ਗੁਰਦਾਸ ਮਾਨ ਵਿਰੁਧ ਕਰਾਂਗੇ ਸਖ਼ਤ ਕਾਰਵਾਈ, ਲਾਮਬੰਦ ਹੋਣਗੀਆਂ ਹੋਰ ਵੀ ਜਥੇਬੰਦੀਆਂ : ਰਣਜੀਤ ਸਿੰਘ ਕਾਹਲੋਂ

ਕਰਤਾਰਪੁਰ, 24 ਅਗੱਸਤ (ਜਨਕ ਰਾਜ ਗਿੱਲ): ਗੁਰਦਾਸ ਮਾਨ ਨੇ ਤਾਂ ਪਤਾ ਨਹੀਂ ਸਹੁੰ ਖਾਧੀ ਹੋਈ ਹੈ ਕਿ ਬੇਤੁਕੇ ਬਿਆਨ ਦੇ ਕੇ ਲੋਕਾਂ ਅਤੇ ਲੋਕਾਂ ਦੀਆਂ ਭਾਵਨਾਵਾਂ ਨਾਲ ਖਿਲਵਾੜ ਕਰਨ ਦੀ, ਕਿੳਂੁਕਿ ਪਹਿਲਾਂ ਮਾਂ ਬੋਲੀ ਪੰਜਾਬੀ ਵਿਰੁਧ ਵਰਤੀ ਗਈ ਭੱਦੀ ਸ਼ਬਦਾਬਲੀ ਬੋਲਕੇ ਪੰਜਾਬੀਅਤ ਅਤੇ ਸਾਡੀ ਮਹਾਨ ਵਿਰਾਸਤ ਦਾ ਵੱਡਾ ਅਪਮਾਨ ਕੀਤਾ ਹੈ ਅਤੇ ਦੂਜੇ ਪਾਸੇ ਇਹੋ ਬੇਗ਼ੈਰਤ ਗਾਇਕ ਜੋ ਅਪਣੇ ਆਪ ਨੂੰ ਗੁਰਾਂ ਦਾ ਦਾਸ ਕਹਿ ਰਿਹਾ ਹੈ, ਗੁਰਦਾਸ ਮਾਨ ਗੁਰੂ ਸਾਹਿਬਾਨ ਨੂੰ ਮਜਾਰਾਂ ਪੂਜਣ ਵਾਲਿਆਂ ਦੇ ਵੰਸ਼ਜ ਦਸ ਰਿਹਾ ਹੈ ਜੋ ਕਿ ਕਿਸੇ ਵੀ ਕੀਮਤ ’ਤੇ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ ਸਿੱਖ ਕੌਮ ਵਲੋਂ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਮੈਂਬਰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਸੂਬਾ ਸੀਨੀਅਰ ਮੀਤ ਪ੍ਰਧਾਨ ਅਕਾਲੀ ਦਲ ਜਥੇਦਾਰ ਰਣਜੀਤ ਸਿੰਘ ਕਾਹਲੋਂ, ਸ਼ਹਿਰੀ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ ਸੇਵਾ ਸਿੰਘ, ਸਰਪੰਚ ਕਾਹਲਵਾਂ ਭੁਪਿੰਦਰ ਸਿੰਘ ਭਿੰਦਾ ਕਾਹਲੋਂ, ਸਾਬਕਾ ਸਰਪੰਚ ਜਸਵਿੰਦਰ ਸਿੰਘ ਬਸਰਾ, ਲੰਬੜਦਾਰ ਜਗਰੂਪ ਸਿੰਘ ਚੌਹਲਾ ਜਥੇਦਾਰ ਮਕਸੂਦਾਂ ਭਗਵੰਤ ਸਿੰਘ ਫਤਿਹ ਜਲਾਲ ਆਦਿ ਵਲੋਂ ਗਾਇਕ ਗੁਰਦਾਸ ਮਾਨ ਵਿਰੁਧ ਡੇਰਾ ਬਾਬਾ ਮੁਰਾਦ ਸ਼ਾਹ ਵਿਖੇ ਸਾਲਾਨਾ ਮੇਲੇ ਦੌਰਾਨ ਤੀਸਰੀ ਪਾਤਸ਼ਾਹੀ ਸ੍ਰੀ ਗੁਰੂ ਅਮਰਦਾਸ ਜੀ ਪ੍ਰਤੀ ਕੀਤੀ ਗਈ ਟਿਪਣੀ ਤੇ ਵਿਰੋਧ ਜ਼ਾਹਰ ਕਰਦਿਆਂ ਕੀਤਾ। 
ਰੋਸ ਜ਼ਾਹਰ ਕਰਦਿਆਂ ਸਿੱਖ ਸ਼ਖ਼ਸੀਅਤਾਂ ਨੇ ਕਿਹਾ ਕਿ  ਪੰਜਾਬੀ ਗਾਇਕ ਗੁਰਦਾਸ ਮਾਨ ਜੋ ਕਿ ਗੱਲਾਂ ਪੰਜਾਬ ਅਤੇ ਗੁਰੂਆਂ ਦੀ ਕਰਦਾ ਹੈ ਅਸਲ ਵਿਚ ਗੁਰਦਾਸ ਮਾਨ ਸਿੱਖੀ ਤੋਂ ਬੇਮੁਖ ਹੈ ਤੇ ਮੜੀਆਂ ਦਾ ਮੁਰੀਦ ਹੈ ਤੇ ਮੜੀਆਂ ਪੂਜ ਪੂਜ ਕੇ ਮਾਨਸਕ ਤੌਰ ’ਤੇ ਬੀਮਾਰ ਹੋ ਗਿਆ ਹੈ। ਇਸ ਮੌਕੇ ਇਨ੍ਹਾਂ ਸ਼ਖ਼ਸੀਅਤਾਂ ਦੇ ਨਾਲ-ਨਾਲ ਨਾਲ ਕਰਤਾਰਪੁਰ ਦੀਆਂ ਵੱਖ-ਵੱਖ ਧਾਰਮਕ ਜਥੇਬੰਦੀਆਂ ਭਾਈ ਘਨ੍ਹਈਆ ਸੇਵਾ ਸੁਸਾਇਟੀ, ਮਾਤਾ ਗੁਜਰੀ ਸੇਵਾ ਸੁਸਾਇਟੀ, ਕਲਗੀਧਰ ਇਸਤਰੀ ਸਤਿਸੰਗ ਸਭਾ ਨੇ ਰੋਸ ਜ਼ਾਹਰ ਕੀਤਾ ਕਿ ਗੁਰਦਾਸ ਮਾਨ ਦੀ ਇਸ ਹਰਕਤ ਨੂੰ ਕਿਸੇ ਵੀ ਕੀਮਤ ’ਤੇ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ ਅਤੇ ਉਸ ਵਿਰੁਧ ਕਾਰਵਾਈ ਕਰਦੇ ਹੋਏ ਜਲਦ ਹੀ ਸੰਗਤਾਂ ਲਾਮਬੰਦ ਹੋ ਕੇ ਸਖ਼ਤ ਐਕਸ਼ਨ ਵੀ ਲੈਣਗੀਆਂ।