ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਮਰਸਿਡੀਜ਼ ਚਲਾ ਰਿਹਾ ਵਿਅਕਤੀ ਦੋਹਾਂ ਨੌਜੁਆਨਾਂ ਨੂੰ ਬਾਈਕ ਸਮੇਤ ਲਗਭਗ 40 ਮੀਟਰ ਤਕ ਘਸੀਟਦਾ ਰਿਹਾ

ਜਲੰਧਰ: ਜਲੰਧਰ-ਲੁਧਿਆਣਾ ਨੈਸ਼ਨਲ ਹਾਈਵੇਅ ’ਤੇ ਗੋਰਾਇਆ ਨੇੜੇ ਵਾਪਰੇ ਇਕ ਹਾਦਸੇ ’ਚ ਦੋ ਨੌਜੁਆਨਾਂ ਦੀ ਮੌਤ ਹੋ ਗਈ। ਤੇਜ਼ ਰਫ਼ਤਾਰ ਮਰਸਿਡੀਜ਼ ਕਾਰ ਨੇ ਮੋਟਰਸਾਈਕਲ ਨੂੰ ਟੱਕਰ ਮਾਰੀ ਜਿਸ ’ਤੇ ਦੋ ਨੌਜੁਆਨ ਬੈਠੇ ਸਨ। ਕਾਰ ਮੋਟਰਸਾਈਕਲ ਨੂੰ ਘਸੀਟਦੀ ਹੋਈ ਲੈ ਗਈ ਜਿਸ ਕਾਰਨ ਉਸ ਨੂੰ ਅੱਗ ਲੱਗ ਗਈ।  ਇਸੇ ਅੱਗ ’ਚ ਦੋਵੇਂ ਮੋਟਰਸਾਈਕਲ ਸਵਾਰ ਨੌਜੁਆਨ ਸੜ ਕੇ ਮਰ ਗਏ। ਮ੍ਰਿਤਕਾਂ ਦੀ ਪਛਾਣ ਅਜੇ ਨਹੀਂ ਹੋ ਸਕੀ ਹੈ। ਮਰਸਿਡੀਜ਼ ਕਾਰ ਵੀ ਬੁਰੀ ਤਰ੍ਹਾਂ ਖਰਾਬ ਹੋ ਗਈ। 

ਹਾਦਸੇ ਦੇ ਗਵਾਹ ਫਿਲੌਰ ਦੇ ਪਿੰਡ ਅਸ਼ਹੂਰ ਦੇ ਵਸਨੀਕ ਵਿੱਕੀ ਨੇ ਪੁਲਿਸ ਨੂੰ ਦਸਿਆ ਕਿ ਹਾਦਸੇ ਦੇ ਸਮੇਂ ਉਹ ਮੋਟਰਸਾਈਕਲ ’ਤੇ ਪਿੱਛੇ ਆ ਰਿਹਾ ਸੀ। ਦੋਵੇਂ ਨੌਜੁਆਨ ਕੁੱਝ ਦੂਰੀ ’ਤੇ ਇਕ ਪੈਲਸ ਤੋਂ ਨਿਕਲੇ ਸਨ। ਮਰਸਿਡੀਜ਼ ਕਾਰ ਦੀ ਰਫਤਾਰ ਬਹੁਤ ਤੇਜ਼ ਸੀ, ਜਿਸ ਕਾਰਨ ਬਾਈਕ ਦੇ ਅੱਗੇ ਆਉਣ ’ਤੇ ਉਹ ਕਾਰ ਨੂੰ ਕੰਟਰੋਲ ਨਹੀਂ ਕਰ ਸਕਿਆ। 

ਵਿੱਕੀ ਨੇ ਪੁਲਿਸ ਨੂੰ ਦਸਿਆ ਕਿ ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਮਰਸਿਡੀਜ਼ ਚਲਾ ਰਿਹਾ ਵਿਅਕਤੀ ਦੋਹਾਂ ਨੌਜੁਆਨਾਂ ਨੂੰ ਬਾਈਕ ਸਮੇਤ ਲਗਭਗ 40 ਮੀਟਰ ਤਕ ਘਸੀਟਦਾ ਰਿਹਾ। ਇੰਨਾ ਘਸੀਟਣ ਤੋਂ ਬਾਅਦ ਦੋਹਾਂ ’ਚ ਇੰਨੀ ਹਿੰਮਤ ਨਹੀਂ ਬਚੀ ਕਿ ਉਹ ਬਾਈਕ ਤੋਂ ਵੱਖ ਹੋ ਜਾਣ। ਵੇਖਦਿਆਂ ਹੀ ਉਸ ਦੀ ਬਾਈਕ ਨੂੰ ਅੱਗ ਲੱਗ ਗਈ। ਇਸ ਤੋਂ ਬਾਅਦ ਕਾਰ ਸਵਾਰ ਦੋਹਾਂ ਨੂੰ ਬਚਾਉਣ ਦੀ ਬਜਾਏ ਮੌਕੇ ਤੋਂ ਫਰਾਰ ਹੋ ਗਿਆ। ਹਾਦਸੇ ਦੀ ਸੂਚਨਾ ਪੁਲਿਸ ਨੂੰ ਦਿਤੀ ਗਈ। 

ਗੋਰਾਇਆ ਦੇ ਐਸ.ਐਚ.ਓ. ਸੁਖਦੇਵ ਸਿੰਘ ਅਤੇ ਜਾਂਚ ਅਧਿਕਾਰੀ ਹਰਭਜਨ ਸਿੰਘ ਗਿੱਲ ਦੇਰ ਰਾਤ ਘਟਨਾ ਵਾਲੀ ਥਾਂ ’ਤੇ ਪਹੁੰਚੇ। ਪੁਲਿਸ ਮੌਕੇ ਤੋਂ ਮੁਲਜ਼ਮ ਦੀ ਕਾਰ ਅਤੇ ਬਾਈਕ ਦਾ ਬਾਕੀ ਢਾਂਚਾ ਅਪਣੇ ਕਬਜ਼ੇ ’ਚ ਲੈ ਗਈ ਸੀ। ਉਥੇ ਹੀ ਦੋਹਾਂ ਮ੍ਰਿਤਕਾਂ ਦੀਆਂ ਲਾਸ਼ਾਂ ਨੂੰ ਪੁਲਿਸ ਨੇ ਪੋਸਟਮਾਰਟਮ ਲਈ ਭੇਜ ਦਿਤਾ ਹੈ।