ਨਸ਼ਾ ਛੁਡਾਊ ਕੇਂਦਰ ਦਾ ਹੈੱਡ ਬਣਾਇਆ ਸੀ ਅਨਪੜ੍ਹ ਨੌਜਵਾਨ
ਅੰਮ੍ਰਿਤਸਰ (ਸ਼ੈਸ਼ਵ ਨਾਗਰਾ, ਵੀਰਪਾਲ ਕੌਰ) - ਵਾਰਿਸ ਪੰਜਾਬ ਜਥੇਬੰਦੀ ਦੇ ਮੁਖੀ ਅੰਮ੍ਰਿਤਪਾਲ ਸਿੰਘ ਬਾਰੇ ਆਏ ਦਿਨ ਕੋਈ ਨਾ ਕੋਈ ਨਵਾਂ ਖੁਲਾਸਾ ਹੋ ਰਿਹਾ ਹੈ। ਇਸ ਮਾਮਲੇ ਨੂੰ ਲੈ ਕੇ ਸਪੋਕਸਮੈਨ ਦੇ ਪੱਤਰਕਾਰ ਨੇ ਐਸਪੀ ਤੇਜਬੀਰ ਸਿੰਘ ਨਾਲ ਖਾਸ ਗੱਲਬਾਤ ਕੀਤੀ ਜੋ ਕਿ ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਹਨ। ਤੇਜਬੀਰ ਸਿੰਘ ਨੇ ਇਸ ਮਾਮਲੇ ਵਿਚ ਵੱਡਾ ਖੁਲਾਸਾ ਕਰਦੇ ਹੋਏ ਦੱਸਿਆ ਕਿ ਅੰਮ੍ਰਿਤਪਾਲ ਸਿੰਘ ਨਸ਼ਾ ਮੁਕਤੀ ਕੇਂਦਰ ਦੀ ਆੜ ਵਿਚ ਆਪਣੀ ਇਕ ਫੌਜ ਤਿਆਰ ਕਰ ਰਿਹਾ ਸੀ।
ਐੱਸਪੀ ਤੇਜਬੀਰ ਸਿੰਘ ਨੇ ਦੱਸਿਆ ਕਿ ਇਕ ਡਾਕਟਰ ਜਿਸ ਨੇ ਫਾਰਮੈਸੀ ਕੀਤੀ ਹੋਈ ਸੀ ਜਦੋਂ ਉਸ ਕੋਲੋਂ ਪੁੱਛਗਿੱਛ ਕੀਤੀ ਗਈ ਤਾਂ ਉਸ ਨੇ ਦੱਸਿਆ ਕਿ ਉਹ ਅੰਮ੍ਰਿਤਪਾਲ ਨੂੰ ਦਵਾਈਆਂ ਮੁਹੱਈਆ ਕਰਵਾਉਂਦਾ ਸੀ ਤੇ ਇਹ ਡਾਕਟਰ ਵਹੀਰ ਤੋਂ ਇਹਨਾਂ ਦੇ ਨਾਲ ਜੁੜਿਆ ਸੀ। ਤੇਜਬੀਰ ਸਿੰਘ ਨੇ ਦੱਸਿਆ ਕਿ ਜਦੋਂ ਵਹੀਰ ਖ਼ਤਮ ਹੋਈ ਤਾਂ ਅੰਮ੍ਰਿਤਪਾਲ ਵੱਲੋਂ ਡਾਕਟਰ ਨੂੰ ਕਾਲ ਆਈ ਤੇ ਉਸ ਨੂੰ ਡੇਰੇ ਆਉਣ ਲਈ ਕਿਹਾ ਗਿਆ ਤੇ ਗੱਲਬਾਤ ਦੌਰਾਨ ਉਹਨਾਂ ਨੇ ਡਾਕਟਰ ਨੂੰ ਕਿਹਾ ਕਿ ਉਹਨਾਂ ਦੇ ਜਿਹੜੇ ਨੌਜਵਾਨ ਨਸ਼ਾ ਛੱਡਦੇ ਹਨ ਉਹਨਾਂ ਨੂੰ ਦਵਾਈ ਦਿੱਤੀ ਜਾਵੇ ਤਾਂ ਡਾਕਟਰ ਨੇ ਉਹਨਾਂ ਨੂੰ ਕਿਹਾ ਕਿ ਉਹ ਕੋਈ ਨਸ਼ੇ ਛੱਡਣ ਦੀ ਦਵਾਈ ਨਹੀਂ ਦਿੰਦਾ ਬਲਕਿ ਉਹ ਸਿਰਫ਼ ਕਿਸੇ ਨੂੰ ਬੁਖਾਰ, ਖੰਘ ਜ਼ੁਕਾਮ ਆਦਿ ਦੀ ਦਵਾਈ ਦਿੰਦਾ ਹੈ।
