Punjab News : ਪਿੰਡ ਪੱਧਰ ’ਤੇ ਲੱਗੇ ਮੋਰਚੇ ’ਚ ਆਉਣ ਵਾਲੇ ਕਿਸਾਨਾਂ ਦੀ ਪੁਲਿਸ ਧਰਪਕੜ ਕਰ ਰਹੀ ਹੈ-ਗੁਰਪਿੰਦਰ ਸਿੰਘ ਡੱਲੇਵਾਲ
Punjab News in Punjabi : ਫ਼ਰੀਦਕੋਟ ਜ਼ਿਲ੍ਹੇ ਦੇ ਪਿੰਡ ਡੱਲੇਵਾਲਾ ਵਿਚ ਚੱਲ ਰਿਹਾ ਕਿਸਾਨ ਮੋਰਚਾ ਅੱਜ ਚੌਥੇ ਦਿਨ ਵਿਚ ਸ਼ਾਮਲ ਹੋ ਗਿਆ, ਬੀਤੇ ਕੱਲ੍ਹ ਦੀ ਤਰ੍ਹਾਂ ਹੀ ਪੁਲਿਸ ਪ੍ਰਸ਼ਾਸਨ ਵੱਲੋਂ ਪਿੰਡ ਨੂੰ ਆਉਣ ਵਾਲੇ ਸਾਰੇ ਰਾਹਾਂ ’ਤੇ ਸਖ਼ਤ ਪਹਿਰੇਬੰਦੀ ਕੀਤੀ ਗਈ ਅਤੇ ਬਾਹਰਲੇ ਇਲਾਕੇ ਤੋਂ ਆਂਉਣ ਵਾਲੇ ਕਿਸਾਨਾਂ ਦੀ ਚੈਕਿਗ ਕੀਤੀ ਗਈ। ਪਿੰਡ ਡੱਲੇਵਾਲਾ ਵਿਚ ਚੱਲ ਰਹੇ ਧਰਨੇ ਵਿਚ ਸ਼ਾਮਲ ਹੋਣ ਵਾਲੇ ਕਈ ਕਿਸਾਨ ਆਗੂਆਂ ਨੂੰ ਅੱਜ ਪੁਲਿਸ ਵੱਲੋਂ ਡਿਟੇਨ ਕੀਤੇ ਜਾਣ ਦੀਆਂ ਖ਼ਬਰਾਂ ਵੀ ਸਾਹਮਣੇ ਆਈਆਂ ਹਨ। ਇਸ ਸਭ ਵਿਚਾਲੇ ਪਿੰਡ ਵਿਚ ਹੀ ਮੋਰਚਾ ਚਲਾ ਰਹੇ ਕਿਸਾਨ ਨੇਤਾ ਜਗਜੀਤ ਸਿੰਘ ਡੱਲੇਵਾਲਾ ਦੇ ਪੁੱਤਰ ਗੁਰਪਿੰਦਰ ਡੱਲੇਵਾਲਾ ਨੇ ਪੰਜਾਬ ਸਰਕਾਰ ਤੇ ਅਤੇ ਪੁਲਿਸ ਪ੍ਰਸ਼ਾਂਸਨ ਤੇ ਵੱਡੇ ਇਲਜਾਮ ਲਗਾਉਂਦਿਆ ਕਿਹਾ ਕਿ ਉਹਨਾਂ ਨੂੰ ਆਪਣੇ ਘਰ ’ਚ ਵੀ ਆਪਣੀ ਗੱਲ ਨਹੀਂ ਰੱਖਣ ਦਿੱਤੀ ਜਾ ਰਹੀ।
ਉਨ੍ਹਾਂ ਕਿਹਾ ਕਿ ਨਾਂ ਤਾਂ ਅਸੀਂ ਕੋਈ ਸੜਕ ਰੋਕੀ ਹੈ, ਨਾਂ ਅਸੀਂ ਕਿਸੇ ਰੇਲਵੇ ਲਾਇਨ ਤੇ ਬੈਠੇ ਹਾਂ, ਨਾਂ ਹੀ ਕਿਸੇ ਰਾਹਗੀਰ ਨੂੰ ਤੰਗ ਪ੍ਰੇਸ਼ਾਨ ਕੀਤਾ ਹੈ ਪਰ ਫਿਰ ਵੀ ਪੁਲਿਸ ਪ੍ਰਸ਼ਾਸਨ ਉਹਨਾਂ ਨੂੰ ਆਪਣੇ ਵਿਚ ਪਿੰਡ ਵਿਚ ਵੀ ਧਰਨਾਂ ਪ੍ਰਦਰਸ਼ਨ ਨਹੀਂ ਕਰਨ ਦੇ ਰਿਹਾ। ਉਹਨਾਂ ਕਿਹਾ ਕਿ ਪਿੰਡ ਦੇ ਚਾਰ ਚੁਫੇਰੇ ਪੁਲਿਸ ਨੇ ਘੇਰੇਬੰਦੀ ਕੀਤੀ ਹੋਈ ਹੈ ਕਿਸੇ ਵੀ ਕਿਸਾਨ ਨੂੰ ਧਰਨੇ ਵਿਚ ਦਾਖ਼ਲ ਨਹੀਂ ਹੋਣ ਦਿੱਤਾ ਜਾ ਰਿਹਾ। ਆਗੂਆਂ ਨੂੰ ਫੜ੍ਹਿਆ ਜਾ ਰਿਹਾ। ਉਹਨਾਂ ਕਿਹਾ ਕਿ ਸਰਕਾਰ ਉਹਨਾਂ ਨਾਲ ਅਜਿਹਾ ਸਲੂਕ ਕਰ ਰਹੀ ਹੈ ਜਿਵੇਂ ਉਹ ਕਿਸੇ ਹੋਰ ਦੇਸ਼ ਦੇ ਵਾਸੀ ਹੋਣ, ਉਹਨਾਂ ਨੂੰ ਬੇਗਾਨਗੀ ਦਾ ਅਹਿਸਾਸ ਕਰਵਾਇਆ ਜਾ ਰਿਹਾ।
ਇਕ ਸਵਾਲ ਦੇ ਜਵਾਬ ਵਿਚ ਉਹਨਾਂ ਕਿਹਾ ਕਿ ਜਗਜੀਤ ਸਿੰਘ ਡੱਲੇਵਾਲਾ ਨਾਲ ਪਰਿਵਾਰਕ ਤੌਰ ’ਤੇ ਉਹਨਾਂ ਦੀ ਗੱਲ 8-9 ਮਾਰਚ ਨੂੰ ਹੋਈ ਹੈ ਉਸ ਤੋਂ ਬਾਅਦ ਉਹਨਾਂ ਦੀ ਡੱਲੇਵਾਲਾ ਸਾਹਿਬ ਨਾਲ ਕੋਈ ਗੱਲਬਾਤ ਨਹੀਂ ਹੋਈ। ਉਹਨਾਂ ਕਿਹਾ ਕਿ ਪ੍ਰਸ਼ਾਸਨ ਉਹਨਾਂ ਨੂੰ ਜਗਜੀਤ ਸਿੰਘ ਡੱਲੇਵਾਲਾ ਨਾਲ ਮਿਲਵਾਉਣ ਦੀ ਗੱਲ ਕਰ ਰਿਹਾ ਹੈ ਪਰ ਅਸੀਂ ਤਾਂ ਮਿਲਣ ਦੀ ਕੋਈ ਮੰਗ ਹੀ ਨਹੀਂ ਰੱਖੀ। ਉਹਨਾਂ ਕਿਹਾ ਕਿ ਸਾਡੀ ਅਤੇ ਸਾਡੇ ਨੇਤਾ ਦੀ ਸਭ ਤੋਂ ਪਹਿਲਾਂ ਹੁਣ ਇਹੀ ਮੰਗ ਹੈ ਕਿ ਡਿਟੇਨ ਕੀਤੇ ਗਏ ਸਾਰੇ ਕਿਸਾਨ ਨੇਤਾ ਰਿਹਾਅ ਕੀਤੇ ਜਾਣ ਜਦ ਤੱਕ ਕਿਸਾਨ ਰਿਹਾਅ ਨਹੀਂ ਹੁੰਦੇ ਡੱਲੇਵਾਲਾ ਸਾਹਿਬ ਇਕ ਬੂੰਦ ਵੀ ਪਾਣੀ ਨਹੀਂ ਪੀਣਗੇ।
(For more news apart from government is not letting us cry our sorrows even while sitting at home- Gurpinder Singh Dallewala News in Punjabi, stay tuned to Rozana Spokesman)
