ਨੇਤਾਵਾਂ ਦੇ ਵਿਰੋਧ ਦੇ ਬਾਵਜੂਦ, ਮਾਲੀ ਨੇ ਇਸਨੂੰ ਨਹੀਂ ਹਟਾਇਆ ਅਤੇ ਨਾ ਹੀ ਮੁਆਫ਼ੀ ਮੰਗੀ।
ਜਲੰਧਰ: ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਦੇ ਸਲਾਹਕਾਰ (Navjot Sidhu's Advisor) ਮਾਲਵਿੰਦਰ ਸਿੰਘ ਮਾਲੀ (Malvinder Singh Mali) ਨੇ ਆਪਣੇ ਫੇਸਬੁੱਕ ਪੇਜ 'ਤੇ ਸਾਬਕਾ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ (Indira Gandhi Sketch) ਦਾ ਇਕ ਸਕੈਚ ਪੋਸਟ ਕੀਤਾ ਹੈ। ਇਸ ਸਕੈਚ ਕਰ ਕੇ ਹੁਣ ਉਹ ਵਿਵਾਦਾਂ (Controversial) ਵਿਚ ਘਿਰ ਗਏ ਹਨ। ਮਾਲੀ ਨੇ 1989 ਵਿਚ ਪ੍ਰਕਾਸ਼ਤ ਇਕ ਪੰਜਾਬੀ ਮੈਗਜ਼ੀਨ, 'ਜਨਤਕ ਪੈਗ਼ਾਮ' ਦੇ ਕਵਰ ਨੂੰ ਸੋਸ਼ਲ ਮੀਡੀਆ 'ਤੇ ਸਾਂਝਾ ਕੀਤਾ ਹੈ। ਇਸ ਵਿਚ ਦੇਖਿਆ ਜਾ ਸਕਦਾ ਹੈ ਕਿ ਇੰਦਰਾ ਗਾਂਧੀ ਮਨੁੱਖੀ ਖੋਪੜੀਆਂ ਉੱਤੇ ਖੜ੍ਹੀ ਹੈ ਅਤੇ ਇਕ ਖੋਪੜੀ ਉਸਦੇ ਹੱਥ ਵਿਚ ਫੜ੍ਹੀ ਬੰਦੂਕ ’ਤੇ ਲਟਕ ਰਹੀ ਹੈ।
Sketch shared by Malvinder Singh Mali
ਇਸ ਸਕੈਚ ਦੇ ਨਾਲ ਲਿਖਿਆ ਹੈ, 'ਹਰ ਜਾਬਰ ਦੀ ਇਹੀ ਕਹਾਣੀ, ਕਰਨਾ ਜਬਰ ਤੇ ਮੂੰਹ ਦੀ ਖਾਣੀ', ਯਾਨੀ ਕਿ ਹਰ ਜ਼ਾਲਮ ਦੀ ਇਹੀ ਕਹਾਣੀ ਹੈ ਕਿ ਅੰਤ ਵਿਚ ਉਸ ਨੂੰ ਮੂੰਹ ਦੀ ਖਾਣੀ ਪੈਂਦੀ ਹੈ। ਦਰਅਸਲ ਇਹ ਫੋਟੋ 1984 ਦੇ ਸਿੱਖ ਦੰਗਿਆਂ (1984 Sikh Riots) ਦੇ ਕਤਲੇਆਮ ਨੂੰ ਦਰਸਾਉਂਦੀ ਹੈ। ਸਿੱਖ ਭਾਈਚਾਰਾ ਇਸ ਸਭ ਦੇ ਲਈ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ ਨੂੰ ਜ਼ਿੰਮੇਵਾਰ ਮੰਨਦਾ ਹੈ। ਇਸ ਰਸਾਲੇ ਦੇ ਸੰਪਾਦਕ ਉਸ ਸਮੇਂ ਮਾਲਵਿੰਦਰ ਸਿੰਘ ਮਾਲੀ ਹੀ ਸਨ।
Malvinder Singh Mali
