ਔਲਾਦ ਨਾ ਹੋਣ 'ਤੇ ਸਹੁਰੇ ਕਰਦੇ ਸੀ ਪ੍ਰੇਸ਼ਾਨ, ਔਰਤ ਨੇ ਕੀਤੀ ਖ਼ੁਦਕੁਸ਼ੀ
ਮੋਗਾ, 22 ਅਗੱਸਤ (ਅਮਜਦ ਖ਼ਾਨ): ਜ਼ਿਲ੍ਹੇ ਦੇ ਕਸਬਾ ਥਾਣਾ ਧਰਮਕੋਟ ਦੇ ਸਬ-ਇੰਸਪੈਕਟਰ ਮੇਜਰ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਦਸਿਆ ਕਿ ਜਗਤਾਰ ਸਿੰਘ ਵਾਸੀ ਛੀਨੀਵਾਲ (ਬਰਨਾਲਾ) ਨੇ ਦਰਜ ਕਰਾਇਆ ਕਿ ਉਸ ਦੀ ਲੜਕੀ ਗੁਰਪ੍ਰੀਤ ਕੌਰ ਜੋ ਕਰੀਬ 6 ਸਾਲ ਪਹਿਲਾਂ ਇੰਦਰਜੀਤ ਸਿੰਘ ਵਾਸੀ ਪਿੰਡ ਭਿੰਡਰ ਕਲਾਂ ਨਾਲ ਵਿਆਹੀ ਹੋਈ ਸੀ ਜਿਸ ਦੇ ਹਾਲੇ ਕੋਈ ਔਲਾਦ ਨਹੀਂ ਸੀ ਹੋਈ ਜਿਸ ਕਰ ਕੇ ਇੰਦਰਜੀਤ ਸਿੰਘ (ਪਤੀ), ਸੁਰਜੀਤ ਸਿੰਘ (ਸਹੁਰਾ), ਨੋਨੀ (ਚਾਚਾ ਸਹੁਰਾ) ਵਾਸੀ ਪਿੰਡ ਭਿੰਡਰ ਕਲਾਂ ਉਸ ਦੀ ਲੜਕੀ ਨਾਲ ਰਿਸ਼ਤਾ ਤੋੜਨ ਲਈ ਤੰਗ ਪ੍ਰਸ਼ਾਨ ਕਰਦੇ ਸਨ ਜਿਨ੍ਹਾਂ ਤੋਂ ਤੰਗ ਆ ਕੇ ਉਸ ਦੀ ਲੜਕੀ ਨੇ ਫਾਹਾ ਲੈ ਕੇ ਆਤਮ ਹਤਿਆ ਕਰ ਲਈ। ਸਬ-ਇੰਸਪੈਕਟਰ ਮੇਜਰ ਸਿੰਘ ਨੇ ਦਸਿਆ ਕਿ ਮ੍ਰਿਤਕ ਲੜਕੀ ਦੇ ਪਿਤਾ ਜਗਤਾਰ ਸਿੰਘ ਦੇ ਬਿਆਨਾਂ 'ਤੇ ਲੜਕੀ ਦੇ ਪਤੀ ਸਮੇਤ ਉਸ ਦੇ ਸਹੁਰਾ ਪਰਵਾਰ ਵਿਰੁਧ ਬਣਦਾ ਮਾਮਲਾ ਦਰਜ ਕਰ ਲਿਆ
ਗਿਆ ਹੈ ਅਤੇ ਪੁਲਿਸ ਵਲੋਂ ਉਕਤ ਦੋਸ਼ੀ ਵਿਅਕਤੀਆਂ ਦੀ ਭਾਲ ਜਾਰੀ ਹੈ।