ਜਾਖੜ 'ਤੇ ਵੀ ਵਿੰਨਿ੍ਹਆ ਨਿਸ਼ਾਨਾ
ਅੰਮਿ੍ਤਸਰ, 26 ਨਵੰਬਰ (ਪਪ) : ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਅੱਜ ਇਕ ਵਾਰ ਫਿਰ ਬੇਅਦਬੀ ਅਤੇ ਨਸ਼ਿਆਂ ਨੂੰ ਲੈ ਕੇ ਅਪਣੀ ਹੀ ਸਰਕਾਰ ਵਿਰੁਧ ਭੜਾਸ ਕਢਦੇ ਨਜ਼ਰ ਆਏ | ਸਿੱਧੂ ਨੇ ਸਪੱਸ਼ਟ ਕਿਹਾ ਕਿ ਪੰਜਾਬ ਵਿਚ ਕਾਂਗਰਸ ਦੀ ਸਰਕਾਰ ਬਣਨ ਅਤੇ ਸੀਐਮ ਬਦਲਣ ਤੋਂ ਬਾਅਦ ਨਵਾਂ ਸੀਐਮ ਬਣਨ ਦੇ ਵੀ ਇਹ ਦੋ ਮੁੱਦੇ ਆਧਾਰ ਸਨ | ਇਸ ਮਾਮਲੇ ਨੂੰ ਜ਼ੁਬਾਨੀ ਰਖਣਾ ਮੇਰਾ ਫ਼ਰਜ਼ ਅਤੇ ਧਰਮ ਹੈ | ਇਸ ਸਬੰਧੀ ਹਾਈ ਕੋਰਟ ਵਲੋਂ ਤਿੰਨ ਵਾਰ ਨਿਰਦੇਸ਼ ਦਿਤੇ ਜਾ ਚੁਕੇ ਹਨ | 2021 'ਚ ਹਾਈ ਕੋਰਟ ਨੇ ਸਪੱਸ਼ਟ ਕਿਹਾ ਸੀ ਕਿ ਡਰੱਗ ਮਾਫ਼ੀਆ ਨੂੰ ਸਿਆਸੀ ਸੁਰੱਖਿਆ ਹਾਸਲ ਹੈ ਅਤੇ ਕਾਰਵਾਈ ਛੋਟੀਆਂ ਮੱਛੀਆਂ 'ਤੇ ਹੀ ਹੋ ਰਹੀ ਹੈ | ਜਦੋਂ 1200000 ਟਰਾਮਾਡੋਲ ਗੋਲੀਆਂ ਫੜੀਆਂ ਗਈਆਂ ਸਨ ਤਾਂ ਹਾਈ ਕੋਰਟ ਨੇ ਕਿਹਾ ਸੀ ਕਿ ਸਿਆਸੀ ਲੋਕ ਜਾਣਬੁੱਝ ਕੇ ਡਰੱਗ ਮਾਫ਼ੀਆ ਨੂੰ ਸਰਪ੍ਰਸਤੀ ਦਿੰਦੇ ਹਨ | ਐਨਡੀਪੀਐਸ ਦੀ ਰਿਪੋਰਟ 'ਚ ਇਹ ਵੀ ਕਿਹਾ ਗਿਆ ਹੈ ਕਿ ਨਸ਼ਿਆਂ ਨਾਲ ਸਬੰਧਤ ਅਪਰਾਧਾਂ 'ਚ ਪੰਜਾਬ ਦੇਸ਼ ਵਿਚ ਪਹਿਲੇ ਨੰਬਰ 'ਤੇ ਹੈ | ਕੈਪਟਨ ਦਾ ਨਾਂ ਲਏ ਬਿਨਾਂ ਸਿੱਧੂ ਨੇ ਕਿਹਾ ਕਿ 4 ਹਫ਼ਤਿਆਂ 'ਚ ਨਸ਼ਾ ਖ਼ਤਮ ਕਰਨ ਦਾ ਦਾਅਵਾ ਕੌਣ ਕਰਦਾ ਸੀ, ਇਹ ਉਸ ਦੀ ਅਸਲੀਅਤ ਹੈ |
