ਪੰਜਾਬ ਅੰਦਰ ਢੀਂਡਸਾ ਦੀ ਅਗਵਾਈ ਹੇਠ ਤੀਜਾ ਬਦਲ ਬਣਾਉਣ ਦੀ ਹਰ ਸੰਭਵ ਕੋਸ਼ਿਸ਼ ਕਰ ਰਹੇ ਹਾਂ
ਇਸ ਵਕਤ ਪੰਜਾਬ ਅੰਦਰ ਕਿਸੇ ਇੱਕ ਰਾਜਨੀਤਕ ਪਾਰਟੀ ਦੀ ਹਵਾ ਨਹੀ
ਕਾਂਗਰਸ ਸਰਕਾਰ 192 ਗ਼ੈਰ ਪੰਜਾਬੀਆਂ ਦੀ ਮੁੱਖ ਮੰਤਰੀ ਦਫਤਰ ਵਿਚ ਹੋਈਆਂ ਭਰਤੀਆਂ ਦੀ ਜਾਂਚ ਕਰਵਾਏ
ਮੇਰੀ ਭਵਿੱਖਬਾਣੀ ਇਸ ਵਾਰ ਬਹੁਮਤ ਵਾਲੀ ਸਰਕਾਰ ਬਣਨੀ ਮੁਸ਼ਕਲ
ਆਮ ਆਦਮੀ ਪਾਰਟੀ ਅਤੇ ਸੁਖਬੀਰ ਸਿੰਘ ਬਾਦਲ ਅਜੇ ਵੀ ਹੰਕਾਰਵੱਸ
ਭਾਜਪਾ ਅਤੇ ਕੈਪਟਨ ਅਮਰਿੰਦਰ ਸਿੰਘ ਨਾਲ ਸਾਡਾ ਗਠਜੋੜ ਹੋਣਾ ਅਸੰਭਵ
ਮੋਹਾਲੀ : ਪੰਜਾਬ ਅੰਦਰ ਫਰਵਰੀ 2022 ਵਿੱਚ ਹੋਣ ਜਾ ਰਹੀਆਂ ਵਿਧਾਨ ਸਭਾ ਚੋਣਾਂ ਨੂੰ ਲੈਕੇ ਸਾਰੀਆਂ ਹੀ ਰਾਜਨੀਤਕ ਪਾਰਟੀਆਂ ਆਪਣਾ ਆਪਣਾ ਏਜੰਡਾ ਲੈ ਕੇ ਵੋਟਰਾ ਵਿਚ ਜਾਣ ਲਈ ਉਤਾਵਲੀਆਂ ਹੋਈਆਂ ਬੈਠੀਆਂ ਹਨ । ਇਸੇ ਸਬੰਧ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ ਦੇ ਸਿਰਕੱਢ ਆਗੂ ਪਾਰਟੀ ਦੇ ਬੁਲਾਰੇ ਅਤੇ ਜਨਰਲ ਸਕੱਤਰ ਕਰਨੈਲ ਸਿੰਘ ਪੀਰਮੁਹੰਮਦ ਨਾਲ ਸਪੋਕਸਮੈਨ ਨੇ ਵਿਸਥਾਰਪੂਰਵਕ ਗੱਲਬਾਤ ਕੀਤੀ ਗਈ।
karnail singh peer mohammad
ਪ੍ਰਸ਼ਨ : ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ ਪੰਜਾਬ ਵਿਧਾਨ ਸਭਾ ਚੋਣਾਂ ਇਕੱਲਿਆਂ ਲੜੇਗਾ ਜਾ ਫਿਰ ਕਿਸ ਧਿਰ ਨਾਲ ਸਮਝੋਤਾ ਕਰੇਗਾ ?
ਉੱਤਰ : ਅਸੀ ਪੰਜਾਬ ਅੰਦਰ ਮਜਬੂਤ ਗਠਜੋੜ ਬਣਾਉਣ ਲਈ ਹਰ ਸੰਭਵ ਕੋਸ਼ਿਸ਼ ਕਰ ਰਹੇ ਹਾ ਜਿਸ ਵਿਚ ਸਾਨੂੰ ਵੱਡੀ ਸਫਲਤਾ ਵੀ ਮਿਲੀ ਹੈ ਹੁਣ ਤੱਕ ਕੁੱਝ ਅਹਿਮ ਪੰਜਾਬ ਹਿਤੈਸ਼ੀ ਪਾਰਟੀਆਂ ਨਾਲ ਗਠਜੋੜ ਹੋਇਆ ਵੀ ਹੈ ।
ਪ੍ਰਸ਼ਨ : ਤੁਹਾਡੇ ਮੁਤਾਬਿਕ ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ ਕਿਸ ਤਰ੍ਹਾਂ ਦੀ ਭੂਮਿਕਾ ਵਿੱਚ ਹੋਵੇਗਾ ?
