ਭਾਜਪਾ-ਕਾਂਗਰਸ ਨੇ ਮਿਲ ਕੇ ਹਿਮਾਚਲ ਪ੍ਰਦੇਸ਼ ਨੂੰ  ਲੁਟਿਆ ਤੇ ਅੱਜ ਗਾਲ੍ਹਾਂ ਮੈਨੂੰ ਕੱਢ ਰਹੇ ਨੇ : ਅਰਵਿੰਦ ਕੇਜਰੀਵਾਲ

ਨਵੀਂ ਦਿੱਲੀ, 23 ਅਪ੍ਰੈਲ : ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਹਿਮਾਚਲ ਪ੍ਰਦੇਸ਼ ਦੇ ਕਾਂਗੜਾ ਵਿਚ ਇਕ ਵਿਸ਼ਾਲ ਰੈਲੀ ਨੂੰ  ਸੰਬੋਧਨ ਕਰਦੇ ਹੋਏ ਭਾਜਪਾ ਅਤੇ ਕਾਂਗਰਸ ਉੱਤੇ ਤਿੱਖੇ ਹਮਲੇ ਬੋਲੇ | ਉਨ੍ਹਾਂ ਕਿਹਾ ਕਿ ਭਾਜਪਾ-ਕਾਂਗਰਸ ਨੇ ਮਿਲ ਕੇ ਸੂਬੇ ਨੂੰ  ਲੁੱਟਿਆ ਤੇ ਹੁਣ ਮਿਲ ਕੇ ਮੈਨੂੰ ਗਾਲ੍ਹਾਂ ਕੱਢ ਰਹੇ ਹਨ |  'ਆਪ' ਆਗੂ ਨੇ ਕਿਹਾ ਕਿ ਅਸੀਂ ਹਿਮਾਚਲ ਨੂੰ  ਦੇਵਭੂਮੀ ਕਹਿੰਦੇ ਹਾਂ, ਇਹ ਦੇਵਤਿਆਂ ਦੀ ਧਰਤੀ ਹੈ, ਜਦੋਂ ਪ੍ਰਮਾਤਮਾ ਸੰਸਾਰ ਦੀ ਰਚਨਾ ਕਰ ਰਿਹਾ ਸੀ ਤਾਂ ਉਸ ਨੇ ਹਿਮਾਚਲ ਪ੍ਰਦੇਸ਼ ਨੂੰ  ਪੂਰੀ ਦੁਨੀਆਂ ਵਿਚ ਸੱਭ ਤੋਂ ਸੋਹਣਾ ਸਥਾਨ ਬਣਾਇਆ, ਪ੍ਰਮਾਤਮਾ ਨੇ ਦਿਲ ਖੋਲ੍ਹ ਦਿਤਾ ਪਰ ਕਾਂਗਰਸ ਅਤੇ ਭਾਜਪਾ ਵਾਲਿਆਂ ਨੇ ਹਿਮਾਚਲ ਪ੍ਰਦੇਸ਼ ਨੂੰ  ਲੁੱਟਣ ਵਿਚ ਕੋਈ ਕਸਰ ਬਾਕੀ ਨਹੀਂ ਛੱਡੀ, ਕਾਂਗਰਸ ਨੇ 30 ਸਾਲ ਰਾਜ ਕੀਤਾ ਹੈ ਅਤੇ ਭਾਜਪਾ ਨੇ 17 ਸਾਲ ਰਾਜ ਕੀਤਾ ਹੈ |
ਹਿਮਾਚਲ ਦੇ ਮੁੱਖ ਮੰਤਰੀ ਜੈ ਰਾਮ ਠਾਕੁਰ 'ਤੇ ਹਮਲਾ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਜੈ ਰਾਮ ਠਾਕੁਰ ਟਵੀਟ ਕਰ ਕੇ ਕਹਿੰਦੇ 
