ਅਮਰੀਕਾ ਨੇ ਚੀਨੀ ਏਅਰਲਾਈਨ ਦੀਆਂ 44 ਉਡਾਣਾਂ ਕੀਤੀਆਂ ਰੱਦ

ਵਾਸ਼ਿੰਗਟਨ, 22 ਜਨਵਰੀ : ਅਮਰੀਕਾ ਅਤੇ ਚੀਨ ਵਿਚਾਲੇ ਤਣਾਅ ਇਕ ਵਾਰ ਫਿਰ ਸਿਖਰ ’ਤੇ ਹੈ। ਅਮਰੀਕੀ ਸਰਕਾਰ ਨੇ ਚੀਨ ਲਈ ਉਡਾਣਾਂ ਨੂੰ ਰੱਦ ਕਰਨ ਦਾ ਫ਼ੈਸਲਾ ਕੀਤਾ, ਜੋ ਕਿ 30 ਜਨਵਰੀ ਤੋਂ ਲਾਗੂ ਹੋ ਜਾਵੇਗਾ। ਦਰਅਸਲ, ਕੱੁਝ ਦਿਨ ਪਹਿਲਾਂ ਚੀਨ ਨੇ ਕੋਰੋਨਾ ਦਾ ਹਵਾਲਾ ਦਿੰਦੇ ਹੋਏ ਕੱੁਝ ਅਮਰੀਕੀ ਉਡਾਣਾਂ ਨੂੰ ਰੱਦ ਕਰ ਦਿਤਾ ਸੀ। ਹੁਣ ਅਮਰੀਕਾ ਨੇ ਇਸ ਦਾ ਜਵਾਬ ਦਿਤਾ ਹੈ।
ਅਮਰੀਕੀ ਏਅਰਲਾਈਨਜ਼ ਦੀਆਂ ਉਡਾਣਾਂ ਨੂੰ ਰੱਦ ਕਰਨ ਲਈ ਚੀਨ ਦੇ ਦਬਾਅ ਦੇ ਜਵਾਬ ਵਿਚ, ਅਮਰੀਕਾ ਨੇ ਚੀਨੀ ਏਅਰਲਾਈਨਜ਼ ਦੀਆਂ 44 ਉਡਾਣਾਂ ਨੂੰ ਰੋਕ ਦਿਤਾ ਹੈ। ਅਮਰੀਕਾ ਦੇ ਆਵਾਜਾਈ ਵਿਭਾਗ ਦੇ ਆਦੇਸ਼ ਨਾਲ ਚਾਰ ਚੀਨੀ ਏਅਰਲਾਈਨਾਂ ਪ੍ਰਭਾਵਿਤ ਹੋਣਗੀਆਂ। ਇਸ ਕਾਰਨ ਕੋਵਿਡ-19 ਨਾਲ ਜੁੜੀਆਂ ਪਾਬੰਦੀਆਂ ਨੂੰ ਲੈ ਕੇ ਦੋਹਾਂ ਦੇਸ਼ਾਂ ਵਿਚਾਲੇ ਚੱਲ ਰਿਹਾ ਵਿਵਾਦ ਵਧ ਗਿਆ ਹੈ। ਜੋ ਬਾਇਡੇਨ ਪ੍ਰਸ਼ਾਸਨ ਦੇ ਇਸ ਫ਼ੈਸਲੇ ਨਾਲ ਚੀਨ ਦੀ ਸ਼ਿਆਮੇਨ ਏਅਰਲਾਈਨਜ਼, ਏਅਰ ਚਾਈਨਾ, ਚਾਈਨਾ ਸਦਰਨ ਏਅਰਲਾਈਨਜ਼ ਅਤੇ ਚਾਈਨਾ ਈਸਟਰਨ ਏਅਰਲਾਈਨਜ਼ ਦੀਆਂ ਉਡਾਣਾਂ ’ਤੇ ਅਸਰ ਪਵੇਗਾ।
ਚੀਨ ਨੇ ਡੈਲਟਾ ਏਅਰਲਾਈਨਜ਼, ਯੂਨਾਈਟਿਡ ਏਅਰਲਾਈਨਜ਼ ਅਤੇ ਅਮਰੀਕਨ ਏਅਰਲਾਈਨਜ਼ ਦੇ ਕੱੁਝ ਯਾਤਰੀਆਂ ਦੇ ਕੋਰੋਨਾ ਪਾਜ਼ੇਟਿਵ ਪਾਏ ਜਾਣ ਤੋਂ ਬਾਅਦ ਦੇਸ਼ ਵਿਚ ਇਨ੍ਹਾਂ ਏਅਰਲਾਈਨਾਂ ਦੀਆਂ ਉਡਾਣਾਂ ਦੇ ਦਾਖ਼ਲੇ ’ਤੇ ਪਾਬੰਦੀ ਲਗਾ ਦਿਤੀ ਹੈ। ਅਮਰੀਕਾ ਨੇ ਕਿਹਾ ਹੈ ਕਿ ਚੀਨ ਦੀਆਂ ਕਾਰਵਾਈਆਂ ਨੇ ਹਰ ਦੇਸ਼ ਦੀ ਦੂਜੇ ਦੇਸ਼ ਦੀਆਂ ਏਅਰਲਾਈਨਾਂ ਤਕ ਪਹੁੰਚ ’ਤੇ ਸੰਧੀ ਦੀ ਉਲੰਘਣਾ ਕੀਤੀ ਹੈ।
ਆਵਾਜਾਈ ਵਿਭਾਗ ਨੇ ਕਿਹਾ ਕਿ ਅਮਰੀਕੀ ਏਅਰਲਾਈਨਜ਼ ਦੀਆਂ 44 ਉਡਾਣਾਂ ਨੂੰ ਰੋਕਣ ਦਾ ਚੀਨ ਦਾ ਫ਼ੈਸਲਾ ‘ਜਨਹਿਤ ਵਿਰੁਧ ਹੈ ਅਤੇ ਵਿਭਾਗ ਨੂੰ ਬਰਾਬਰ ਅਨੁਪਾਤ ਵਿਚ ਬਦਲਾ ਲੈਣ ਦੀ ਮੰਗ ਕਰਦਾ ਹੈ” ਅਮਰੀਕੀ ਆਦੇਸ਼ ਦੇ ਤਹਿਤ 30 ਜਨਵਰੀ ਤੋਂ 29 ਮਾਰਚ ਤਕ ਬੀਚ ਏਅਰ ਚਾਈਨਾ, ਚਾਈਨਾ ਈਸਟਰਨ ਏਅਰਲਾਈਨਜ਼ ਦੀਆਂ 44 ਉਡਾਣਾਂ , ਚਾਈਨਾ ਸਾਊਦਰਨ ਏਅਰਲਾਈਨਜ਼ ਅਤੇ ਜ਼ਿਆਮੇਨ ਏਅਰਲਾਈਨਜ਼ ਨੂੰ ਰੱਦ ਕਰ ਦਿਤਾ ਜਾਵੇਗਾ। (ਏਜੰਸੀ)