ਕੁਝ ਯਾਤਰੀਆਂ ਨੇ ਇਸ ਬਾਰੇ ਡੀਜੀਸੀਏ ਇੰਡੀਆ ਨੂੰ ਆਨਲਾਈਨ ਸ਼ਿਕਾਇਤ ਵੀ ਕੀਤੀ
ਅੰਮ੍ਰਿਤਸਰ- ਮੁੰਬਈ ਤੋਂ ਪੰਜਾਬ ਦੇ ਅੰਮ੍ਰਿਤਸਰ ਹਵਾਈ ਅੱਡੇ 'ਤੇ ਜਾਣ ਵਾਲੀ ‘ਗੋ ਫਸਟ’ ਏਅਰਲਾਈਨਜ਼ ਦੀ ਫਲਾਈਟ 2 ਘੰਟੇ ਲੇਟ ਹੋਈ। ਇਹ ਦੇਰੀ ਕਿਸੇ ਤਕਨੀਕੀ ਖ਼ਰਾਬੀ ਜਾਂ ਮੌਸਮ ਦੀ ਖ਼ਰਾਬੀ ਕਾਰਨ ਨਹੀਂ ਹੋਈ। ਲਗਭਗ 180 ਯਾਤਰੀਆਂ ਨੂੰ ਸਿਰਫ 12 ਟਰਾਂਜ਼ਿਟ ਯਾਤਰੀਆਂ ਲਈ ਰਨਵੇਅ 'ਤੇ ਉਡੀਕ ਕਰਵਾਈ ਗਈ ਸੀ। ਜਿਸ ਤੋਂ ਬਾਅਦ ਯਾਤਰੀਆਂ ਦਾ ਏਅਰਲਾਈਨ ਸਟਾਫ਼ ਨਾਲ ਕਾਫੀ ਹੰਗਾਮਾ ਹੋਇਆ।
ਮੁੰਬਈ-ਅੰਮ੍ਰਿਤਸਰ ‘ਗੋ ਫਸਟ’ ਏਅਰਲਾਈਨਜ਼ ਦੀ ਫਲਾਈਟ ਨੰਬਰ G82417 'ਚ ਸ਼ੁੱਕਰਵਾਰ ਸ਼ਾਮ ਨੂੰ ਹਵਾਈ ਅੱਡੇ 'ਤੇ ਹੰਗਾਮਾ ਹੋਇਆ। ਏਅਰਲਾਈਨਜ਼ ਤੋਂ ਇਲਾਵਾ ਇਕ ਯਾਤਰੀ ਨੇ ਇਸ ਬਾਰੇ ਡੀਜੀਸੀਏ ਇੰਡੀਆ ਨੂੰ ਵੀ ਸ਼ਿਕਾਇਤ ਭੇਜੀ ਹੈ। ਅੰਮ੍ਰਿਤਸਰ ਪਹੁੰਚੇ ਯਾਤਰੀ ਕਰਨਜੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟਿਕਟ ਮੁੰਬਈ ਅੰਮ੍ਰਿਤਸਰ ਫਲਾਈਟ G82417 ਦੀ ਬੁੱਕ ਹੋਈ ਸੀ। ਪੂਰੇ 4 ਵਜੇ ਦੇ ਕਰੀਬ ਫਲਾਈਟ 'ਚ ਕਰੀਬ 180 ਯਾਤਰੀ ਬੈਠੇ ਸਨ। ਇਸ ਉਡਾਣ ਨੂੰ ਪੂਰੇ ਸਾਢੇ ਚਾਰ ਵਜੇ ਮੁੰਬਈ ਤੋਂ ਉਡਾਣ ਭਰਨੀ ਸੀ, ਪਰ ਅਜਿਹਾ ਨਹੀਂ ਹੋਇਆ। ਯਾਤਰੀ ਕਾਫੀ ਦੇਰ ਤੱਕ ਇੰਤਜ਼ਾਰ ਕਰਦੇ ਰਹੇ ਪਰ ਜਦੋਂ ਫਲਾਈਟ ਟੇਕ ਆਫ ਨਾ ਹੋਈ ਤਾਂ ਸਾਰਿਆਂ ਨੇ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ।
ਕਰਨਜੀਤ ਸਿੰਘ ਨੇ ਦੱਸਿਆ ਕਿ ਪੁੱਛੇ ਜਾਣ 'ਤੇ ਏਅਰਲਾਈਨਜ਼ ਨੇ ਸਾਰੇ ਯਾਤਰੀਆਂ ਨਾਲ ਗੈਰ-ਪ੍ਰੋਫੈਸ਼ਨਲ ਵਿਵਹਾਰ ਕੀਤਾ। ਦਰਅਸਲ, ਇਹ ਫਲਾਈਟ 12 ਟਰਾਂਜ਼ਿਟ ਯਾਤਰੀਆਂ ਲਈ ਰਨਵੇਅ ’ਤੇ 2 ਘੰਟੇ ਲਈ ਰੋਕ ਕੇ ਰੱਖੀ ਗਈ ਸੀ। ਦੇਰ ਨਾਲ ਉਡਾਣ ਭਰਨ ਕਾਰਨ ਇਹ ਫਲਾਇਟ 2 ਘੰਟੇ ਦੀ ਦੇਰੀ ਨਾਲ ਅੰਮ੍ਰਿਤਸਰ ਏਅਰਪੋਰਟ ਉੱਤੇ ਪੁੱਜੀ।ਜਿਸ ਤੋਂ ਬਾਅਦ ਕੁਝ ਯਾਤਰੀਆਂ ਨੇ ਇਸ ਬਾਰੇ ਡੀਜੀਸੀਏ ਇੰਡੀਆ ਨੂੰ ਆਨਲਾਈਨ ਸ਼ਿਕਾਇਤ ਵੀ ਕੀਤੀ ਹੈ।
