ਵਿਦੇਸ਼ੀ ਮੀਡੀਆ ਨੇ ਕੋਰੋਨਾ ਫੈਲਣ ਲਈ ਸਿੱਧੇ ਤੌਰ 'ਤੇ ਪ੍ਰਧਾਨ ਮੰਤਰੀ ਨੂੰ  ਜ਼ਿੰਮੇਵਾਰ ਦਸਿਆ

ਕਿਹਾ, ਮੋਦੀ ਦੇ ਅਤਿ ਆਤਮ ਵਿਸ਼ਵਾਸ ਨੇ ਲੋਕਾਂ ਨੂੰ  ਮਰਵਾ ਕੇ ਰੱਖ ਦਿਤੈ

ਨਵੀਂ ਦਿੱਲੀ, 26 ਅਪ੍ਰੈਲ : ਭਾਰਤ ਵਿਚ ਕੋਰੋਨਾ ਦੀ ਦੂਜੀ ਲਹਿਰ ਨਾਲ ਹਾਲਾਤ ਵਿਗੜਦੇ ਜਾ ਰਹੇ ਹਨ | ਕੋਰੋਨਾ ਲਈ ਵਿਸ਼ੇਸ਼ ਮੈਡੀਕਲ ਸੇਵਾਵਾਂ ਦੀ ਗੱਲ ਤਾਂ ਛੱਡੋ, ਲੋਕਾਂ ਨੂੰ  ਹਸਪਤਾਲਾਂ 'ਚ ਬੈੱਡ, ਆਕਸੀਜਨ ਅਤੇ ਜ਼ਰੂਰੀ ਦਵਾਈਆਂ ਵੀ ਨਹੀਂ ਮਿਲ ਰਹੀਆਂ | ਭਾਰਤ ਦੀ ਇਸ ਸਥਿਤੀ ਲਈ ਵਿਦੇਸ਼ੀ ਮੀਡੀਆ ਨੇ ਸਿੱਧੇ ਤੌਰ 'ਤੇ ਪ੍ਰਧਾਨ ਮੰਤਰੀ ਨੂੰ  ਜ਼ਿੰਮੇਵਾਰ ਠਹਿਰਾਇਆ ਹੈ |
ਆਸਟਰੇਲੀਅਨ ਫ਼ਾਈਨਾਸ਼ੀਅਲ ਰਿਵਿਊ ਵਿਚ ਕਾਰਟੂਨਿਸਟ ਡੇਵਿਡ ਰੋਵ ਦਾ ਪ੍ਰਕਾਸ਼ਤ ਕਰ ਕੇ ਭਾਰਤ ਦੀ ਸਥਿਤੀ ਦੀ ਤੁਲਨਾ ਹਾਥੀ ਨਾਲ ਕੀਤੀ ਹੈ ਜਿਹੜਾ ਧਰਤੀ 'ਤੇ ਬੇਹਾਲ ਹੋ ਕੇ ਡਿੱਗਿਆ ਪਿਆ ਹੈ ਤੇ ਉਪਰ ਮੋਦੀ ਰਾਜਾ ਬਣ ਕੇ ਬੈਠਾ ਹੈ | 

ਅਮਰੀਕੀ ਅਖ਼ਬਾਰ 'ਦਿ ਵਾਸ਼ਿੰਗਟਨ ਪੋਸਟ' ਨੇ ਲਿਖਿਆ ਕਿ ਭਾਰਤ ਵਿਚ ਕੋਰੋਨਾ ਦੀ ਦੂਜੀ ਲਹਿਰ ਦੀ ਸੱਭ ਤੋਂ ਵੱਡੀ ਵਜ੍ਹਾ ਪਾਬੰਦੀਆਂ ਵਿਚ ਛੇਤੀ ਰਾਹਤ ਮਿਲਣਾ ਹੈ |  ਇਸ ਤੋਂ ਲੋਕਾਂ ਨੇ ਮਹਾਮਾਰੀ ਨੂੰ  ਹਲਕੇ ਵਿਚ ਲਿਆ | ਕੁੰਭ ਮੇਲਾ, ਕਿ੍ਕਟ ਸਟੇਡੀਅਮਾਂ ਵਿਚ ਭਾਰੀ ਭੀੜ ਇਸ ਦੀਆਂ ਉਦਹਾਰਣਾਂ ਹਨ | 
 ਬਿਟ੍ਰੇਨ ਦੇ ਅਖ਼ਬਾਰ 'ਦਿ ਗਾਰਜੀਅਨ' ਨੇ ਭਾਰਤ ਵਿਚ ਕੋਰੋਨਾ ਬਣੇ ਭਿਆਨਕ ਹਾਲਾਤ ਨੂੰ  ਲੈ ਕੇ ਪ੍ਰਧਾਨ ਮੰਤਰੀ ਮੋਦੀ ਨੂੰ  ਘੇਰਿਆ ਹੈ |  ਅਖ਼ਬਾਰ ਨੇ ਲਿਖਿਆ ਕਿ ਭਾਰਤੀ ਪ੍ਰਧਾਨ ਮੰਤਰੀ  ਦੇ ਅਤਿ ਆਤਮਵਿਸ਼ਵਾਸ  ਨੇ ਦੇਸ਼ ਦੇ ਲੋਕਾਂ ਨੂੰ  ਮਰਵਾ ਕੇ ਰੱਖ ਦਿਤਾ ਹੈ |
ਅਮਰੀਕੀ ਅਖ਼ਬਾਰ 'ਦਿ ਨਿਊਯਾਰਕ ਟਾਈਮਜ਼' ਨੇ ਲਿਖਿਆ ਕਿ ਸਾਲ ਭਰ ਪਹਿਲਾਂ ਦੁਨੀਆਂ ਦੀ ਸੱਭ ਤੋਂ ਸਖ਼ਤ ਤਾਲਾਬੰਦੀ ਲਗਾ ਕੇ ਕੋਰੋਨਾ ਉੱਤੇ ਕਾਫ਼ੀ ਹੱਦ ਤਕ ਕਾਬੂ ਪਾਇਆ ਲੇਕਿਨ ਫਿਰ ਮਾਹਰਾਂ ਦੀ ਚਿਤਾਵਨੀ ਅਣਦੇਖੀ ਕੀਤੀ ਗਈ | ਇਸੇ ਕਰ ਕੇ ਅੱਜ ਕੋਰੋਨਾ ਦੇ ਮਾਮਲੇ ਬੇਕਾਬੂ ਹੋ ਗਏ ਹਨ |  (ਏਜੰਸੀ)