ਚੰਡੀਗੜ੍ਹ: ਆਮ ਆਦਮੀ ਪਾਰਟੀ (ਆਪ) ਦੇ ਵਿਧਾਇਕ ਅਮਨ ਅਰੋੜਾ, ਕੁਲਤਾਰ ਸਿੰਘ ਸੰਧਵਾਂ ਅਤੇ ਪ੍ਰੋ. ਬਲਜਿੰਦਰ ਕੌਰ ਵੱਲੋਂ ਆਵਾਰਾ ਪਸ਼ੂਆਂ ਦੀ ਸਮੱਸਿਆ ਦੇ ਹੱਲ ਲਈ ਸਦਨ 'ਚ ਪੇਸ਼ ਮਤੇ 'ਤੇ ਬੋਲਦਿਆਂ ਅਮਨ ਅਰੋੜਾ ਨੇ ਕਿਹਾ ਕਿ ਦੇਸੀ ਗਊ ਦੀ ਨਸਲ ਪੂਜਣਯੋਗ ਹੈ ਪਰੰਤੂ ਅਮਰੀਕੀ ਨਸਲ ਐਚ.ਐਫ/ਜਰਸੀ ਨਸਲ ਦੇ ਜਾਨਵਰਾਂ ਦਾ ਭਾਰਤੀ ਦੇਸੀ ਗਊ ਦੀ ਨਸਲ ਨਾਲ ਕੋਈ ਵੀ ਵਿਗਿਆਨਿਕ, ਜਿਨਸੀ ਅਤੇ ਧਾਰਮਿਕ ਅਧਿਆਤਮਿਕਤਾ ਰਿਸ਼ਤਾ-ਨਾਤਾ ਨਹੀਂ ਹੈ।
Photo
ਸਦਨ 'ਚ ਇਸ ਮੁੱਦੇ 'ਤੇ ਵੱਖ-ਵੱਖ ਵਿਚਾਰ ਆਉਣ ਉਪਰੰਤ ਸਦਨ ਤੋਂ ਬਾਹਰ ਮੀਡੀਆ ਦੇ ਮੁਖ਼ਾਤਬ ਹੁੰਦਿਆਂ ਅਮਨ ਅਰੋੜਾ ਨੇ ਸਪਸ਼ਟ ਕੀਤਾ ਕਿ ਆਮ ਆਦਮੀ ਪਾਰਟੀ ਕਿਸੇ ਵੀ ਜੀਵ-ਜੰਤੂ ਜਾਂ ਪੰਛੀ-ਪ੍ਰਾਣੀ ਦੀ ਹੱਤਿਆ ਦੀ ਵਕਾਲਤ ਨਹੀਂ ਕਰਦੀ, ਇਸ ਲਈ ਜੇਕਰ ਸਰਕਾਰ ਕੋਲ ਆਵਾਰਾ ਪਸ਼ੂਆਂ ਦੀ ਘਾਤਕ ਅਤੇ ਜਾਨਲੇਵਾ ਸਮੱਸਿਆ ਦਾ ਬਿਹਤਰੀਨ ਅਤੇ ਸਮਾਂਬੱਧ ਹੱਲ ਹੈ ਤਾਂ ਸੂਬੇ 'ਚ ਅਮਰੀਕੀ ਢੱਠਿਆਂ ਸਮੇਤ ਕਿਸੇ ਵੀ ਜਾਨਵਰ ਨੂੰ ਬੁੱਚੜਖ਼ਾਨੇ ਨਹੀਂ ਭੇਜਣਾ ਚਾਹੀਦਾ।
Photo
ਪਰੰਤੂ ਜੇਕਰ ਸਰਕਾਰ ਠੋਸ ਪ੍ਰਬੰਧ ਨਹੀਂ ਕਰ ਸਕਦੀ ਤਾਂ ਹਿੰਸਕ ਪ੍ਰਵਿਰਤੀ ਵਾਲੇ ਅਮਰੀਕੀ ਢੱਠਿਆਂ ਨੂੰ ਬੁੱਚੜਖ਼ਾਨੇ 'ਚ ਭੇਜਣ ਤੋਂ ਗੁਰੇਜ਼ ਨਹੀਂ ਕੀਤਾ ਜਾਣਾ ਚਾਹੀਦਾ, ਕਿਉਂਕਿ ਸੂਬੇ ਦੀਆਂ ਸੜਕਾਂ, ਸ਼ਹਿਰਾਂ ਅਤੇ ਖੇਤਾਂ 'ਚ 80 ਪ੍ਰਤੀਸ਼ਤ ਆਵਾਰਾ ਪਸ਼ੂ ਅਮਰੀਕੀ ਨਸਲ ਦੇ ਐਚ.ਐਫ/ਜਰਸੀ ਪਸ਼ੂ ਹਨ। ਜਿੰਨਾ ਕਾਰਨ ਪ੍ਰਤੀ ਸਾਲ ਸੜਕ ਹਾਦਸਿਆਂ 'ਚ 150 ਤੋਂ ਵੱਧ ਜਾਨਾਂ ਜਾਂਦੀਆਂ ਹਨ ਅਤੇ 200 ਕਰੋੜ ਤੋਂ ਵੱਧ ਦਾ ਫ਼ਸਲਾਂ ਅਰਥਾਤ ਕਿਸਾਨਾਂ ਦਾ ਨੁਕਸਾਨ ਕਰਦੇ ਹਨ।
Photo
ਅਮਨ ਅਰੋੜਾ ਨੇ ਕਿਹਾ ਕਿ ਬਦਕਿਸਮਤੀ ਨਾਲ ਸਰਕਾਰਾਂ ਨੇ ਇਸ ਮੁੱਦੇ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ, ਜਦਕਿ 9 ਵਸਤੂਆਂ 'ਤੇ ਲੋਕਾਂ ਕੋਲੋਂ ਕਰੋੜਾਂ ਰੁਪਏ ਦਾ ਗਊ-ਸੈਸ ਲਿਆ ਅਤੇ ਵਸੂਲਿਆ ਜਾ ਰਿਹਾ ਹੈ, ਜਿਸ ਨੂੰ ਗਊਆਂ ਜਾਂ ਆਵਾਰਾ ਪਸ਼ੂ ਸੰਭਾਲਣ ਦੀ ਥਾਂ ਇੱਧਰ-ਉੱਧਰ ਖ਼ੁਰਦ-ਬੁਰਦ ਕੀਤਾ ਜਾ ਰਿਹਾ ਹੈ।
Photo
ਮੀਡੀਆ ਦੇ ਸਵਾਲਾਂ ਦਾ ਜਵਾਬ ਦਿੰਦਿਆਂ ਅਮਨ ਅਰੋੜਾ ਨੇ ਸਪਸ਼ਟ ਕੀਤਾ ਕਿ ਉਨ੍ਹਾਂ ਇਸ ਮੁੱਦੇ ਨੂੰ ਹਿੰਦੂ ਸੰਗਠਨਾਂ ਅਤੇ ਹਿੰਦੂ ਧਰਮ ਦੀਆਂ ਕਈ ਸੰਤ-ਮਹਾਂਪੁਰਸ਼ ਹਸਤੀਆਂ ਨਾਲ ਬਾਰੀਕੀ ਨਾਲ ਵਿਚਾਰਿਆ ਗਿਆ ਹੈ ਅਤੇ ਉਨ੍ਹਾਂ ਵੀ ਧਾਰਮਿਕ ਹਸਤੀਆਂ ਨੇ ਵੀ ਦੱਸਿਆ ਅਮਰੀਕੀ ਨਸਲ ਦੀਆਂ ਐਚ.ਐਫ/ਜਰਸੀ ਨਸਲ ਦਾ ਭਾਰਤ 'ਚ 'ਗਊ ਮਾਤਾ' ਵਜੋਂ ਪੂਜੀ ਜਾਂਦੀ ਦੇਸੀ ਨਸਲ ਨਾਲ ਦੂਰ-ਦੂਰ ਦਾ ਵੀ ਰਿਸ਼ਤਾ ਨਹੀਂ ਹੈ।
Photo
ਅਮਨ ਅਰੋੜਾ ਨੇ ਚੁਨੌਤੀ ਦਿੱਤੀ ਕਿ ਉਹ ਇਸ ਮੁੱਦੇ 'ਤੇ ਆਪਣੇ ਹਲਕੇ ਸੁਨਾਮ 'ਚ ਸੈਮੀਨਾਰ ਕਰਾਉਣ ਲਈ ਤਿਆਰ ਹਨ। ਅਮਨ ਅਰੋੜਾ ਨੇ ਇਸ ਮੁੱਦੇ 'ਤੇ ਸਦਨ ਦੇ ਅੰਦਰ ਅਤੇ ਬਾਹਰ ਸਿਆਸਤ ਤੋਂ ਪ੍ਰੇਰਿਤ ਭੜਕਾਊ ਅਤੇ ਗੁਮਰਾਹਕੁਨ ਬਿਆਨਬਾਜ਼ੀ ਕਰ ਰਹੇ ਅਕਾਲੀ ਵਿਧਾਇਕ ਐਨ.ਕੇ ਸ਼ਰਮਾ ਨੂੰ ਆੜੇ ਹੱਥੀ ਲੈਂਦੇ ਹੋਏ ਕਿਹਾ ਕਿ ਉਨ੍ਹਾਂ ਦੇ ਆਪਣੇ ਹਲਕੇ ਡੇਰਾਬਸੀ 'ਚ 3 ਬੁੱਚੜਖ਼ਾਨੇ ਚੱਲ ਰਹੇ ਹਨ। ਇਸ ਤੋਂ ਬਿਨਾਂ ਇਸ ਮੁੱਦੇ 'ਤੇ 'ਆਪ' ਵਿਧਾਇਕ ਕੁਲਤਾਰ ਸਿੰਘ ਸੰਧਵਾਂ, ਪ੍ਰੋ. ਬਲਜਿੰਦਰ ਕੌਰ ਅਤੇ ਮੀਤ ਹੇਅਰ ਨੇ ਵੀ ਸੰਬੋਧਨ ਕੀਤਾ।
