ਵਿੱਤ ਮੰਤਰੀ ਨੇ ਲੋੜਵੰਦ ਲੋਕਾਂ ਲਈ ਚਲਾਏ ਜਾ ਰਹੇ ਲੰਗਰਾਂ ਵਿਖੇ ਪੁੱਜ ਕੇ ਕੀਤੀ ਹੌਸਲਾ-ਅਫ਼ਜ਼ਾਈ
ਬਠਿੰਡਾ, 26 ਅਪ੍ਰੈਲ (ਸੁਖਜਿੰਦਰ ਮਾਨ): ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੇ ਆਖਿਆ ਹੈ ਕਿ ਸੂਬੇ ਵਿਚ ਕਰਫ਼ਿਊ ਵਿਚੋਂ ਢਿੱਲ ਦੇਣ ਸਬੰਧੀ ਅੰਤਮ ਨਿਰਣਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਾਲੀ ਸਮੂਚੀ ਕੈਬਨਿਟ ਵਲੋਂ ਮਾਹਰ ਸਮੂਹ ਦੀ ਰਾਏ ਅਨੁਸਾਰ ਲਿਆ ਜਾਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਬੇਸ਼ੱਕ ਕਾਰੋਬਾਰ ਜ਼ਰੂਰੀ ਹੈ ਪਰ ਮਨੁੱਖੀ ਜਾਨਾਂ ਦੀ ਕੀਮਤ ਵਪਾਰ ਅਤੇ ਕਾਰੋਬਾਰ ਨਾਲ ਕਿਤੇ ਜ਼ਿਆਦਾ ਹੈ।
File photo
ਉਨ੍ਹਾਂ ਨੇ ਕਿਹਾ ਕਿ ਸੂਬਾ ਸਰਕਾਰ ਨੇ ਪਹਿਲਾਂ ਵੀ ਰਾਜ ਦੇ ਹਿੱਤ ਵਿਚ ਦੂਜਿਆਂ ਤੋਂ ਪਹਿਲਾਂ ਯੋਗ ਫ਼ੈਸਲੇ ਲਏ ਹਨ ਅਤੇ ਹੁਣ ਵੀ ਸਹੀ ਸਮੇਂ ਤੇ ਸਹੀ ਨਿਰਣਾ ਪੰਜਾਬ ਦੇ ਲੋਕਾਂ ਦੇ ਹਿੱਤ ਵਿਚ ਲਿਆ ਜਾਵੇਗਾ। ਉਹ ਅੱਜ ਇੱਥੇ ਵਾਲਮਿਕੀ ਨਗਰ, ਬਸੰਤ ਵਿਹਾਰ ਅਤੇ ਅਗਰਵਾਲ ਕਲੋਨੀ ਵਿਚ ਸ਼ਹਿਰ ਦੇ ਸਮਾਜ ਸੇਵੀਆਂ ਵਲੋਂ ਚਲਾਏ ਜਾ ਰਹੇ ਲੰਗਰ ਅਤੇ ਹੋਰ ਰਾਹਤ ਕਾਰਜਾਂ ਦੀ ਹੌਸਲਾ-ਅਫ਼ਜ਼ਾਈ ਲਈ ਪੁੱਜੇ ਸਨ।ਇੱਥੇ ਗ੍ਰੋਥ ਸੈਂਟਰ ਵਲੋਂ 600 ਰਾਸ਼ਨ ਕਿੱਟਾਂ ਵੀ ਸਮਾਜ ਦੇ ਲੋੜਵੰਦ ਲੋਕਾਂ ਨੂੰ ਵੰਡਨ ਹਿੱਤ ਭੇਜੀਆਂ। ਇੱਥੇ ਇਕ ਖ਼ੂਨਦਾਨ ਕੈਂਪ ਵੀ ਲਗਾਇਆ ਗਿਆ ਸੀ।
ਇਸ ਮੌਕੇ ਸ: ਬਾਦਲ ਨੇ ਬਠਿੰਡਾ ਵਿਚ ਚੱਲ ਰਹੇ ਰਾਹਤ ਕਾਰਜਾਂ ਦੀ ਗੱਲ ਕਰਦਿਆਂ ਕਿਹਾ ਕਿ ਸ਼ਹਿਰ ਵਿਚ ਪਿਛਲੇ ਤਿੰਨ ਦਿਨਾਂ ਵਿਚ ਹੀ 2593 ਰਾਸ਼ਨ ਦੀਆਂ ਕਿੱਟਾਂ ਵਾਰਡ ਨੰਬਰ 17 ਤੋਂ 21, ਗੋਪਾਲ ਨਗਰ, ਸੰਜੈ ਨਗਰ, ਨਰੂਆਣਾ ਰੋਡ, ਜੋਗੀ ਨਗਰ, ਖੱਦਰ ਭੰਡਾਰ ਗਲੀ, ਨਵੀਂ ਬਸਤੀ, ਪਾਰਸਰਾਮ ਨਗਰ, ਬੇਅੰਤ ਨਗਰ, ਬਸਤੀ ਅਮਰਪੁਰਾ ਆਦਿ ਵਿਚ ਵੰਡੀਆਂ ਗਈਆਂ ਹਨ।ਇਸ ਮੌਕੇ ਜੈਜੀਤ ਸਿੰਘ ਜੋਹਲ, ਸ੍ਰੀ ਕੇਕੇ ਅਗਰਵਾਲ, ਸ੍ਰੀ ਪਵਨ ਮਾਨੀ, ਸ੍ਰੀ ਅਰੁਣ ਵਧਾਵਨ, ਸ੍ਰੀ ਅਸ਼ੋਕ ਪ੍ਰਧਾਨ, ਸ੍ਰੀ ਰਾਜਨ ਗਰਗ, ਸ੍ਰੀ ਬਲਜਿੰਦਰ ਠੇਕੇਦਾਰ, ਮਾਸਟਰ ਹਰਮੰਦਰ ਸਿੰਘ, ਰਾਮ ਪ੍ਰਕਾਸ਼ ਰਾਮਾ, ਅਨਿਲ ਭੋਲਾ, ਨੱਥੂ ਰਾਮ, ਪ੍ਰਕਾਸ਼ ਚੰਦ ਆਦਿ ਵੀ ਹਾਜ਼ਰ ਸਨ।
