦਿਆਰਥੀਆਂ ਦਾ ਹੌਂਸਲਾ ਵਧਾਉਂਦੇ ਹੋਏ ਕਿਹਾ ਕਿ ਸਕੂਲ-ਕਾਲਜ ਦੇ ਵਿਦਿਆਰਥੀਆਂ 'ਚ ਇੰਨੀ ਸਮਰੱਥਾ ਹੁੰਦੀ ਹੈ ਕਿ ਉਹ ਇਕ ਵਾਰ ਕਿਸੇ ਗੱਲ ਦਾ ਪ੍ਰਣ ਕਰ ਲੈਣ ਤਾਂ ਉਹ ਉਸ ਨੂੰ ਪੂਰਾ ਕਰਕੇ ਹੀ ਛੱਡਦੇ ਹਨ। ਇਸ ਲਈ ਹਰੇਕ ਵਿਦਿਆਰਥੀ ਨੂੰ ਚਾਹੀਦਾ ਹੈ ਕਿ ਉਹ ਅਪਣੇ ਦੋਸਤਾਂ, ਰਿਸ਼ਤੇਦਾਰਾਂ, ਸਹਿਯੋਗੀਆਂ ਅਤੇ ਇਥੇ ਤਕ ਕਿ ਅਨਜਾਣ ਵਿਅਕਤੀਆਂ ਵਿਚਾਲੇ ਵੀ ਹਰਿਆਵਲ ਨੂੰ ਲੈ ਕੇ ਜਾਗਰੂਕਤਾ ਪੈਦਾ ਕਰਨ ਲਈ ਅੱਗੇ ਆਉਣ। ਇਸ ਮੌਕੇ ਪਰਮਜੀਤ ਸਿੰਘ ਰਾਣਾ ਨੇ ਸਕੂਲ ਦੇ ਕਈ ਹੁਨਰਮੰਦ ਵਿਦਿਆਰਥੀ ਤੇ ਵਿਦਿਆਰਥਣਾਂ ਨੂੰ ਪੁਰਸਕਾਰ ਦੇ ਕੇ ਸਨਮਾਨਤ ਵੀ ਕੀਤਾ।