ਐੱਸਪੀ ਤੇਜਬੀਰ ਸਿੰਘ ਨੇ ਦੱਸਿਆ ਕਿ ਜਾਂਚ ਵਿਚ ਉਹਨਾਂ ਨੂੰ ਪਤਾ ਲੱਗਿਆ ਕਿ ਨਸ਼ਾ ਛਡਾਊ ਕੇਂਦਰ ਵਿਚ ਕੋਈ ਵੀ ਪ੍ਰੋਫੈਸ਼ਨਲ ਡਾਕਟਰ ਨਹੀਂ ਸੀ। ਜੋ ਡਾਕਟਰ ਉਹਨਾਂ ਨੇ ਫੜਿਆ ਹੈ, ਉਹ ਵੀ ਅਪਣੇ ਲਾਲਚ ਕਰ ਕੇ ਉਹਨਾਂ ਨਾਲ ਜੁੜ ਗਿਆ ਕਿਉਂਕਿ ਉਸ ਦੀ ਵੀ ਦਵਾਈਆਂ ਦੀ ਸੇਲ ਵਧ ਗਈ ਸੀ। ਡਾਕਟਰ ਨੇ ਉਹਨਾਂ ਨੂੰ ਦੱਸਿਆ ਕਿ ਉਹ ਸਿਰਫ਼ ਅਪਣੀਆਂ ਧਾਰਮਿਕ ਭਾਵਨਾਵਾਂ ਕਰ ਕੇ ਉਹਨਾਂ ਨਾਲ ਜੁੜਿਆ ਸੀ ਬਾਕੀ ਉਸ ਕੋਲ ਅਜਿਹੀਆਂ ਨਸ਼ਾ ਛੱਡਣ ਵਾਲੀਆਂ ਕੋਈ ਦਵਾਈਆਂ ਨਹੀਂ ਹਨ, ਉਹ ਸਿਰਫ਼ ਸਿਰ ਪੀੜ ਜਾਂ ਪੇਟ ਦਰਦ ਦੀ ਹੀ ਦਵਾਈ ਦਿੰਦਾ ਸੀ।
ਤੇਜਬੀਰ ਸਿੰਘ ਨੇ ਦੱਸਿਆ ਕਿ ਇਸ ਵਿਚ ਇਕ ਬਿਲਕੁਲ ਅਨਪੜ੍ਹ ਲੜਕਾ ਬਸਤੰ ਸਿੰਘ ਸੀ ਜਿਸ ਨੂੰ ਉਹਨਾਂ ਨੇ ਹੈੱਡ ਬਣਾਇਆ ਸੀ। ਉਹਨਾਂ ਦੱਸਿਆ ਕਿ ਬਸੰਤ ਸਿੰਘ ਘਰੋਂ ਕੱਢਿਆ ਹੋਇਆ ਸੀ ਤੇ 6 ਮਹੀਨੇ ਤੋਂ ਡੇਰੇ ਨਾਲ ਜੁੜਿਆ ਹੋਇਆ ਸੀ ਤੇ ਅੰਮ੍ਰਿਤਪਾਲ ਦੇ ਸਾਥੀਆਂ ਨੇ ਉਸ ਨੂੰ ਡੇਰੇ ਵਿਚੋਂ ਵੀ ਕੱਢ ਦਿੱਤਾ ਸੀ ਪਰ ਉਹ ਦੁਬਾਰਾ ਫਿਰ ਉਹਨਾਂ ਨਾਲ ਜੁੜ ਗਿਆ। ਤੇਜਬੀਰ ਸਿੰਘ ਨੇ ਦੱਸਿਆ ਕਿ ਉੱਥੋਂ ਬੱਚੇ ਭੱਜ ਵੀ ਜਾਂਦੇ ਸਨ ਕਿਉਂਕਿ ਕਦੇ-ਕਦੇ ਉਹਨਾਂ ਨਾਲ ਕੁੱਟਮਾਰ ਕੀਤੀ ਜਾਂਦੀ ਸੀ ਤਾਂ ਬੱਚੇ ਡਰਦੇ ਮਾਰੇ ਭੱਜ ਜਾਂਦੇ ਸਨ।