ਨਵਜੋਤ ਸਿੰਘ ਸਿੱਧੂ ਗਾਂਧੀ ਪਰਿਵਾਰ ਦੇ ਨਜ਼ਦੀਕੀ ਹਨ ਅਤੇ ਉਹ ਅਕਸਰ ਰਾਹੁਲ ਗਾਂਧੀ ਅਤੇ ਪ੍ਰਿਯੰਕਾ ਗਾਂਧੀ ਦੇ ਨਾਲ ਆਪਣੀਆਂ ਫੋਟੋਆਂ ਸਾਂਝੀਆਂ ਕਰਦੇ ਰਹਿੰਦੇ ਹਨ। ਇਸ ਕਾਰਨ, ਕਾਂਗਰਸੀ ਨੇਤਾਵਾਂ ਨੇ ਇਸ ਫੋਟੋ 'ਤੇ ਸਖ਼ਤ ਪ੍ਰਤੀਕਿਰਿਆ ਦਿੰਦੇ ਹੋਏ ਮਾਲੀ ਨੂੰ ਸਕੈਚ ਹਟਾਉਣ ਲਈ ਕਿਹਾ। ਹਾਲਾਂਕਿ, ਨੇਤਾਵਾਂ ਦੇ ਵਿਰੋਧ ਦੇ ਬਾਵਜੂਦ, ਮਾਲੀ ਨੇ ਇਸਨੂੰ ਨਹੀਂ ਹਟਾਇਆ ਅਤੇ ਨਾ ਹੀ ਉਸਨੇ ਮੁਆਫ਼ੀ ਮੰਗੀ।
ਇਸ ਤੋਂ ਪਹਿਲਾਂ ਮਾਲਵਿੰਦਰ ਸਿੰਘ ਮਾਲੀ ਨੇ ਆਪਣੀ ਫੇਸਬੁੱਕ 'ਤੇ ਇਕ ਪੋਸਟ ਵਿਚ ਜੰਮੂ -ਕਸ਼ਮੀਰ ਬਾਰੇ ਵਿਵਾਦਤ ਟਿੱਪਣੀਆਂ (Controversial Remark on Jammu and Kashmir) ਕੀਤੀਆਂ ਸਨ। ਇਸ ਪੋਸਟ ਵਿਚ ਉਨ੍ਹਾਂ ਨੇ ਜੰਮੂ -ਕਸ਼ਮੀਰ ਨੂੰ ਇਕ ਵੱਖਰਾ ਦੇਸ਼ ਦੱਸਿਆ ਸੀ। ਮਾਲੀ ਨੇ ਕਿਹਾ ਸੀ ਕਿ ਕਸ਼ਮੀਰ ਆਜ਼ਾਦ ਹੋਣਾ ਚਾਹੀਦਾ ਹੈ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਪਾਕਿਸਤਾਨ ਅਤੇ ਭਾਰਤ ਦਾ ਕਸ਼ਮੀਰ 'ਤੇ ਨਜਾਇਜ਼ ਕਬਜ਼ਾ ਕਰਨ ਬਾਰੇ ਕਿਹਾ ਸੀ।
Captain Amarinder Singh
ਸਿੱਧੂ ਦੇ ਸਲਾਹਕਾਰ ਮਾਲੀ ਦੀ ਅਜਿਹੀਆਂ ਟਿਪੱਣੀਆਂ ਕਰਨ ’ਤੇ ਕੈਪਟਨ ਨੇ ਸਖ਼ਤ ਤਾੜਨਾ ਕੀਤੀ ਹੈ। ਮੁੱਖ ਮੰਤਰੀ ਕੈਪਟਨ (CM Captain Amarinder Singh) ਨੇ ਕਿਹਾ ਕਿ, “ਉਨ੍ਹਾਂ ਨੂੰ ਸਿਰਫ਼ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨੂੰ ਸਲਾਹ ਦੇਣ ਤੱਕ ਹੀ ਸੀਮਤ ਰਹਿਣਾ ਚਾਹੀਦਾ ਹੈ। ਉਨ੍ਹਾਂ ਮੁੱਦਿਆਂ 'ਤੇ ਕੋਈ ਬਿਆਨ ਨਾ ਦਿਓ ਜਿਨ੍ਹਾਂ ਬਾਰੇ ਤੁਸੀਂ ਜਾਣੂ ਨਹੀਂ ਹੋ, ਅਤੇ ਖਾਸ ਕਰਕੇ ਜਦੋਂ ਤੁਸੀਂ ਇਹ ਵੀ ਨਹੀਂ ਜਾਣਦੇ ਕਿ ਇਸਦੇ ਨਤੀਜੇ ਕੀ ਹੋ ਸਕਦੇ ਹਨ।”
