25 ਸਾਲਾਂ ਬਾਅਦ ਉਪਜਾਊ ਪੰਜਾਬ ਬੰਜਰ ਬਣਨ ਦਾ ਖ਼ਤਰਾ : ਖੇਤੀਬਾੜੀ ਕਮਿਸ਼ਨਰ
ਚੰਡੀਗੜ੍ਹ (ਜੀ.ਸੀ. ਭਾਰਦਵਾਜ) : ਇਸ ਸੀਜ਼ਨ ਲਈ ਝੋਨੇ ਦੀ ਪਨੀਰੀ ਦੀ ਥਾਂ ਸਿੱਧੀ ਚਾਵਲ ਬਿਜਾਈ ਕਰਨ ਵਾਸਤੇ ਵਿਕਾਸ ਕਮਿਸ਼ਨਰ-ਐਡੀਸ਼ਨਲ ਚੀਫ਼ ਸਕੱਤਰ ਅਨਿਰੁਧ ਤਿਵਾੜੀ ਨੇ ਪਿਛਲੇ ਹਫ਼ਤੇ, ਬਿਜਲੀ ਕਾਰਪੋਰੇਸ਼ਨ ਦੇ ਐਮ.ਡੀ. ਵੇਨੂੰ ਨੂੰ ਲਿਖੀ ਚਿੱਠੀ ’ਚ ਮੁੱਖ ਮੰਤਰੀ ਦਾ ਹੁਕਮ ਸੁਣਾਇਆ ਹੈ ਕਿ 25 ਮਈ ਤੋਂ 2 ਜੂਨ ਤਕ ਟਿਊਬਵੈੱਲਾਂ ਲਈ 8 ਘੰਟੇ ਬਿਜਲੀ ਸਪਲਾਈ ਦਿਤੀ ਜਾਵੇ ਤਾਕਿ ਜ਼ਮੀਨ ਦੀ ਰੌਣੀ ਚੰਗੀ ਤਰ੍ਹਾਂ ਸਿੰਜਾਈ ਹੋਵੇ। ਫਿਰ 3 ਜੂਨ ਤੋਂ 1 ਹਫ਼ਤੇ ਲਈ 4 ਘੰਟੇ ਬਿਜਲੀ ਤੇ ਮਗਰੋਂ 10 ਜੂਨ ਤੋਂ ਲਗਾਤਾਰ 8 ਘੰਟੇ ਬਿਜਲੀ ਯਕੀਨੀ ਬਣਾਈ ਜਾਵੇ।
Water
ਇਸ ਸਾਰੇ ਪ੍ਰੋਗਰਾਮ ਦੇ ਵੇਰਵੇ ਸਬੰਧੀ ਰੋਜ਼ਾਨਾ ਸਪੋਕਸਮੈਨ ਨਾਲ ਗੱਲਬਾਤ ਕਰਦੇ ਹੋਏ ਖੇਤੀਬਾੜੀ ਕਮਿਸ਼ਨਰ ਤੇ ਮੌਜੂਦਾ ਮੈਂਬਰ ਸਕੱਤਰ ਕਿਸਾਨ ਕਮਿਸ਼ਨ ਸ. ਬਲਵਿੰਦਰ ਸਿੰਘ ਸਿੱਧੂ ਨੇ ਦਸਿਆ ਕਿ ਲੁਧਿਆਣਾ ਦੀ ਖੇਤੀਬਾੜੀ ਯੂਨੀਵਰਸਟੀ ਦੇ ਮਾਹਰ ਵਿਗਿਆਨੀਆਂ ਵਲੋਂ ਕੀਤੀ ਸਿਫ਼ਾਰਸ਼ ’ਤੇ ਦਿਤੇ ਮਸ਼ਵਰੇ ਮੁਤਾਬਕ ਇਸ ਸਾਲ ਝੋਨੇ ਦੀ ਸਿੱਧੀ ਬਿਜਾਈ 25 ਲੱਖ ਏਕੜ ਤੋਂ ਕੀਤੀ ਜਾਣੀ ਹੈ ਜਿਸ ਤਹਿਤ ਪੀ.ਆਰ. 126 ਤੇ ਪੀ.ਆਰ 128 ਕਿਸਮ ਦੀ ਫ਼ਸਲ ਤੋਂ ਵਾਧੂ ਝਾੜ ਲੈ ਕੇ 15 ਫ਼ੀਸਦੀ ਤਕ ਜ਼ਮੀਨਦੋਜ਼ ਪਾਣੀ ਦੀ ਬੱਚਤ ਵੀ ਕੀਤੀ ਜਾਵੇਗੀ।
paddy
ਖੇਤੀਬਾੜੀ ਕਮਿਸ਼ਨਰ ਨੇ ਦਸਿਆ ਕਿ ਪਿਛਲੇ ਸਾਲ ਸਿੱਧੀ ਬਿਜਾਈ ਕਰਨ ਦੇ ਤਜਰਬੇ ਤੋਂ ਚੰਗੇ ਨਤੀਜੇ ਮਿਲੇ ਸਨ ਅਤੇ ਐਤਕਾਂ ਸਰਕਾਰ ਇਨ੍ਹਾਂ ਹੁਕਮਾਂ ਨੂੰ ਸਖ਼ਤੀ ਨਾਲ ਲਾਗੂ ਕਰ ਕੇ ਪਾਣੀ ਬੱਚਤ, ਲੇਬਰ ਦੀ ਕਮੀ ਨਾਲ ਨਜਿੱਠਣ ਥੋੜੇ ਸਮੇਂ ਦੀ ਫ਼ਸਲ ਤੋਂ ਵਾਧੂ ਝਾੜ ਲੈ ਕੇ ਕਿਸਾਨਾਂ ਦੀ ਮਦਦ ਕਰੇਗੀ। ਸਿੱਧੂ ਨੇ ਦਸਿਆ ਕਿ ਪੰਜਾਬ ਦੇ ਕੁਲ 148 ਬਲਾਕਾਂ ’ਚੋਂ 138 ਬਲਾਕਾਂ ’ਚ ਲੱਖਾਂ ਟਿਊਬਵੈੱਲਾਂ ਦਾ ਹੇਠਲਾ ਪਾਣੀ ਬੇਤਹਾਸ਼ਾ ਵਰਤਣ ਨਾਲ ਸਕੰਟਮਈ ਹਾਲਤ ਪੈਦਾ ਹੋ ਚੁੱਕੀ ਹੈ ਤੇ ਜੇ ਇਹੀ ਰਫ਼ਤਾਰ ਚੱਲੀ ਤਾਂ 2042-45 ਤਕ ਪੰਜਾਬੀ ਦੀ ਜ਼ਮੀਨ ਜੋ 98.5 ਪ੍ਰਤੀਸ਼ਤ ਸਿੰਜਾਈ ਹੇਠ ਹੈ, ਪੂਰਾ ਬੰਜਰ ਹੋ ਜਾਵੇਗੀ।
paddy
ਉਨ੍ਹਾਂ ਕਿਹਾ ਕਿ ਕੇਂਦਰੀ ਜਲ ਕਮਿਸ਼ਨ ਤੇ ਪੰਜਾਬ ਪਾਣੀ ਸਰੋਤ ਮਹਿਕਮੇ ਦੀ 2017 ਰੀਪੋਰਟ ਨੇ ਜ਼ਮੀਨ ਹੇਠਲੇ ਪਾਣੀ ਨੂੰ ਬਚਾਉਣ ਵਾਸਤੇ ਝੋਨੇ ਦੀ ਥਾਂ ਹੋਰ ਫ਼ਸਲਾਂ ਲਾਉਣ, ਤੁਪਕਾ ਤੇ ਫੁਹਾਰਾ ਸਿੰਚਾਈ ਸਿਸਟਮ ਲਗਾਉਣ, ਹੋਰ ਟਿਊਬਵੈੱਲ ਨਾ ਲਗਾਉਣ ਅਤੇ ਮੱਕੀ ਤੇ ਨਰਮਾ ਪੈਦਾ ਕਰਨ ਦੀ ਸਿਫ਼ਾਰਸ਼ ਕੀਤੀ ਹੋਈ ਹੈ। ਭਾਰਤ ਸਰਕਾਰ ਇਨ੍ਹਾਂ ਫ਼ਸਲਾਂ ਵਾਸਤੇ ਨਵੇਂ ਸਿਸਟਮ ਲਗਾਉਣ ਲਈ 35 ਫ਼ੀ ਸਦੀ ਸਬਸਿਡੀ ਦਿੰਦੀ ਹੈ ਜਿਸ ’ਚੋਂ ਅੱਗੇ ਪੰਜਾਬ ਸਰਕਾਰ 59 ਫ਼ੀ ਸਦੀ ਹਿੱਸਾ ਪਾਉਂਦੀ ਹੈ।
Moter
ਜ਼ਿਕਰਯੋਗ ਹੈ ਕਿ ਪੰਜਾਬ ’ਚ ਕੁਲ 14.5 ਲੱਖ ਟਿਊਬਵੈੱਲਾਂ ਨੂੰ ਮੁਫ਼ਤ ਬਿਜਲੀ ਸਪਲਾਈ ਹੈ, ਕੋਈ ਮੀਟਰ ਨਹੀਂ, ਅੰਨ੍ਹੇਵਾਹ ਪਾਣੀ ਕੱਢਿਆ ਜਾ ਰਿਹਾ ਹੈ ਅਤੇ ਸਰਕਾਰ ਇਸ ਬਦਲੇ ਸਬਸਿਡੀ ਲਗਭਗ 12 ਹਜ਼ਾਰ ਕਰੋੜ ਸਾਲਾਨਾ, ਪਟਿਆਲਾ ਸਥਿਤ ਬਿਜਲੀ ਕਾਰਪੋਰੇਸ਼ਨ ਨੂੰ ਅਦਾ ਕਰ ਰਹੀ ਹੈ। 2015-16 ਦੇ ਸਰਵੇਅ ਅਨੁਸਾਰ ਪੰਜਾਬ ਦੀ ਫ਼ਸਲੀ ਜ਼ਮੀਨ ਦੀ ਸਿੰਚਾਈ ਵਾਸਤੇ ਇਕ ਵਰਗ ਕਿਲੋਮੀਟਰ ਰਕਬੇ ’ਚ 34 ਟਿਊਬਵੈੱਲ ਹਨ। ਇਹ ਔਸਤ ਕਿਸੇ ਹੋਰ ਸੂਬੇ ’ਚ ਟਿਊਬਵੈੱਲ ਗਿਣਤੀ ਔਸਤ, ਸੱਭ ਤੋਂ ਉਪਰ ਪੰਜਾਬ ਦੀ ਹੈ।
