ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ (ਸੀ.ਬੀ.ਐਸ.ਈ.) ਨੂੰ ਹੁਣ ਸਿੱਖਿਆ ਦੇ ਨਾਲ-ਨਾਲ ਵਿਦਿਆਰਥੀਆਂ ਦੀ ਸਿਹਤ ਦੀ ਵੀ ਚਿੰਤਾ ਹੋਣ ਲਗੀ ਹੈ। ਇਹੀ...
ਲੁਧਿਆਣਾ : ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ (ਸੀ.ਬੀ.ਐਸ.ਈ.) ਨੂੰ ਹੁਣ ਸਿੱਖਿਆ ਦੇ ਨਾਲ-ਨਾਲ ਵਿਦਿਆਰਥੀਆਂ ਦੀ ਸਿਹਤ ਦੀ ਵੀ ਚਿੰਤਾ ਹੋਣ ਲਗੀ ਹੈ। ਇਹੀ ਵਜ੍ਹਾ ਹੈ ਕਿ ਵਿਦਿਆਰਥੀਆਂ ਨੂੰ ਖੇਡਾਂ 'ਚ ਭਾਗ ਲੈਣ ਲਈ ਪ੍ਰੇਰਿਤ ਕਰਨ ਦੇ ਉਦੇਸ਼ ਨਾਲ ਬੋਰਡ ਨੇ 9ਵੀਂ ਤੋਂ 12ਵੀਂ ਤਕ ਦੇ ਵਿਦਿਆਰਥੀਆਂ ਲਈ ਸਕੂਲਾਂ 'ਚ ਹੈਲਥ ਐਂਡ ਫਿਜ਼ੀਕਲ ਐਜੂਕੇਸ਼ਨ ਵਿਸ਼ੇ ਨੂੰ ਜ਼ਰੂਰੀ ਕਰ ਦਿਤਾ ਹੈ।
ਬੋਰਡ ਨੇ ਸਕੂਲਾਂ ਨੂੰ ਇਸ ਜ਼ਰੂਰੀ ਰੂਪ 'ਚ ਲਾਗੂ ਕਰਨ ਦੇ ਨਿਰਦੇਸ਼ ਵੀ ਦਿਤੇ ਹਨ। ਜਿਨ੍ਹਾਂ ਮੁਤਾਬਕ ਸਕੂਲਾਂ ਨੂੰ ਰੋਜ਼ਾਨਾ ਇਸ ਵਿਸ਼ੇ ਦੀ ਇਕ ਕਲਾਸ ਜ਼ਰੂਰੀ ਲਾਉਣੀ ਹੋਵੇਗੀ। ਜਾਣਕਾਰੀ ਮੁਤਾਬਕ ਕਈ ਸਕੂਲ ਫਿਜ਼ੀਕਲ ਐਜੂਕੇਸ਼ਨ ਨੂੰ ਇਸ ਲਈ ਜ਼ਰੂਰੀ ਵਿਸ਼ਾ ਨਹੀਂ ਬਣਾਉਂਦੇ ਕਿ ਕਿਤੇ ਹੋਰ ਵਿਸ਼ੇ 'ਚ ਵਿਦਿਆਰਥੀ ਪੜ੍ਹਾਈ 'ਚ ਪੱਛੜ ਗਿਆ ਤਾਂ ਉਸ ਦੇ ਸਕੂਲ ਦਾ ਰਿਜ਼ਲਟ ਪ੍ਰਭਾਵਿਤ ਹੋਵੇਗਾ। ਬੋਰਡ ਨੇ ਬੱਚਿਆਂ ਦੇ ਵਿਕਾਸ ਲਈ ਫਿਜ਼ੀਕਲ ਐਜੂਕੇਸ਼ਨ ਵਿਸ਼ੇ ਨੂੰ ਮੁੱਖ ਧਾਰਾ 'ਚ ਲਿਆਉਣ ਦਾ ਯਤਨ ਕੀਤਾ ਹੈ। ਨਵੇਂ ਸੈਸ਼ਨ ਨਾਲ ਸਕੂਲਾਂ 'ਚ ਹੁਣ ਇਹ ਵਿਸ਼ਾ 9ਵੀਂ ਤੋਂ 12ਵੀਂ ਦੇ ਵਿਦਿਆਰਥੀਆਂ ਲਈ ਜ਼ਰੂਰੀ ਹੋਵੇਗਾ।
ਟਾਈਮ ਟੇਬਲ 'ਚ ਰਖਣਾ ਹੋਵੇਗਾ ਇਕ ਪੀਰੀਅਡ : ਸੀ.ਬੀ.ਐਸ.ਈ .ਦੇ ਹੁਕਮਾਂ ਦੇ ਮੁਤਾਬਕ ਸਕੂਲਾਂ ਨੂੰ ਨਵਾਂ ਟਾਈਮ ਟੇਬਲ ਬਣਾਉਂਦੇ ਸਮੇਂ ਇਕ ਪੀਰੀਅਡ ਇਸ ਵਿਸ਼ੇ ਦੇ ਸਾਰੇ ਵਿਦਿਆਰਥੀਆਂ ਲਈ ਰੱਖਣਾ ਹੋਵੇਗਾ। ਕੁਝ ਸਕੂਲ ਪ੍ਰਿਸੀਪਲਾਂ ਮੁਤਾਬਕ ਬੋਰਡ ਦਾ ਇਹ ਚੰਗਾ ਫ਼ੈਸਲਾ ਹੈ, ਜੇਕਰ ਵਿਦਿਆਰਥੀ ਸਕੂਲ ਸਮੇਂ ਦੌਰਾਨ ਖੇਡਾਂ 'ਚ ਭਾਗ ਲੈਣਗੇ ਤਾਂ ਨਿਸ਼ਚਿਤ ਹੀ ਉਨ੍ਹਾਂ ਦੀ ਸਿਹਤ ਵੀ ਠੀਕ ਰਹੇਗੀ।