ਪਿਛਲੇ ਤਿੰਨ ਦਿਨਾਂ ਤੋਂ ਮੁੱਖ ਮੰਤਰੀ ਤੇ ਉਨ੍ਹਾਂ ਦੇ ਚੀਫ਼ ਪ੍ਰਿੰਸੀਪਲ ਸਕੱਤਰ ਸੁਰੇਸ਼ ਕੁਮਾਰ ਵਿਚਾਲੇ ਚਲ ਰਹੀ
ਚੰਡੀਗੜ੍ਹ, 24 ਜੁਲਾਈ (ਜੀ.ਸੀ. ਭਾਰਦਵਾਜ) : ਪਿਛਲੇ ਤਿੰਨ ਦਿਨਾਂ ਤੋਂ ਮੁੱਖ ਮੰਤਰੀ ਤੇ ਉਨ੍ਹਾਂ ਦੇ ਚੀਫ਼ ਪ੍ਰਿੰਸੀਪਲ ਸਕੱਤਰ ਸੁਰੇਸ਼ ਕੁਮਾਰ ਵਿਚਾਲੇ ਚਲ ਰਹੀ ਨਾਰਾਜ਼ਗੀ ਅਤੇ ਗਿਲੇ-ਸ਼ਿਕਵੇ ਦੂਰ ਹੋ ਗਏ ਹਨ ਅਤੇ ਅੱਜ ਬਾਅਦ ਦੁਪਹਿਰ ਸੁਰੇਸ਼ ਕੁਮਾਰ ਨੇ ਸਰਕਾਰੀ ਫ਼ਾਈਲਾਂ ਤੇ ਕਾਗ਼ਜ਼-ਪੱਤਰ ਦੇਖਣੇ ਤੇ ਨਿਪਟਾਉਣੇ ਸ਼ੁਰੂ ਕਰ ਦਿਤੇ। 1983 ਬੈਚ ਦੇ ਸੇਵਾ ਮੁਕਤ ਆਈ.ਏ.ਐਸ. ਅਧਿਕਾਰੀ ਸੁਰੇਸ਼ ਕੁਮਾਰ ਨੇ ਪਿਛਲੇ ਮੰਗਲਵਾਰ ਤੋਂ ਸਰਕਾਰੀ ਕੰਮਕਾਜ ਕਰਨਾ ਬੰਦ ਕਰ ਦਿਤਾ ਸੀ।
ਸਟਾਫ਼-ਸੇਵਾਦਾਰਾਂ ਤੇ ਡਰਾਈਵਰ ਨੂੰ ਵਾਪਸ ਭੇਜ ਕੇ ਨਾਰਾਜ਼ਗੀ ਜ਼ਾਹਰ ਕੀਤੀ ਸੀ ਕਿ ਉੁਨ੍ਹਾਂ ਵਿਰੁਧ ਬਤੌਰ ਮੁੱਖ ਪ੍ਰਿੰਸੀਪਲ ਸਕੱਤਰ ਦੀ ਨਿਯੁਕਤੀ ਦਾ ਕੇਸ ਹਾਈ ਕੋਰਟ 'ਚ ਸਰਕਾਰੀ ਐਡਵੋਕੇਟ ਜਨਰਲ ਵਲੋਂ ਪੈਰਵੀ ਠੀਕ ਢੰਗ ਨਾਲ ਨਹੀਂ ਕੀਤਾ ਜਾ ਰਿਹਾ ਸੀ।
ਬੁਧਵਾਰ ਤੇ ਵੀਰਵਾਰ ਨੂੰ ਮੁੱਖ ਮੰਤਰੀ ਨਾਲ ਘੰਟਿਆਂਬੱਧੀ ਹੋਈ ਗੱਲਬਾਤ ਮਗਰੋਂ ਅੱਜ ਉੁਨ੍ਹਾਂ ਫਿਰ ਤੋਂ ਡਿਊਟੀ ਸੰਭਾਲ ਲਈ ਹੈ ਪਰ ਪਹਿਲਾਂ ਵਾਂਗ ਸੁਰੇਸ਼ ਕੁਮਾਰ ਅਪਣੀ ਨਿਜੀ ਰਿਹਾਇਸ਼ ਸੈਕਟਰ 16 ਅਤੇ ਪੰਜਾਬ ਭਵਨ ਤੋਂ ਹੀ ਕੰਮ ਕਰਨਗੇ। ਸਰਕਾਰੀ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਅਗਲੇ ਹਫ਼ਤੇ ਮੰਗਲਵਾਰ ਤੇ ਬੁਧਵਾਰ ਨੂੰ ਦੋ ਮੀਟਿੰਗਾਂ ਸਮੇਤ ਸੁਰੇਸ਼ ਕੁਮਾਰ ਹੋਰ ਸਰਕਾਰੀ ਕੰਮਕਾਜ ਵੀ ਨਿਪਟਾਉਣਗੇ। ਜ਼ਿਕਰਯੋਗ ਹੈ ਕਿ ਸਾਢੇ ਤਿੰਨ ਸਾਲ ਪਹਿਲਾਂ ਹੋਈ ਉੁਨ੍ਹਾਂ ਦੀ ਨਿਯੁਕਤੀ ਵਿਰੁਧ ਹਾਈ ਕੋਰਟ 'ਚ ਚਲ ਰਹੇ ਕੇਸ ਦੀ ਅਗਲੀ ਸੁਣਵਾਈ 14 ਸਤੰਬਰ ਨੂੰ ਹੈ।