ਨੈਸ਼ਨਲ ਹੈਰਾਲਡ ਕੇਸ : ਸੋਨੀਆ ਗਾਂਧੀ ਤੋਂ ਈਡੀ ਨੇ ਤਿੰਨ ਘੰਟੇ ਕੀਤੀ ਪੁਛਗਿੱਛ

25 ਜੁਲਾਈ ਨੂੰ  ਬੁਲਾਇਆ ਦੁਬਾਰਾ, ਦੇਸ਼ ਭਰ 'ਚ ਕਾਂਗਰਸ ਦਾ ਜ਼ੋਰਦਾਰ ਪ੍ਰਦਰਸ਼ਨ

ਨਵੀਂ ਦਿੱਲੀ, 21 ਜੁਲਾਈ : ਨੈਸ਼ਨਲ ਹੈਰਾਲਡ ਕੇਸ ਨਾਲ ਸਬੰਧਤ ਮਨੀ ਲਾਂਡਰਿੰਗ ਮਾਮਲੇ ਵਿਚ ਕਾਂਗਰਸ ਦੀ ਅੰਤਰਮ ਪ੍ਰਧਾਨ ਸੋਨੀਆ ਗਾਂਧੀ ਤੋਂ ਅੱਜ ਈਡੀ ਨੇ ਪੁਛਗਿਛ ਕੀਤੀ | ਸੋਨੀਆ ਗਾਂਧੀ ਤਿੰਨ ਘੰਟੇ ਦੀ ਪੁਛਗਿਛ ਤੋਂ ਬਾਅਦ ਏਜੰਸੀ ਦੇ ਦਫ਼ਤਰ ਤੋਂ ਚਲੇ ਗਏ |
ਈਡੀ ਦੀ ਐਡੀਸ਼ਨਲ ਡਾਇਰੈਕਟਰ ਮੋਨਿਕਾ ਸ਼ਰਮਾ ਦੀ ਟੀਮ ਨੇ ਸੋਨੀਆ ਤੋਂ ਪੁਛਗਿੱਛ ਕੀਤੀ | ਪੁਛਗਿੱਛ ਦੌਰਾਨ ਉਨ੍ਹਾਂ ਨਾਲ ਉਨ੍ਹਾਂ ਦਾ ਬੇਟਾ ਰਾਹੁਲ ਗਾਂਧੀ ਅਤੇ ਬੇਟੀ ਪਿ੍ਅੰਕਾ ਗਾਂਧੀ ਵਾਡਰਾ ਵੀ ਸਨ | ਕੱੁਝ ਮਿੰਟਾਂ ਬਾਅਦ, ਰਾਹੁਲ ਈਡੀ ਦੇ ਹੈੱਡਕੁਆਰਟਰ ਤੋਂ ਚਲੇ ਗਏ ਜਦਕਿ ਪਿ੍ਅੰਕਾ ਦਵਾਈ ਦੇਣ ਲਈ ਉਨ੍ਹਾਂ ਨਾਲ ਰਹੀ | ਜਾਣਕਾਰੀ ਮੁਤਾਬਕ ਕਾਂਗਰਸ ਪ੍ਰਧਾਨ ਨੂੰ  ਈਡੀ ਨੇ ਇਕ ਵਾਰ ਫਿਰ ਪੁਛਗਿਛ ਲਈ 25 ਜੁਲਾਈ ਨੂੰ  ਬੁਲਾਇਆ ਹੈ | ਪਿ੍ਅੰਕਾ ਨੇ ਅਪਣੀ ਮਾਂ ਨਾਲ ਈਡੀ ਦੇ ਹੈੱਡਕੁਆਰਟਰ 'ਚ ਮੌਜੂਦ ਰਹਿਣ ਦੀ ਬੇਨਤੀ ਕੀਤੀ ਸੀ | ਸੋਨੀਆ ਦੀ ਸਿਹਤ ਨੂੰ  ਧਿਆਨ ਵਿਚ ਰਖਦੇ ਹੋਏ ਈਡੀ ਨੇ ਪਿ੍ਅੰਕਾ ਨੂੰ  ਵਖਰੇ ਕਮਰੇ ਵਿਚ ਰਹਿਣ ਦੀ ਇਜਾਜ਼ਤ ਦਿਤੀ | ਈਡੀ ਦੇ ਸੂਤਰਾਂ ਨੇ ਦਾਅਵਾ ਕੀਤਾ ਕਿ ਰਾਹੁਲ ਤੋਂ ਪੰਜ ਦਿਨਾਂ ਦੀ
ਪੁਛਗਿੱਛ ਦੌਰਾਨ ਉਨ੍ਹਾਂ ਤੋਂ ਉਹੀ ਸਵਾਲ ਪੁੱਛੇ ਗਏ ਸਨ |
ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਦੇ ਈਡੀ ਸਾਹਮਣੇ ਪੇਸ਼ ਹੋਣ ਕਾਰਨ ਪਾਰਟੀ ਨੇ ਅੱਜ ਦੇਸ਼ ਭਰ ਵਿਚ ਰੋਸ ਪ੍ਰਦਰਸ਼ਨ ਕੀਤਾ | ਕਾਂਗਰਸ ਦੇ ਕਈ ਸੰਸਦ ਮੈਂਬਰਾਂ ਅਤੇ ਕਈ ਨੇਤਾਵਾਂ ਨੇ ਸੜਕ ਤੋਂ ਲੈ ਕੇ ਸੰਸਦ ਤਕ ਰੋਸ ਪ੍ਰਦਰਸ਼ਨ ਕੀਤਾ | ਇਸ ਦੌਰਾਨ ਦਿੱਲੀ 'ਚ ਵਧਦੇ ਪ੍ਰਦਰਸ਼ਨਾਂ ਨੂੰ  ਵੇਖਦੇ ਹੋਏ ਪੁਲਿਸ ਨੇ ਕਈ ਸੀਨੀਅਰ ਕਾਂਗਰਸੀ ਨੇਤਾਵਾਂ ਸਮੇਤ ਸੰਸਦ ਮੈਂਬਰਾਂ ਨੂੰ  ਵੀ ਹਿਰਾਸਤ 'ਚ ਲੈ ਲਿਆ | ਚੰਡੀਗੜ੍ਹ 'ਚ ਵੀ ਪੁਲਿਸ ਨੇ ਪ੍ਰਦਰਸ਼ਨਕਾਰੀਆਂ 'ਤੇ ਜਲ ਤੋਪਾਂ ਦੀ ਵਰਤੋਂ ਕੀਤੀ | ਤੇਲੰਗਾਨਾ ਅਤੇ ਕਰਨਾਟਕ ਵਿਚ, ਵਿਰੋਧ ਪ੍ਰਦਰਸ਼ਨ ਇੰਨਾ ਭਿਆਨਕ ਹੋ ਗਿਆ ਕਿ ਕਾਰਕੁਨਾਂ ਨੇ ਵਾਹਨਾਂ ਨੂੰ  ਅੱਗ ਵੀ ਲਗਾ ਦਿਤੀ | (ਏਜੰਸੀ)