ਬੈਂਕ ਕਰਜ਼ਾ ਦੇਣੋਂ ਨਾ ਡਰਨ, ਧੋਖਾਧੜੀ ਤੋਂ ਬਚਣ ਦੇ ਪੱਕੇ ਪ੍ਰਬੰਧ ਕਰਨ : ਆਰਬੀਆਈ
ਮੁੰਬਈ, 27 ਅਗੱਸਤ : ਭਾਰਤੀ ਰਿਜ਼ਰਵ ਬੈਂਕ ਦੇ ਗਵਰਨਰ ਸ਼ਕਤੀਕਾਂਤ ਦਾਸ ਨੇ ਬੈਂਕਾਂ ਨੂੰ ਕਰਜ਼ਾ ਦੇਣ ਲਈ ਹੱਲਾਸ਼ੇਰੀ ਦਿੰਦਿਆਂ ਕਿਹਾ ਕਿ ਜੋਖਮ ਤੋਂ ਬਚਣ ਦਾ ਸੁਭਾਅ ਉਨ੍ਹਾਂ ਲਈ ਨੁਕਸਾਨਦੇਹ ਸਾਬਤ ਹੋ ਸਕਦਾ ਹੈ, ਇਸ ਲਈ ਉਨ੍ਹਾਂ ਨੂੰ ਅੱਗੇ ਵੱਧ ਕੇ ਕਰਜ਼ਾ ਦੇਣਾ ਚਾਹੀਦਾ ਹੈ ਅਤੇ ਧੋਖਾਧੜੀ ਤੋਂ ਬਚਣ ਦੇ ਪੱਕੇ ਪ੍ਰਬੰਧ ਕਰਨੇ ਚਾਹੀਦੇ ਹਨ।
ਦਾਸ ਨੇ ਇਹ ਗੱਲੇ ਇਥੇ ਕਿਸੇ ਪ੍ਰੋਗਰਾਮ ਵਿਚ ਕਹੀ। ਉਨ੍ਹਾਂ ਮੰਨਿਆ ਕਿ ਕੋਵਿਡ-19 ਸੰਕਟ ਨਾਲ ਬੈਂਕਾਂ ਲਈ ਪੂੰਜੀ ਦੀ ਘਾਟ ਹੋਵੇਗੀ ਪਰ ਕੁਲ ਮਿਲਾ ਕੇ ਬੈਂਕਿੰਗ ਪ੍ਰਣਾਲੀ ਮਜ਼ਬੂਤ ਅਤੇ ਸਥਿਰ ਹੈ। ਜ਼ਿਕਰਯੋਗ ਹੈ ਕਿ ਇਸ ਸਮੇਂ ਬੈਂਕਾਂ ਦਾ ਕਰਜ਼ਾ ਵਾਧਾ ਘੱਟ ਕੇ ਛੇ ਫ਼ੀ ਸਦੀ ਤੋਂ ਘੱਟ ਰਹਿ ਗਿਆ ਹੈ ਅਤੇ ਕਈ ਲੋਕਾਂ ਨੂੰ ਲਗਦਾ ਹੈ ਕਿ ਬੈਂਕ ਜੋਖਮ ਉਠਾਉਣ ਤੋਂ ਬਚ ਰਹੇ ਹਨ ਅਤੇ ਘੱਟ ਕਰਜ਼ਾ ਦੇ ਰਹੇ ਹਨ। ਰਿਜ਼ਰਵ ਬੈਂਕ ਨੇ ਅਪਣੀ ਰੀਪੋਰਟ ਵਿਚ ਦਸਿਆ ਹੈ ਕਿ ਵਿੱਤ ਵਰ੍ਹੇ 2019-20 ਵਿਚ ਧੋਖਾਧੜੀ ਦੇ ਮਾਮਲੇ ਦੁਗਣੇ ਹੋ ਕੇ 1.85 ਲੱਖ ਕਰੋੜ ਰੁਪਏ ਤਕ ਪਹੁੰਚ ਗਏ। ਦਾਸ ਨੇ ਕਿਹਾ ਕਿ ਬੈਂਕਾਂ ਨੂੰ ਧੋਖਾਧੜੀ ਨੂੰ ਰੋਕਣ ਦੀ ਅਪਣੀ ਸਮਰੱਥਾ ਵਿਚ ਸੁਧਾਰ ਲਿਆਉਣ ਦੀ ਲੋੜ ਹੈ ਤਾਕਿ ਕਮਜ਼ੋਰੀਆਂ ਦੀ ਤੁਰਤ ਪਛਾਣ ਹੋ ਸਕੇ। ਉਨ੍ਹਾਂ ਕਿਹਾ ਕਿ ਬੈਂਕਾਂ ਦੀ ਜੋਖਮ ਪ੍ਰਣਾਲੀ ਅਜਿਹੀ ਹੋਣੀ ਚਾਹੀਦੀ ਹੈ ਕਿ ਵੱਖ ਵੱਖ ਕਾਰੋਬਾਰਾਂ ਵਿਚ ਧੋਖਾਧੜੀ ਨੂੰ ਪਹਿਲਾਂ ਹੀ ਭਾਂਪ ਲਿਆ ਜਾਵੇ ਅਤੇ ਬਾਹਰੀ ਮਾਹੌਲ ਵਿਚ ਬਦਲਾਅ ਨਾਲ ਪੈਣਾ ਹੋਣ ਵਾਲੇ ਜੋਖਮਾਂ ਦੀ ਸਮੇਂ ਸਿਰ ਪਛਾਣ ਕਰ ਲਈ ਜਾਵੇ। ਉਨ੍ਹਾਂ ਕਿਹਾ, 'ਬੈਂਕ ਤਣਾਅ ਦਾ ਸਾਹਮਣਾ ਕਰਨਗੇ, ਇਹ ਜ਼ਾਹਰ ਹੈ ਪਰ ਜ਼ਿਆਦਾ ਅਹਿਮ ਗੱਲ ਇਹ ਹੈ ਕਿ ਬੈਂਕ ਚੁਨੌਤੀਆਂ ਦਾ ਕੀ ਜਵਾਬ ਦਿੰਦੇ ਹਨ ਅਤੇ ਕਿਸ ਤਰ੍ਹਾਂ ਸਾਹਮਣਾ ਕਰਦੇ ਹਨ। ਉਨ੍ਹ ਾਂ ਕਿਹਾ ਕਿ ਕਰਜ਼ੇ ਦੀ ਕਿਸ਼ਤ ਅਦਾਇਗੀ 'ਤੇ ਰੋਕ ਅਸਥਾਈ ਹੱਲ ਸੀ ਅਤੇ ਕਰਜ਼ਾ ਪੁਨਗਠਨ ਨਾਲ ਕਰਜ਼ਦਾਰਾਂ ਨੂੰ ਟਿਕਾਊ ਰਾਹਤ ਮਿਲਣ ਦੀ ਉਮੀਦ ਹੈ। (ਏਜੰਸੀ)