ਉੱਤਰ : ਸਾਨੂੰ ਪੂਰਨ ਭਰੋਸਾ ਹੈ ਕਿ ਅਸੀ ਪੰਜਾਬ ਅਤੇ ਪੰਥ ਦੇ ਹਿੱਤ ਵਿੱਚ ਲਗਾਤਾਰ ਸਰਗਰਮ ਹਾਂ ਤੇ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਸਾਡੀ ਅਹਿਮ ਭੂਮਿਕਾ ਹੋਵੇਗੀ ।
ਪ੍ਰਸ਼ਨ : ਜੇ ਤੁਹਾਡਾ ਗਠਜੋੜ ਹੁੰਦਾ ਹੈ ਤਾਂ ਤੁਹਾਡਾ ਮੁੱਖ ਮੰਤਰੀ ਦਾ ਚਿਹਰਾ ਕੋਣ ਹੋਵੇਗਾ ?
ਉੱਤਰ : ਸਾਡੇ ਪਾਸ ਸਾਫ ਸੁਥਰਾ ਦਿਖ ਵਾਲਾ ਪੰਜਾਬ ਦੀ ਰਾਜਨੀਤੀ ਵਿੱਚ ਨਾਮਵਾਰ ਚਿਹਰਾ ਪਰਮਿੰਦਰ ਸਿੰਘ ਢੀਂਡਸਾ ਹਨ ਜੋ ਉੱਚ ਪੱਧਰ ਦੀ ਵਿਦਿਆ ਹਾਸਲ ਹਨ। ਉਹ ਪੰਜ ਵਾਰ ਵਿਧਾਇਕ ਰਹਿ ਚੁੱਕੇ ਹਨ ਤੇ ਦੋ ਵਾਰ ਕੈਬਨਿਟ ਮੰਤਰੀ ਰਹੇ ਚੁੱਕੇ ਹਨ।
Parminder Singh Dhindsa
ਪ੍ਰਸ਼ਨ : ਜੇ ਤੁਹਾਡਾ ਆਪ ਪਾਰਟੀ ਨਾਲ ਗਠਜੋੜ ਹੁੰਦਾ ਹੈ ਤਾਂ ਕੀ ਤੁਸੀ ਪਰਮਿੰਦਰ ਢੀਂਡਸਾ ਨੂੰ ਹੀ ਮੁੱਖ ਮੰਤਰੀ ਦਾ ਚਿਹਰਾ ਬਣਾਉਣ ਨੂੰ ਤਰਜੀਹ ਦਿਓਗੇ?
ਉੱਤਰ: ਬਿਲਕੁੱਲ ਦਿਆਂਗੇ ਪਰ ਗੱਠਜੋੜ ਹੋਣ ਦੀ ਸੂਰਤ ਵਿੱਚ ਸਾਡੀਆ ਤਰਜੀਹਾ ਕੁੱਝ ਅਲੱਗ ਹੋਣਗੀਆ ਸਾਡੇ ਲਈ ਪੰਜਾਬ ਅੰਦਰ ਮਜਬੂਤ ਸਾਫ ਸੁਥਰੇ ਅਕਸ ਵਾਲੀ ਸਰਕਾਰ ਨੂੰ ਬਣਾਉਣ ਲਈ ਜ਼ਿਆਦਾ ਦਿਲਚਸਪੀ ਰਹੇਗੀ ।
ਪ੍ਰਸ਼ਨ : ਕੀ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਨਾਲ ਮੁੜ ਸਮਝੋਤੇ ਦੀਆਂ ਕਿਆਸਅਰਾਈਆਂ ਦਾ ਅਸਲ ਸੱਚ ਕੀ ਹੈ ?
