ਭਿ੍ਸ਼ਟਾਚਾਰ ਦੇ ਮਾਮਲੇ 'ਚ ਗਿ੍ਫ਼ਤਾਰ ਆਈ.ਏ.ਐਸ. ਅਫ਼ਸਰ ਸੰਜੇ ਪੋਪਲੀ ਦੀਆਂ ਮੁਸ਼ਕਲਾਂ ਵਧੀਆਂ
ਦੋ ਹੋਰ ਠੇਕੇਦਾਰਾਂ ਨੇ 2 ਫ਼ੀ ਸਦੀ ਕਮਿਸ਼ਨ ਲੈਣ ਦੀ ਮੁੱਖ ਮੰਤਰੀ ਨੂੰ ਕੀਤੀ ਸ਼ਿਕਾਇਤ, ਪੋਪਲੀ ਦੇ ਘਰ ਦੀ ਤਲਾਸ਼ੀ ਸਮੇਂ ਵੀ ਮਿਲੇ ਹਨ 73 ਕਾਰਤੂਸ ਅਤੇ ਵਿਦੇਸ਼ੀ ਸ਼ਰਾਬ
ਚੰਡੀਗੜ੍ਹ, 22 ਜੂਨ (ਗੁਰਉਪਦੇਸ਼ ਭੁੱਲਰ): ਵਿਜੀਲੈਂਸ ਬਿਊਰੋ ਵਲੋਂ ਭਿ੍ਸ਼ਟਾਚਾਰ ਦੇ ਦੋਸ਼ਾਂ ਵਿਚ ਗਿ੍ਫ਼ਤਾਰ ਕੀਤੇ ਪੁਲਿਸ ਰੀਮਾਂਡ 'ਤੇ ਚਲ ਰਹੇ ਆਈ.ਏ.ਐਸ. ਅਫ਼ਸਰ ਸੰਜੇ ਪੋਪਲੀ ਦੀਆਂ ਮੁਸ਼ਕਲਾਂ ਹੋਰ ਵੱਧ ਗਈਆਂ ਹਨ | ਹੁਣ ਦੋ ਹੋਰ ਠੇਕੇਦਾਰਾਂ ਨੇ ਕੰਮ ਵਿਚੋਂ 2 ਫ਼ੀ ਸਦੀ ਕਮਿਸ਼ਨ ਲੈਣ ਦੀ ਸ਼ਿਕਾਇਤ ਵਿਜੀਲੈਂਸ ਬਿਊਰੋ ਨੂੰ ਕੀਤੀ ਹੈ | ਇਸੇ ਦੌਰਾਨ ਅੱਜ ਬਿਊਰੋ ਦੀ ਟੀਮ ਵਲੋਂ ਪੋਪਲੀ ਦੇ ਸੈਕਟਰ 11 ਸਥਿਤ ਘਰ ਦੀ ਲਈ ਤਲਾਸ਼ੀ ਦੌਰਾਨ 73 ਕਾਰਤੂਸ ਅਤੇ ਵਿਦੇਸ਼ੀ ਸ਼ਰਾਬ ਵੀ ਮਿਲੀ ਹੈ |
ਮਿਲੇ ਕਾਰਤੂਸਾਂ ਵਿਚ 7.65 ਐਮਐਮ ਦੇ 41, 32 ਬੋਰ ਦੇ 2 ਅਤੇ 22 ਬੋਰ ਦੇ 30 ਕਾਰਤੂਸ ਸ਼ਾਮਲ ਹਨ | ਇਸ ਸਬੰਧ ਵਿਚ ਪੋਪਲੀ ਵਿਰੁਧ ਆਰਮਜ਼ ਐਕਟ ਦਾ ਮਾਮਲਾ ਵੀ ਦਰਜ ਕਰ ਲਿਆ ਗਿਆ ਹੈ | ਬਿਊਰੋ ਇਹ ਪਤਾ ਲਾਉਣ ਲਈ ਜਾਂਚ ਕਰ ਰਿਹਾ ਹੈ ਕਿ ਇਹ ਕਾਰਤੂਸ ਕਿਥੋਂ ਆਏ ਤੇ ਕਿਸ ਮਕਸਦ ਲਈ ਰੱਖੇ ਗਏ ਸਨ | ਵਿਦੇਸ਼ੀ ਸ਼ਰਾਬ ਦਾ ਪਰਮਿਟ ਹੋਣ ਕਾਰਨ ਮਾਮਲਾ ਦਰਜ ਨਹੀਂ ਕੀਤਾ ਗਿਆ | ਇਸ ਬਾਰੇ ਜਾਂਚ ਪੜਤਾਲ ਲਈ ਚੰਡੀਗੜ੍ਹ ਪੁਲਿਸ ਨੂੰ ਸੂਚਨਾ ਦਿਤੀ ਗਈ ਹੈ |
ਸੰਜੇ ਪੋਪਲੀ ਵਿਰੁਧ ਮੁੱਖ ਮੰਤਰੀ ਨੂੰ ਹਰਿਆਣਾ ਨਾਲ ਸਬੰਧਤ ਕਰਨਾਲ ਦੇ 2 ਹੋਰ ਠੇਕੇਦਾਰਾਂ ਨੇ ਸ਼ਿਕਾਇਤ ਦਿਤੀ ਹੈ |
ਸ਼ਿਕਾਇਤ ਵਿਚ ਕਿਹਾ ਗਿਆ ਹੈ ਕਿ ਉਨ੍ਹਾਂ ਤੋਂ ਮੋਰਿੰਡਾ ਅਤੇ ਤਲਵਾੜਾ ਦੀ ਸੀਵਰੇਜ ਲਾਈਨ ਵਿਛਾਉਣ ਲਈ ਪੇਮੈਂਟ ਦੀ ਅਦਾਇਗੀ ਬਦਲੇ 2 ਫ਼ੀ ਸਦੀ ਕਮਿਸ਼ਨ ਲਿਆ ਗਿਆ |
ਜ਼ਿਕਰਯੋਗ ਹੈ ਕਿ ਪੋਪਲੀ ਦੀ ਪਹਿਲਾਂ ਵੀ ਠੇੇਕੇਦਾਰ ਵਲੋਂ 1 ਫ਼ੀ ਸਦੀ ਕਮਿਸ਼ਨ ਦਿਤੇ ਜਾਣ ਦੀ ਸ਼ਿਕਾਇਤ ਬਾਅਦ ਵਿਜੀਲੈਂਸ ਬਿਊਰੋ ਨੇ ਗਿ੍ਫ਼ਤਾਰੀ ਕੀਤੀ ਹੈ | ਕਰਨਾਲ ਦੇ ਇਕ ਠੇਕੇਦਾਰ ਨੇ 7.30 ਕਰੋੜ ਦੇ ਪ੍ਰਾਜੈਕਟ ਲਈ 1 ਫ਼ੀ ਸਦੀ ਕਮਿਸ਼ਨ ਲੈਣ ਦੀ ਸ਼ਿਕਾਇਤ ਕੀਤੀ ਸੀ |
