ਕਾਂਗਰਸ ਸਰਕਾਰ ਦਾ ਇਹ ਲਗਾਤਾਰ ਦੂਜਾ ਬਜਟ ਹੋਵੇਗਾ
ਪੰਜਾਬ ਵਿਧਾਨ ਸਭਾ ਦੇ ਚਲ ਰਹੇ ਬਜਟ ਸੈਸ਼ਨ ਦੇ ਚੌਥੇ ਦਿਨ ਸਨਿਚਰਵਾਰ ਨੂੰ ਸਾਲ 2018-19 ਦੇ ਸਾਲਾਨਾ ਬਜਟ ਪ੍ਰਸਤਾਵ ਪੇਸ਼ ਕੀਤੇ ਜਾਣਗੇ। ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਵਲੋਂ ਪੇਸ਼ ਕੀਤਾ ਜਾਣ ਵਾਲਾ ਕਾਂਗਰਸ ਸਰਕਾਰ ਦਾ ਇਹ ਲਗਾਤਾਰ ਦੂਜਾ ਬਜਟ ਹੋਵੇਗਾ।
ਸੂਤਰਾਂ ਅਨੁਸਾਰ ਇਸ ਬਜਟ ਦਾ ਆਕਾਰ ਪਿਛਲੇ ਸਾਲ ਦੇ ਬਜਟ ਨਾਲੋਂ ਲਗਭਗ 10 ਫ਼ੀ ਸਦੀ ਵੱਧ ਹੋਣ ਦੀ ਉਮੀਦ ਹੈ। ਜ਼ਿਕਰਯੋਗ ਹੈ ਕਿ ਚਾਲੂ ਵਿੱਤੀ ਸਾਲ ਲਈ 28 ਵੱਡੇ ਮਹਿਕਮਿਆਂ ਨਾਲ ਸਬੰਧਤ ਅਨੁਪੂਰਕ ਮੰਗਾ ਕਲ ਪਾਸ ਕਰ ਦਿਤੀਆਂ ਅਤੇ 1647 ਕਰੋੜ ਦਾ ਨਮਿੱਤਣ ਬਿਲ, ਬਿਨਾਂ ਬਹਿਸ ਪਾਸ ਕਰ ਦਿਤਾ ਗਿਆ। ਵਿੱਤ ਮੰਤਰੀ ਅਨੁਸਾਰ ਇਨ੍ਹਾਂ ਬਜਟ ਤਜਵੀਜ਼ਾਂ ਵਿਚ ਸਪੈਸ਼ਲ ਧਿਆਨ ਖੇਤੀਬਾੜੀ, ਕਿਸਾਨੀ ਕਰਜ਼ਾ ਮਾਫ਼ ਕਰਨ, ਰੁਜ਼ਗਾਰ ਦੇ ਮੌਕੇ ਵਧਾਉਣ, ਇੰਡਸਟਰੀ ਨੂੰ ਪੰਜ ਰੁਪਏ ਪ੍ਰਤੀ ਯੂਨਿਟ ਬਿਜਲੀ ਦੇਣ ਅਤੇ ਹੋਰ ਸਹੂਲਤਾਂ ਮੁਹੱਈਆ ਕਰਾਉਣ ਵਲ ਦਿਤਾ ਜਾਵੇਗਾ। ਸਰਕਾਰੀ ਸੂਤਰਾਂ ਮੁਤਾਬਕ ਚੋਣਾਂ ਵੇਲੇ ਕਾਂਗਰਸ ਪਾਰਟੀ ਵਲੋਂ ਕੀਤੇ ਵਾਅਦਿਆਂ ਨੂੰ ਇਕ ਇਕ ਕਰ ਕੇ ਸਿਰੇ ਚਾੜ੍ਹਨ ਦਾ ਉਪਰਾਲਾ ਕੀਤਾ ਜਾਵੇਗਾ।ਜ਼ਿਕਰਯੋਗ ਹੈ ਕਿ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੇ ਕਈ ਵਾਰ ਦੁਹਰਾਇਆ ਹੈ ਕਿ ਪੰਜਾਬ ਦੀ ਵਿੱਤੀ ਹਾਲਤ ਸੰਕਟਮਈ ਹੈ ਅਤੇ ਇਸ ਨੂੰ ਲੀਹ 'ਤੇ ਲਿਆਉਣ ਲਈ ਅਜੇ 4 ਸਾਲ ਹੋਰ ਲੱਗਣਗੇ।
