ਨਵਜੋਤ ਸਿੱਧੂ ਨੇ ਸੋਨੀਆ ਗਾਂਧੀ ਵਲੋਂ ਸੱਦੀ ਮੀਟਿੰਗ ਵਿਚ ਵੀ ਚੁਕੇ ਪੰਜਾਬ ਦੇ ਲਟਕਦੇ ਮੁੱਦੇ
ਚੰਡੀਗੜ੍ਹ, 26 ਅਕਤੂਬਰ (ਭੁੱਲਰ): ਆਲ ਇੰਡੀਆ ਕਾਂਗਰਸ ਕਮੇਟੀ ਦੀ ਅੱਜ ਪਾਰਟੀ ਪ੍ਰਧਾਨ ਸੋਨੀਆ ਗਾਂਧੀ ਵਲੋਂ ਸੱਦੀ ਮੀਟਿੰਗ ਵਿਚ ਹਿੱਸਾ ਲੈਣ ਪਹੁੰਚੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਨੇ ਪੰਜਾਬ ਦੇ ਲਟਕਦੇ ਮੁੱਦੇ ਹੀ ਮੁੱਖ ਤੌਰ ’ਤੇ ਚੁਕੇ। ਇਹ ਮੀਟਿੰਗ ਉਨ੍ਹਾਂ ਰਾਜਾਂ ਨਾਲ ਸਬੰਧਤ ਸੀ ਜਿਨ੍ਹਾਂ ਵਿਚ ਆਉਣ ਵਾਲੇ ਸਮੇਂ ਵਿਚ ਵਿਧਾਨ ਸਭਾ ਚੋਣਾਂ ਹੋਣੀਆਂ ਹਨ। ਮਿਲੀ ਜਾਣਕਾਰੀ ਮੁਤਾਬਕ ਸਿੱਧੂ ਨੇ ਅਪਣੇ 13 ਨੁਕਾਤੀ ਏਜੰਡੇ ਵਿਚੋਂ ਹੀ ਮੁੱਦਿਆਂ ’ਤੇ ਬੋਲਦਿਆਂ ਮੁੱਖ ਤੌਰ ’ਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀਆਂ ਬੇਅਦਬੀਆਂ ਦਾ ਮਾਮਲਾ ਉਠਾਉਂਦਿਆਂ ਕਿਹਾ ਕਿ ਇਸ ਸਬੰਧ ਵਿਚ ਛੇਤੀ ਇਨਸਾਫ਼ ਜ਼ਰੂਰ ਦਿਤਾ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਸਮੇਂ ਸੂਬੇ ਵਿਚ ਸੱਤਾ ਵਿਰੋਧੀ ਲਹਿਰ ਹੈ, ਭਾਵੇਂ ਕਿ ਹੁਣ ਕੁੱਝ ਘਟੀ ਹੈ ਪਰ ਇਸ ਸਬੰਧ ਵਿਚ ਪੰਜਾਬ ’ਚ ਕਾਂਗਰਸ ਨੂੰ ਇਕਜੁਟ ਹੋ ਕੇ ਚਲਣਾ ਪਵੇਗਾ। ਉਨ੍ਹਾਂ ਕਿਹਾ ਕਿ ਜੇਕਰ ਪੰਜਾਬ ਵਿਚ ਕਾਂਗਰਸੀ ਇਕਜੁਟ ਹੋ ਕੇ ਚਲਦੇ ਹਨ ਤੇ ਲਟਕਦੇ ਮੁੱਖ ਵਾਅਦੇ ਪੂਰੇ ਹੁੰਦੇ ਹਨ ਤਾਂ ਸੂਬੇ ਵਿਚ ਮੁੜ ਕਾਂਗਰਸ ਦੀ ਸਰਕਾਰ ਬਣ ਸਕਦੀ ਹੈ। ਇਸੇ ਦੌਰਾਨ ਅੱਜ ਸਿੱਧੂ ਨੇ ਪਾਰਟੀ ਕੇ.ਸੀ. ਵੇਣੂ ਗੋਪਾਲ ਤੇ ਹਰੀਸ਼ ਚੌਧਰੀ ਨਾਲ ਵੀ ਮੀਟਿੰਗ ਕਰ ਕੇ ਪਾਰਟੀ ਸੰਗਠਨ ਦੀ ਮਜ਼ਬੂਤੀ ਲਈ ਚਰਚਾ ਕੀਤੀ।