ਹਨ ਕਿ ਦਿੱਲੀ ਮਾਡਲ ਨਹੀਂ ਚੱਲੇਗਾ, ਦਿੱਲੀ ਮਾਡਲ ਦਾ ਮਤਲਬ ਇਮਾਨਦਾਰ ਸਰਕਾਰ ਹੈ, ਤਾਂ ਕੀ ਹਿਮਾਚਲ 'ਚ ਇਮਾਨਦਾਰ ਸਰਕਾਰ ਨਹੀਂ ਬਣ ਸਕਦੀ? ਮੈਂ ਪੁੱਛਿਆ ਕਿਉਂ ਅਤੇ ਉਨ੍ਹਾਂ ਕਿਹਾ ਕਿ ਹਿਮਾਚਲ ਦੇ ਰਾਜਨੀਤਕ ਅਤੇ ਸਮਾਜਕ ਹਾਲਾਤ ਵੱਖਰੇ ਹਨ, ਮੈਂ ਕਿਹਾ ਕਿ ਤੁਹਾਡੀ ਨੀਅਤ ਖ਼ਰਾਬ ਹੈ | ਕੇਜਰੀਵਾਲ ਨੇ ਕਿਹਾ ਕਿ ਮੈਨੂੰ ਰਾਜਨੀਤੀ ਕਰਨੀ ਨਹੀਂ ਆਉਂਦੀ, ਮੈਂ ਕੱਟੜ ਦੇਸ਼ ਭਗਤ ਅਤੇ ਇਮਾਨਦਾਰ ਆਦਮੀ ਹਾਂ, ਅਸੀਂ ਅੰਨਾ ਅੰਦੋਲਨ ਤੋਂ ਨਿਕਲੀ ਹੋਈ ਪਾਰਟੀ ਹਾਂ | ਦਿੱਲੀ ਦੇ ਲੋਕਾਂ ਨੇ ਮੌਕਾ ਦਿਤਾ ਹੈ, ਤੁਹਾਡੇ ਰਿਸ਼ਤੇਦਾਰ ਦਿੱਲੀ 'ਚ ਹੋਣਗੇ, ਉਨ੍ਹਾਂ ਨੂੰ  ਪੁੱਛੋ ਕਿ ਸਕੂਲ ਕਿਵੇਂ ਦੇ ਹਨ | 
ਜੈ ਰਾਮ ਠਾਕੁਰ ਨੂੰ  ਲੰਮੇ ਹੱਥੀਂ ਲੈਂਦਿਆਂ ਕੇਜਰੀਵਾਲ ਨੇ ਕਿਹਾ ਕਿ ਜੈ ਰਾਮ ਠਾਕੁਰ ਨੂੰ  ਜਿਵੇਂ ਹੀ ਪਤਾ ਲੱਗਾ ਕਿ ਮੈਂ ਹਿਮਾਚਲ ਆ ਰਿਹਾ ਹਾਂ | ਨਕਲ ਕਰ ਕੇ 125 ਯੂਨਿਟ ਬਿਜਲੀ ਮੁਫ਼ਤ ਦੇਣ ਦਾ ਐਲਾਨ ਕਰ ਦਿਤਾ | ਇਸ ਤੋਂ ਬਾਅਦ ਉਨ੍ਹਾਂ ਨੂੰ  ਮੋਦੀ ਜੀ ਦਾ ਫੋਨ ਆਇਆ ਕਿ ਖ਼ਬਰਦਾਰ ਜੇ ਦੁਬਾਰਾ ਮੁਫ਼ਤ ਬਿਜਲੀ ਦੀ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਸਿਰਫ਼ ਚੋਣਾਂ ਤਕ ਹੀ ਮੁਫ਼ਤ ਬਿਜਲੀ ਦੇਵਾਂਗੇ | 
ਅਰਵਿੰਦ ਕੇਜਰੀਵਾਲ ਨੇ ਵਿਅੰਗ ਕਸਦਿਆਂ ਕਿਹਾ ਕਿ ਇਕ ਇਮਤਿਹਾਨ ਚੱਲ ਰਿਹਾ ਸੀ, ਅੱਗੇ ਇਕ ਬੱਚਾ ਕੇਜਰੀਵਾਲ ਬੈਠਾ ਸੀ, ਪਿੱਛੇ ਜੈ ਰਾਮ ਠਾਕੁਰ | ਕੇਜਰੀਵਾਲ ਨੇ ਲਿਖਿਆ ਕਿ 300 ਯੂਨਿਟ ਬਿਜਲੀ ਮੁਫ਼ਤ, ਜੈ ਰਾਮ ਨੇ ਲਿਖਿਆ ਕਿ 125 ਯੂਨਿਟ ਮੁਫ਼ਤ | ਉਨ੍ਹਾਂ ਕਿਹਾ ਕਿ ਨਕਲ ਕਰਨ ਲਈ ਵੀ ਅਕਲ ਚਾਹੀਦੀ ਹੈ |     (ਏਜੰਸੀ)