ਅੱਜ ਪੇਸ਼ ਕੀਤੇ ਜਾਣ ਵਾਲੇ ਬਜਟ ਪ੍ਰਸਤਾਵਾਂ 'ਚ ਪਿਛਲੇ ਵਿੱਤੀ ਘਾਟੇ ਅਤੇ ਮਾਲੀਆ ਘਾਟੇ ਯਾਨੀ ਸੂਬੇ ਦੀ ਆਮਦਨ ਤੇ ਖ਼ਰਚਿਆਂ ਵਿਚ ਪਏ ਵੱਡੇ ਪਾੜ ਨੂੰ ਨੇੜੇ ਲਿਆਉਣ 'ਤੇ ਤਜਵੀਜ਼ਾਂ ਦਿਤੀਆਂ ਜਾਣਗੀਆਂ।
Captain Amarinder Singh
ਇਨ੍ਹਾਂ ਪ੍ਰਸਤਾਵਾਂ 'ਚ ਨਾ ਤਾਂ ਕੋਈ ਨਵਾਂ ਟੈਕਸ ਲਗਾਉਣ ਦੀ ਤਜਵੀਜ਼ ਹੈ ਅਤੇ ਨਾ ਹੀ ਸਰਕਾਰੀ ਮੁਲਾਜ਼ਮਾਂ ਨੂੰ ਡੀ.ਏ. ਦੀ ਬਣਦੀ ਕਿਸ਼ਤ ਦੇਣ ਦੀ ਆਸ ਹੈ। ਇਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਪਿਛਲੇ ਸਾਲ ਦੇ ਬਜਟ ਪ੍ਰਸਤਾਵਾਂ 'ਚ ਲਗਭਗ 17 ਹਜ਼ਾਰ ਕਰੋੜ ਦੇ ਬਕਾਇਆ ਬਿਲ ਯਾਨੀ ਅਦਾਇਗੀਆਂ ਦਾ ਜ਼ਿਕਰ ਸੀ। ਐਤਕੀਂ ਇਹ ਅਦਾਇਗੀਆਂ ਦੇ ਬਿਲ ਲਗਭਗ 10 ਹਜ਼ਾਰ ਕਰੋੜ ਦੇ ਪੈਂਡਿੰਗ ਵਿਖਾਏ ਜਾਣਗੇ।ਅਕਾਲੀ ਦਲ 'ਚੋਂ ਕਾਂਗਰਸ ਪਾਰਟੀ 'ਚ ਆਉਣ ਉਪਰੰਤ ਗਿੱਦੜਬਾਹਾ ਹਲਕੇ ਦੀ ਥਾਂ ਬਠਿੰਡਾ ਸੀਟ ਤੋਂ ਕਾਂਗਰਸ ਟਿਕਟ 'ਤੇ ਜਿੱਤ ਕੇ 16 ਮਾਰਚ 2017 ਨੂੰ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦਾ ਲਗਾਤਾਰ ਇਹ ਦੂਜਾ ਬਜਟ ਹੈ। ਇਨ੍ਹਾਂ ਬਜਟ ਪ੍ਰਸਤਾਵਾਂ 'ਤੇ 27 ਮਾਰਚ ਨੂੰ ਸਵੇਰੇ ਤੇ ਸ਼ਾਮ ਦੋ ਬੈਠਕਾਂ 'ਚ ਬਹਿਸ ਹੋਵੇਗੀ ਅਤੇ ਅਗਲੇ ਦਿਨ ਦੀ 28 ਮਾਰਚ ਦੀ ਬੈਠਕ 'ਚ ਇਹ ਬਜਟ ਪ੍ਰਸਤਾਵ ਪਾਸ ਕਰ ਦਿਤੇ ਜਾਣਗੇ।ਇਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਪੰਜਾਬ ਸਿਰ ਕਰਜ਼ੇ ਦੀ ਪੰਡ ਦਾ ਭਾਰ ਵੱਧ ਕੇ 2,08,000 ਕਰੋੜ ਦਾ ਹੋ ਚੁੱਕਾ ਹੈ ਅਤੇ ਹੋਰ ਕਰਜ਼ਾ ਚੁੱਕਣਾ ਸਰਕਾਰ ਦੇ ਵਿੱਤ ਤੋਂ ਬਾਹਰ ਹੈ।