ਉੱਤਰ : ਇਸ ਵਿੱਚ ਕੋਈ ਸਚਾਈ ਨਹੀ ਕਿਉਕਿ ਅਕਾਲੀ ਦਲ ਬਾਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਅਜੇ ਵੀ ਹੰਕਾਰਵੱਸ ਹਨ ਉਹਨਾਂ ਦਾ ਰਵੱਈਆਂ ਪਹਿਲਾਂ ਵਾਂਗ ਅੜੀਅਲ ਨਜ਼ਰ ਆਉਂਦਾ ਹੈ ਜੇ ਉਹ ਵਾਕਿਆ ਹੀ ਪੰਜਾਬ ਅੰਦਰ ਸ਼੍ਰੋਮਣੀ ਅਕਾਲੀ ਦਲ ਦੀ ਸਰਕਾਰ ਬਣਾਉਣ ਵਿੱਚ ਗਹਿਰੀ ਦਿਲਚਸਪੀ ਰੱਖਦੇ ਹੁੰਦੇ ਤਾਂ ਉਹਨਾਂ ਨੂੰ ਇੱਕ ਅਹੁਦਾ ਛੱਡਣ ਲਈ ਕੁੱਝ ਕਦਮ ਚੁੱਕਦੇ ਨਜ਼ਰ ਆਉਣਾ ਚਾਹੀਦਾ ਸੀ। ਪਰ ਉਹ ਪੈਸੇ ਤੇ ਕੇਡਰ ਦੇ ਜ਼ੋਰ 'ਤੇ ਸਰਕਾਰ ਬਣਾਉਣ ਦੇ ਸੁਪਨੇ ਲੈ ਰਹੇ ਹਨ ਜੋ ਕਦੇ ਪੂਰੇ ਨਹੀ ਹੋਣੇ ਜਦ 2017 ਵਿੱਚ ਸਾਰੀ ਪਾਰਟੀ ਇਕਜੁੱਟ ਸੀ ਤੇ ਸਰਕਾਰ ਵੀ ਸੀ ਉਸ ਵਕਤ 14 ਸੀਟਾ ਮਿਲੀਆ ਤੇ ਹੁਣ 2022 ਵਿੱਚ ਕਿਹੜਾ ਕ੍ਰਿਸ਼ਮਾ ਉਹਨਾਂ ਨੂੰ ਸੱਤਾ ਵਿੱਚ ਲੈ ਕੇ ਆਵੇਗਾ ਕਿਉਕਿ ਬਰਗਾੜੀ ਬਹਿਬਲਕਾਂਡ ਵਰਗੇ ਮੁੱਦੇ ਅਜੇ ਵੀ ਜਿਉਂ ਦੇ ਤਿਉਂ ਹਨ।
captain amarinder and sukhbir singh badal
ਪ੍ਰਸ਼ਨ : ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਦਾ ਕੈਪਟਨ ਅਮਰਿੰਦਰ ਸਿੰਘ ਅਤੇ ਭਾਜਪਾ ਨਾਲ ਗਠਜੋੜ ਹੋਣ ਦੀ ਕੀ ਸੰਭਾਵਨਾ ਹੈ ?
ਉੱਤਰ : ਕੋਈ ਸੰਭਾਵਨਾ ਨਹੀਂ ਕਿਉਂਕਿ ਅਜੇ ਕਿਸਾਨ ਸੰਘਰਸ਼ ਜਿਉਂ ਦਾ ਤਿਉਂ ਹੈ। ਪੰਥਕ ਮੁੱਦਿਆ ਵੱਲ ਵੀ ਕੇਂਦਰੀ ਹਕੂਮਤ ਦਾ ਕੋਈ ਧਿਆਨ ਨਹੀਂ। ਜੇਲ੍ਹਾਂ ਵਿੱਚ ਨਜ਼ਰਬੰਦ ਸਿੱਖ ਨੌਜਵਾਨਾ ਦੀ ਰਿਹਾਈ ਦੀ ਜਗਾ ਬਹੁਤ ਸਾਰੇ ਹੋਰ ਪੰਜਾਬੀ ਅਤੇ ਸਿੱਖ ਨੌਜਵਾਨ ਐਨ ਆਈ ਏ ਵਲੋਂ ਯੂ ਪੀ ਏ ਵਰਗੇ ਕਾਲੇ ਕਨੂੰਨ ਤਹਿਤ ਗ੍ਰਿਫਤਾਰ ਕਰ ਲਏ ਗਏ ਹਨ। ਜਦ ਤੱਕ ਇਸ ਤਰਾ ਦੇ ਮਸਲੇ ਹੱਲ ਨਹੀ ਹੁੰਦੇ ਅਸੀ ਸੁਪਨੇ ਵਿੱਚ ਵੀ ਭਾਜਪਾ ਨਾਲ ਗਠਜੋੜ ਬਾਰੇ ਸੋਚ ਵੀ ਨਹੀ ਸਕਦੇ। ਅਸੀਂ ਸਭ ਤੋਂ ਪਹਿਲਾਂ ਕਿਸਾਨ ਸੰਘਰਸ਼ ਸਫਲਤਾਪੂਰਵਕ ਜਿੱਤ ਦਰਜ ਕਰਵਾਉਣ ਵਿੱਚ ਦਿਲਚਸਪੀ ਰੱਖਦੇ ਹਾਂ। ਜਿਥੇ ਤੱਕ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਿੱਚ ਗਠਜੋੜ ਦੀ ਗੱਲ ਹੈ ਇਹ ਹਵਾ ਹਵਾਈ ਹੈ । ਪਰ ਫਿਰ ਵੀ ਕਿਸ ਨਾਲ ਗਠਜੋੜ ਕਰਨਾ ਹੈ ਜਾ ਨਹੀ ਕਰਨਾ ਇਸ ਦਾ ਅੰਤਿਮ ਫ਼ੈਸਲਾ ਸਾਡੀ ਪ੍ਰਮੁੱਖ ਲੀਡਰਸ਼ਿਪ ਨੇ ਜ਼ਿਲ੍ਹਾ ਜਥੇਦਾਰਾ ਨਾਲ ਦੋ ਦਿਨ ਸਲਾਹ ਮਸ਼ਵਰਾ ਕਰਕੇ ਪਾਰਟੀ ਪ੍ਰਧਾਨ ਸੁਖਦੇਵ ਸਿੰਘ ਢੀਂਡਸਾ ਨੂੰ ਦਿੱਤਾ ਹੈ। ਉਹ ਪਾਰਟੀ ਦੇ ਸਰਪ੍ਰਸਤ ਜਥੇਦਾਰ ਰਣਜੀਤ ਸਿੰਘ ਬ੍ਰਹਮਪੁਰਾ ਨਾਲ ਸਲਾਹ ਮਸ਼ਵਰਾ ਕਰਕੇ ਕਰਨਗੇ ।
Sukhdev Singh Dhindsa
ਪ੍ਰਸ਼ਨ : ਅਖੀਰ ਵਿੱਚ ਮੇਰਾ ਸਵਾਲ ਹੈ ਕਿ ਤੁਸੀਂ ਪੰਜਾਬ ਅੰਦਰ ਕਿਸ ਪਾਰਟੀ ਨੂੰ ਮਜਬੂਤ ਮੰਨਦੇ ਹਾ ਜਾ ਕਿਸ ਪਾਰਟੀ ਦੀ ਪੰਜਾਬ ਅੰਦਰ ਲਹਿਰ ਹੈ ?
ਉੱਤਰ : ਮੇਰੇ ਖਿਆਲ ਮੁਤਾਬਿਕ ਇਸ ਸਮੇ ਕਿਸੇ ਵੀ ਪਾਰਟੀ ਦੀ ਲਹਿਰ ਨਹੀ ਪਰ ਕਾਂਗਰਸ ਚਰਨਜੀਤ ਸਿੰਘ ਚੰਨੀ ਦੇ ਮੁੱਖ ਮੰਤਰੀ ਬਣਨ ਤੋਂ ਬਾਅਦ ਮਜਬੂਤ ਹੋਈ ਹੈ ਪਰ ਨਵਜੋਤ ਸਿੰਘ ਸਿੱਧੂ ਅਤੇ ਚੰਨੀ ਦਾ ਮੁੱਖ ਮੰਤਰੀ ਦੇ ਚਿਹਰੇ ਨੂੰ ਲੈ ਕੇ ਭਵਿੱਖ ਵਿੱਚ ਹੋਣ ਵਾਲਾ ਵਾਦ-ਵਿਵਾਦ ਕਾਂਗਰਸ ਨੂੰ ਫਿਰ ਜ਼ੀਰੋ 'ਤੇ ਲੈ ਆਵੇਗਾ। ਦੂਜੀ ਧਿਰ ਆਮ ਆਦਮੀ ਪਾਰਟੀ ਹੈ ਪਰ ਉਹ ਬਿਨਾਂ ਗਠਜੋੜ ਦੇ ਕੋਈ ਵੀ ਕ੍ਰਿਸ਼ਮਾ ਨਹੀ ਦਿਖਾ ਸਕੇਗੀ। ਅਕਾਲੀ ਦਲ ਬਾਦਲ ਨਾਲੋਂ ਸਾਡਾ ਬਣਨ ਵਾਲਾ ਗਠਜੋੜ ਜ਼ਿਆਦਾ ਮਜਬੂਤ ਨਜਰ ਆਵੇਗਾ । ਕੈਪਟਨ ਤੇ ਭਾਜਪਾ ਸਭ ਤੋਂ ਜ਼ਿਆਦਾ ਨੁਕਸਾਨ ਕਾਂਗਰਸ ਤੇ ਅਕਾਲੀ ਦਲ ਬਾਦਲ ਦਾ ਕਰਨਗੇ ।
