ਸੁਮੇਧ ਸੈਣੀ ਨੇ ਬਹਿਬਲ ਕਲਾਂ ਕੇਸ ਦੇ ਦੋਸ਼ ਪੱਤਰ ਨੂੰ ਦਿਤੀ ਚੁਨੌਤੀ

ਚੰਡੀਗੜ੍ਹ, 28 ਜਨਵਰੀ (ਸੁਰਜੀਤ ਸਿੰਘ ਸੱਤੀ) : ਸਾਬਕਾ ਪੁਲਿਸ ਮੁਖੀ ਸੁਮੇਧ ਸੈਣੀ ਨੇ ਬਹਿਬਲਕਲਾਂ ਗੋਲੀ ਕਾਂਡ ਕੇਸ ’ਚ ਪੁਲਿਸ ਵਲੋਂ ਫ਼ਰੀਦਕੋਟ ਅਦਾਲਤ ’ਚ ਦਾਖ਼ਲ ਕੀਤੇ ਦੋਸ਼ ਪੱਤਰ ਨੂੰ ਹਾਈਕੋਰਟ ’ਚ ਚੁਣੌਤੀ ਦਿਤੀ ਹੈ। ਸੈਣੀ ਦੀ ਪਟੀਸ਼ਨ ਦੀ ਸੁਣਵਾਈ ਪਹਿਲਾਂ ਚਲ ਰਹੇ ਸਬੰਧਤ ਦੋ ਹੋਰ ਕੇਸਾਂ ਦੇ ਨਾਲ ਹੀ ਇਕ ਫ਼ਰਵਰੀ ਨੂੰ ਹੋਵੇਗੀ। ਸੈਣੀ ਨੇ ਪਟੀਸ਼ਨ ’ਚ ਦੋਸ਼ ਲਗਾਇਆ ਕਿ ਇਸ ਮਾਮਲੇ ’ਚ ਪਹਿਲਾਂ ਉਸ ਦਾ ਨਾਂ ਸ਼ਾਮਲ ਨਹੀਂ ਸੀ ਤੇ ਬਾਅਦ ਵਿਚ ਸ਼ਾਮਲ ਕੀਤਾ ਗਿਆ ਹੈ। ਸੈਣੀ ਨੇ ਦੋਸ਼ ਲਗਾਇਆ ਕਿ ਜਾਂਚ ਸਹੀ ਨਹੀਂ ਹੈ ਤੇ ਦੋਸ਼ ਪੱਤਰ ਰੱਦ ਕੀਤੇ ਜਾਣੇ ਚਾਹੀਦੇ ਹਨ। ਪੁਲਿਸ ਨੇ ਤਤਕਾਲੀ ਆਈ.ਜੀ ਪਰਮਰਾਜ ਸਿੰਘ ਉਮਰਾਨੰਗਲ ਤੇ ਸੈਣੀ ਵਿਰੁਧ ਦੋਸ਼ ਪੱਤਰ ਦਾਖ਼ਲ ਕੀਤੇ ਸੀ। ਸੈਣੀ ਦੇ ਵਕੀਲ ਨੇ ਅੱਜ ਹਾਈਕੋਰਟ ਦਾ ਧਿਆਨ ਦਿਵਾਇਆ ਕਿ ਇਸ ਤੋਂ ਪਹਿਲਾਂ ਬਹਿਬਲਕਲਾਂ ਗੋਲੀ ਕਾਂਡ ਵੇਲੇ ਦੇ ਤਤਕਾਲੀ ਸਬੰਧਤ ਥਾਣਾ ਮੁਖੀ ਗੁਰਦੀਪ ਸਿੰਘ ਨੇ ਵੀ ਜਾਂਚ ਨੂੰ ਗ਼ਲਤ ਕਰਾਰ ਦਿੰਦਿਆਂ ਝੂਠਾ ਫਸਾਉਣ ਦਾ ਦੋਸ਼ ਲਗਾ ਕੇ ਦੋਸ਼ ਪੱਤਰ ਰੱਦ ਕਰਨ ਅਤੇ ਮਾਮਲੇ ਦੀ ਜਾਂਚ ਸੀਬੀਆਈ ਕੋਲੋਂ ਕਰਵਾਉਣ ਦੀ ਮੰਗ ਕੀਤੀ ਸੀ ਤੇ ਉਮਰਾਨੰਗਲ ਨੇ ਵੀ ਅਜਿਹੇ ਦੋਸ਼ਾਂ ਵਾਲੀ ਪਟੀਸ਼ਨ ਦਾਖ਼ਲ ਕੀਤੀ ਸੀ ਤੇ ਇਨ੍ਹਾਂ ਦੋਵੇ ਪਟੀਸ਼ਨਾਂ ਦੀ ਸੁਣਵਾਈ ਇੱਕੋ ਬੈਂਚ ਕਰ ਰਹੀ ਹੈ, ਲਿਹਾਜ਼ਾ ਸੈਣੀ ਦੀ ਪਟੀਸ਼ਨ ਵੀ ਉਨ੍ਹਾਂ ਕੇਸਾਂ ਦੇ ਨਾਲ ਹੀ ਸੁਣੀ ਜਾਵੇ। ਇਸੇ ’ਤੇ ਬੈਂਚ ਨੇ ਸੁਣਵਾਈ ਦੂਜੇ ਕੇਸਾਂ ਨਾਲ ਜੋੜ ਦਿਤੀ ਹੈ।