ਅਟਾਰੀ ਵਾਹਗਾ ਬਾਰਡਰ ਦੀ ਜ਼ੀਰੋ ਲਾਈਨ ‘ਤੇ ਪਾਕਿਸਤਾਨ ਰੇਂਜਰਸ ਵਲੋਂ ਅਮਰਜੀਤ ਨੂੰ ਬੀ.ਐਸ.ਐਫ ਦੇ ਹਵਾਲੇ ਕੀਤਾ ਹੈ।
ਅੰਮ੍ਰਿਤਸਰ : ਭਾਰਤ ਤੋਂ ਪਾਕਿਸਤਾਨ ਧਾਰਮਕ ਅਸਥਾਨਾਂ ਦੇ ਦਰਸ਼ਨਾਂ ਲਈ ਗਏ ਜਥੇ ਵਿਚੋਂ ਪਹਿਲਾਂ ਗੜ੍ਹਸ਼ੰਕਰ ਦੀ ਕਿਰਨ ਬਾਲਾ ਦੇ ਗਾਇਬ ਹੋਣ ਦੀ ਖ਼ਬਰ ਨਾਲ ਭਾਰਤ ਪਾਕਿ ਦੀ ਸਿਆਸਤ ‘ਚ ਭੁਚਾਲ ਉਠਿਆ ‘ਤੇ ਮਗਰੋਂ ਅਮਰਜੀਤ ਸਿੰਘ ਦੇ ਪਾਕਿਸਤਾਨ ਵਿਚ ਲਾਪਤਾ ਹੋਣ ਦੀ ਖ਼ਬਰ ਸਾਹਮਣੇ ਆਈ।
ਕਿਰਨ ਬਾਲਾ ਦੇ ਸਹੁਰੇ ਪਰਿਵਾਰ ਵਲੋਂ ਜਦੋਂ ਕਿਰਨ ਬਾਲਾ ਦੇ ਲਾਪਤਾ ਹੋਣ ਮੁੱਦਾ ਚੁਕਿਆ ਤਾਂ ਪਤਾ ਚਲਿਆ ਕਿ ਕਿਰਨ ਬਾਲਾ ਨੇ ਪਾਕਿਸਤਾਨ ਵਿਚ ਅਪਣਾ ਧਰਮ ਬਦਲ ਕੇ ਪਾਕਿਸਤਾਨੀ ਵਿਅਕਤੀ ਨਾਲ ਵਿਆਹ ਕਰਵਾ ਲਿਆ ਹੈ। ਇਸ ਸਬੰਧੀ ਕਿਰਨ ਬਾਲਾ ਨੇ ਸੋਸ਼ਲ ਮੀਡੀਆ ‘ਤੇ ਅਪਣੇ ਪਤੀ ਨਾਲ ਵੀਡੀਓ ਸਾਂਝੀ ਵੀ ਕੀਤੀ। ਵੀਡੀਓ ਸਾਂਝੀ ਕਰਦਿਆਂ ਕਿਹਾ ਕਿ ਉਸ ਨੇ ਅਪਣੀ ਮਰਜ਼ੀ ਨਾਲ ਧਰਮ ਪਰਿਵਰਤਨ ਕੀਤਾ ਹੈ ਅਤੇ ਉਹ ਅਪਣੀ ਮਰਜ਼ੀ ਨਾਲ ਹੀ ਇਥੇ ਰਹਿ ਰਹੀ ਹਾਂ ਤੇ ਰਹਿਣਾ ਚਾਹੁੰਦੀ ਹਾਂ।
ਇਸ ਮਗਰੋਂ ਮਾਮਲਾ ਉਸ ਵੇਲੇ ਹੋਰ ਭਖ ਗਿਆ ਜਦੋਂ ਜਥੇ ਨਾਲ ਗਏ ਅਮਰਜੀਤ ਸਿੰਘ ਦੇ ਵੀ ਪਾਕਿਸਤਾਨ ਵਿਚ ਲਾਪਤਾ ਹੋਣ ਦੀ ਖ਼ਬਰ ਆਈ। ਜਦੋਂ ਉਸਦੇ ਲਾਪਤਾ ਹੋਣ ਦੀ ਖ਼ਬਰ ਮਿਲੀ ਤਾਂ ਪਤਾ ਚਲਿਆ ਕਿ ਸਿੱਖ ਜਥੇ ‘ਚੋਂ ਗ਼ਾਇਬ ਹੋਏ ਅਮਰਜੀਤ ਸਿੰਘ ਨੂੰ ਪਾਕਿਸਤਾਨ ਦੀ ਸੁਰੱਖਿਆ ਏਜੇਂਸੀਆਂ ਨੇ ਗ੍ਰਿਫ਼ਤਾਰ ਕਰ ਲਿਆ ਸੀ। ਜਦੋਂ ਅਮਰਜੀਤ ਤੋਂ ਇਸ ਸਬੰਧੀ ਪੁਛ ਗਿੱਛ ਕੀਤੀ ਗਈ ਤਾਂ ਅਮਰਜੀਤ ਸਿੰਘ ਨੇ ਕਿਹਾ ਕਿ ਉਹ ਪਾਕਿਸਤਾਨ ਦੇ ਹੀ ਸ਼ੇਖ਼ੂਪੁਰਾ ਵਿਚ ਅਪਣੇ ਦੋਸਤ ਕੋਲ ਚਲਿਆ ਗਿਆ ਸੀ ਅਤੇ ਓਥੇ ਹੀ ਰੁਕ ਗਿਆ ਸੀ।
ਪਾਕਿਸਤਾਨ ਵਿਚ ਵਿਸਾਖੀ ਮਨਾਉਣ ਗਿਆ ਸਿੱਖ ਜਥੇ ‘ਚੋਂ ਲਾਪਤਾ ਹੋਇਆ ਅਮਰਜੀਤ ਸਿੰਘ ਆਖ਼ਿਰਕਾਰ ਅਪਣੇ ਵਤਨ ਪਰਤ ਹੀ ਆਇਆ। ਅਮਰਜੀਤ ਸਿੰਘ ਨੂੰ ਦੁਪਹਿਰੇ 3.45 ‘ਤੇ ਪਾਕਿਸਤਾਨੀ ਰੇਂਜਰਾ ਦੁਆਰਾ ਬੀ.ਐਸ.ਐਫ. ਦੇ ਹਵਾਲੇ ਕਰ ਦਿਤਾ ਗਿਆ ਸੀ। ਉਸ ਨੂੰ ਲੈਣ ਲਈ ਉਸ ਦੇ ਪਰਵਾਰਕ ਮੈਂਬਰ ਸਵੇਰੇ 9 ਵਜੇ ਤੋਂ ਅਟਾਰੀ ਪਹੁੰਚੇ ਹੋਏ ਸਨ। ਅਟਾਰੀ ਵਾਹਗਾ ਬਾਰਡਰ ਦੀ ਜ਼ੀਰੋ ਲਾਈਨ ‘ਤੇ ਪਾਕਿਸਤਾਨ ਰੇਂਜਰਸ ਵਲੋਂ ਅਮਰਜੀਤ ਨੂੰ ਬੀ.ਐਸ.ਐਫ ਦੇ ਹਵਾਲੇ ਕੀਤਾ ਹੈ।