ਸਿੱਧੂ ਨੇ ਕਿਹਾ ਕਿ ਸੱਭ ਤੋਂ ਪਹਿਲਾਂ ਨਵੰਬਰ 2017 'ਚ ਹਾਈ ਕੋਰਟ ਦੇ ਨਿਰਦੇਸ਼ਾਂ 'ਤੇ ਨਸ਼ੇ ਦੀ ਰਿਪੋਰਟ ਐਸਟੀਐਫ਼ ਨੂੰ ਸੌਂਪੀ ਗਈ ਸੀ | ਐਸ.ਟੀ.ਐਫ਼ ਦੀ ਰਿਪੋਰਟ ਫ਼ਰਵਰੀ 2018 'ਚ ਹਾਈ ਕੋਰਟ 'ਚ ਦਾਇਰ ਕੀਤੀ ਗਈ ਸੀ | ਦੋਵੇਂ ਵਾਰ ਹਾਈ ਕੋਰਟ ਨੇ ਹਦਾਇਤ ਕੀਤੀ ਹੈ ਕਿ ਕਾਨੂੰਨ ਨੂੰ ਧਿਆਨ ਵਿਚ ਰਖਦਿਆਂ ਕਾਰਵਾਈ ਕੀਤੀ ਜਾਵੇ | ਮੈਨੂੰ ਸਮਝ ਨਹੀਂ ਆਉਂਦੀ ਕਿ ਸਾਡੇ ਨਾਲ ਕੀ ਸਮੱਸਿਆ ਹੈ | ਕੌਣ ਡਰ ਰਿਹਾ ਹੈ ਅਤੇ ਕੌਣ ਰਿਪੋਰਟ ਪੇਸ਼ ਕਰਨ ਤੋਂ ਰੋਕ ਰਿਹਾ ਹੈ | ਬੇਅਦਬੀ 'ਤੇ ਕਾਰਵਾਈ ਕਿਵੇਂ ਹੋ ਸਕਦੀ ਹੈ, ਜਦੋਂ ਮੁੱਖ ਦੋਸ਼ੀ ਸੁਮੇਧ ਸਿੰਘ ਸੈਣੀ ਨੂੰ ਬਲੈਂਕੇਟ ਬੇਲ ਦਿਵਾ ਦਿਤੀ ਜਾਵੇ | ਲੋਕ ਪੁੱਛ ਰਹੇ ਹਨ ਕਿ ਇਸ ਵਿਚ ਸਰਕਾਰ ਦੀ ਕੀ ਮਨਸ਼ਾ ਹੈ | ਜਦੋਂ ਸੈਣੀ ਨੂੰ ਬਲੈਂਕੇਟ ਬੇਲ ਮਿਲ ਗਈ ਤਾਂ ਕੀ ਸਰਕਾਰ ਨੇ ਐਸਐਲਪੀ ਪਾਈ | ਬਲੈਂਕੇਟ ਬੇਲ ਮਿਲੇ ਤਿੰਨ ਮਹੀਨੇ ਹੋ ਗਏ ਹਨ, ਜੇਕਰ ਇਸ ਦੌਰਾਨ ਸਰਕਾਰ ਨੇ ਐਲਐਲਪੀ ਪਾਈ ਹੁੰਦੀ ਤਾਂ ਲਗਦਾ ਕਿ ਸਰਕਾਰ ਇਸ ਨੂੰ ਲੈ ਕੇ ਗੰਭੀਰ ਹੈ |
ਇਹ ਪੁੱਛੇ ਜਾਣ 'ਤੇ ਕੀ ਬਤੌਰ ਪ੍ਰਧਾਨ ਤੁਹਾਡੀ ਸੁਣਵਾਈ ਨਹੀਂ ਹੋ ਰਹੀ? ਸਿੱਧੂ ਨੇ ਕਿਹਾ ਕਿ ਬਿਜਲੀ ਤੇ ਰੇਤ ਵਾਲਾ ਮਾਮਲਾ ਵੀ ਉਨ੍ਹਾਂ ਰਖਿਆ ਸੀ, ਕਾਰਵਾਈ ਹੋਈ ਹੈ | ਮੈਂ ਤਾਂ ਖ਼ੁਦ ਕਹਿ ਰਿਹਾ ਹਾਂ ਕਿ ਅਸੀਂ ਲੋਕਾਂ ਵਿਚਕਾਰ ਜਾਣਾ ਹੈ ਤੇ ਨਵੀਂ ਸਰਕਾਰ ਨੂੰ ਬਣੇ ਵੀ 70 ਦਿਨ ਹੋ ਗਏ ਹਨ | ਉਨ੍ਹਾਂ ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ 'ਤੇ ਵੀ ਹਮਲਾ ਬੋਲਿਆ | ਉਨ੍ਹਾਂ ਕਿਹਾ ਕਿ ਜੋ ਪਹਿਲੇ ਪ੍ਰਧਾਨ ਸਨ, ਉਹ ਬੜੇ ਜ਼ੋਰ-ਸ਼ੋਰ ਨਾਲ ਟਵੀਟ ਅਜਕਲ ਪਾਉਂਦੇ ਹਨ | ਉਨ੍ਹਾਂ ਤਾਂ ਕਦੀ ਇਹ ਮਾਮਲੇ ਨਹੀਂ ਉਠਾਏ | ਅੱਜ ਤੁਹਾਡੇ ਲੋਕਾਂ ਵਿਚਕਾਰ ਜਾ ਕੇ ਦੇਖੋ, ਇਹ ਬਹੁਤ ਹੀ ਵੱਡੇ ਮੁੱਦੇ ਹਨ | ਇਹ ਜਾਂਚ ਉਦੋਂ ਤਕ ਪੂਰੀ ਨਹੀਂ ਹੋਵੇਗੀ ਜਦੋਂ ਤਕ ਬਲੈਂਕੇਟ ਬੇਲ ਟੁੱਟੇਗੀ ਨਹੀਂ |
ਕੈਪਟਨ 'ਤੇ ਹਮਲਾ ਬੋਲਦੇ ਹੋਏ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਇਹ ਦਿਨ ਆ ਗਏ ਹਨ ਕਿ ਪਟਿਆਲਾ ਦੇ ਮੇਅਰ ਨੂੰ ਬਚਾਉਂਦੇ ਫਿਰ ਰਹੇ ਹਨ, ਰੋਂਦੂ ਬੱਚਾ ਹੈ | ਪਹਿਲਾਂ ਕੈਪਟਨ ਹੀ ਸੀਐਮ ਤੇ ਗ੍ਰਹਿ ਮੰਤਰੀ ਸਨ, ਹੁਣ ਤਾਂ ਸਾਡੇ ਕੋਲ ਦੋਧਾਰੀ ਤਲਵਾਰ ਹੈ | ਇਕ ਪਾਸੇ ਚੰਨੀ ਹਨ ਤੇ ਦੂਜੇ ਪਾਸੇ ਗ੍ਰਹਿ ਮੰਤਰੀ ਸੁਖਵਿੰਦਰ ਸਿੰਘ ਰੰਧਾਵਾ, ਤਾਂ ਉਹ ਇਨ੍ਹਾਂ ਦੇ ਭੇਦ ਖੋਲ੍ਹਣ | ਜਦੋਂ ਤਕ ਸਾਹ ਹੈ ਉਦੋਂ ਤਕ ਆਸ ਹੈ | ਉਨ੍ਹਾਂ ਕਿਸਾਨਾਂ ਦੇ ਸੰਘਰਸ਼ ਦੀ ਲਗਾਤਾਰਤਾ ਨੂੰ ਸਮਾਜਿਕ ਲਹਿਰ ਕਰਾਰ ਦਿੰਦਿਆਂ ਸ਼ਹੀਦ ਕਿਸਾਨਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ | ਉਨ੍ਹਾਂ ਸਰਕਾਰ ਅੱਗੇ ਸਿਰ ਝੁਕਾਇਆ ਤੇ ਦਸਿਆ ਕਿ ਲੋਕਤੰਤਰ ਦੀ ਤਾਕਤ ਕੀ ਹੈ | ਪਗੜੀ ਸੰਭਾਲ ਲਹਿਰ ਤੋਂ ਬਾਅਦ ਇਹ ਸੰਘਰਸ਼ ਸੁਨਹਿਰੀ ਅੱਖ਼ਰਾਂ 'ਚ ਲਿਖਿਆ ਜਾਵੇਗਾ | ਕਿਸੇ ਵੀ ਸਿਆਸੀ ਆਗੂ ਨੂੰ ਇਸ ਸੰਘਰਸ਼ ਦਾ ਸਿਹਰਾ ਨਹੀਂ ਲੈਣਾ ਚਾਹੀਦਾ | ਇਸ ਦੀ ਅਸਲ ਜਿੱਤ ਕਦੋਂ ਹੋਵੇਗੀ, ਜਿਸ ਦਿਨ ਇਹ ਸਮਾਜਿਕ ਲਹਿਰ ਕਿਸਾਨਾਂ ਦੀ ਆਰਥਿਕ ਤਾਕਤ ਬਣ ਜਾਵੇਗੀ |
