5 ਬੱਚੇ ਆਲੀਸ਼ਾਨ ਘਰਾਂ 'ਚ ਤੇ ਮਾਂ ਸੜਕਾਂ 'ਤੇ ਦਿਨ ਕੱਟਣ ਲਈ ਮਜਬੂਰ

ਅੰਮ੍ਰਿਤਸਰ, 24 ਅਗੱਸਤ (ਪਪ) : ਬੀਤੇ ਦਿਨੀ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਅਫ਼ਸਰਾਂ ਦੀ ਲਵਾਰਿਸ ਹਾਲਤ ਵਿਚ ਰਹਿ ਰਹੀ ਮਾਂ ਦੀ ਕਹਾਣੀ ਨੇ ਸਮਾਜ ਦੀ ਲੁਕਵੀਂ ਸਚਾਈ ਨੂੰ ਸਾਹਮਣੇ ਲਿਆਂਦਾ ਸੀ। ਇਨਸਾਨੀਅਤ ਨੂੰ ਸ਼ਰਮਸ਼ਾਰ ਕਰਨ ਵਾਲੇ ਮਾਂ ਦੇ ਪੁੱਤਾਂ ਦੀ ਚਾਰੇ ਪਾਸੇ ਨਿੰਦਿਆ ਹੋਈ। ਹੁਣ ਇਸਦੇ ਨਾਲ ਹੀ ਇਕ ਹੋਰ ਮਾਂ ਦੀ ਮਨੁੱਖਤਾ ਨੂੰ ਝੰਜੋੜਨ ਵਾਲੀ ਸਟੋਰੀ ਸਾਹਮਣੇ ਆਈ ਹੈ। ਅੰਮ੍ਰਿਤਸਰ  ਦੇ ਪ੍ਰੀਤ ਨਗਰ ਵਿਚ ਰਹਿ ਰਹੀ ਇਸ ਮਾਂ ਦੇ 5 ਬੱਚੇ ਆਲੀਸ਼ਾਨ ਘਰਾਂ ਵਿਚ ਰਹਿੰਦੇ ਹਨ ਤੇ ਮਾਂ ਨੂੰ ਸੜਕਾਂ 'ਤੇ ਰੁਲਣ ਲਈ ਛੱਡ ਦਿਤਾ ਹੈ। ਬੱਚਿਆਂ ਕੋਲ ਅਪਣੀ ਮਾਂ ਨੂੰ ਆਲੀਸ਼ਾਨ ਘਰਾਂ ਵਿਚ ਰਹਿਣ ਲਈ ਥਾਂ ਹੀ ਨਹੀਂ ਹੈ। ਅੰਮ੍ਰਿਤਸਰ ਦੇ ਬਟਾਲਾ ਰੋਡ ਸਥਿਤ ਪ੍ਰੀਤ ਨਗਰ ਵਿਚ ਦੁਕਾਨ ਦੇ ਅੰਦਰ ਬੈਠੀ ਇਸ ਬੇਸਹਾਰਾ ਮਾਂ ਦਾ ਨਾਮ ਗੁਰਦੀਪ ਕੌਰ ਹੈ। ਗੁਰਦੀਪ ਕੌਰ ਪਿਛਲੇ 15 ਸਾਲਾਂ ਵਲੋਂ ਇਸ ਦੁਕਾਨ ਵਿਚ ਰਹਿੰਦੀ ਹੈ। ਗੁਰਦੀਪ ਕੌਰ ਦੇ ਮੁਤਾਬਕ ਉਹ ਇਥੇ ਰਹਿੰਦੀ ਹੈ ਅਤੇ ਉਸਦੇ ਬੱਚੇ ਇਸਦੇ ਬਾਵਜੂਦ ਵੀ ਚੰਗੇ ਹੈ। ਉਹ ਉਸਦਾ ਖਿਆਲ ਰਖਦੇ ਹਨ। ਇਹ ਹੈ ਇਕ ਮਾਂ ਦਾ ਦਿਲ, ਜਿਸਨੂੰ ਦੁੱਖ ਦੇਣ ਦੇ ਬਾਅਦ ਵੀ ਉਹ ਅਪਣੇ ਬੱਚਿਆਂ ਵਿਰੁਧ ਇਕ ਸ਼ਬਦ ਨਹੀਂ ਸੁਣਨਾ ਚਾਹੁੰਦੀ ਅਤੇ ਨਾ ਹੀ ਉਨ੍ਹਾਂ ਵਿਰੁਧ ਕੁੱਝ ਬੋਲਣਾ ਚਾਹੁੰਦੀ ਹੈ। ਅੰਮ੍ਰਿਤਸਰ ਵਿਚ ਸੜਕਾਂ ਉੱਤੇ ਰਹਿ ਰਹੀ ਇਕ ਮਾਂ ਦੀ ਤਰਸਯੋਗ ਹਾਲਤ ਬਾਰੇ ਪਤਾ ਲੱਗਣ ਤੋਂ ਬਾਅਦ ਲੁਧਿਆਣਾ ਦੀ ਸਮਾਜ ਸੇਵੀ ਸੰਸਥਾ ਇਸ ਬੇਸਹਾਰਾ ਮਾਂ ਨੂੰ ਅਪਣੇ ਨਾਲ ਲੈ ਗਈ। ਸਮਾਜ ਸੇਵੀ ਸੰਸਥਾ ਦਾ ਕਹਿਣਾ ਹੈ ਕਿ ਜਦੋਂ ਉਨ੍ਹਾਂ ਨੂੰ ਇਸ ਮਾਂ ਬਾਰੇ ਪਤਾ ਚਲਿਆ ਤਾਂ ਉਨ੍ਹਾਂ ਨੇ ਇਨ੍ਹਾਂ ਦੇ ਬਚਿਆਂ ਨਾਲ ਸੰਪਰਕ ਕੀਤਾ ਪਰ ਉਨ੍ਹਾਂ ਨੇ ਇਸਨੂੰ ਲਿਜਾਣ ਤੋਂ ਮਨਾ ਕਰ ਦਿਤਾ। ਉਹ ਇਸ ਮਾਂ ਨੂੰ ਅਪਣੇ ਨਾਲ ਲੈ ਕੇ ਜਾ ਰਹੇ ਹਨ ਅਤੇ ਇਸਨੂੰ ਆਪਣੇ ਆਸ਼ਰਮ ਵਿਚ ਰੱਖ ਕਰ ਇਸਦੀ ਸੇਵਾ ਕਰਣਗੇ।