ਦਫ਼ਤਰ 5 ਘੰਟੇ ਤਕ ਬਿਨਾਂ ਕਿਸੇ ਕਰਮਚਾਰੀ ਖੁੱਲ੍ਹਾ ਰਿਹਾ ਅਤੇ ਲੱਖਾਂ ਰੁਪਏ ਦੇ ਅਸ਼ਟਾਮ ਅਤੇ ਹੋਰ ਦਸਤਾਵੇਜ਼ ਬਿਨਾਂ ਕਿਸੇ ਨਿਗਰਾਨੀ ਦੇ ਪਏ ਰਹੇ।

Punjab News: ਜ਼ੀਰਕਪੁਰ ਸਬ-ਤਹਿਸੀਲ ਵਿਚ ਵੀਰਵਾਰ ਦੁਪਹਿਰ ਨੂੰ ਵਿਜੀਲੈਂਸ ਰੇਡ ਦੀ ਅਫਵਾਹ ਫੈਲਣ ਤੋਂ ਬਾਅਦ ਸਾਰਾ ਸਟਾਫ ਰਫੂਚੱਕਰ ਹੋ ਗਿਆ। ਇਸ ਦੌਰਾਨ ਤਹਿਸੀਲ ਵਿਚ ਕੰਮ ਕਰਨ ਵਾਲੇ ਸਾਰੇ ਕਰਮਚਾਰੀ ਕੁਰਸੀਆਂ ਛੱਡ ਕੇ ਗਾਇਬ ਹੋ ਗਏ। ਦਸਿਆ ਜਾ ਰਿਹਾ ਹੈ ਕਿ ਦਫ਼ਤਰ 5 ਘੰਟੇ ਤਕ ਬਿਨਾਂ ਕਿਸੇ ਕਰਮਚਾਰੀ ਖੁੱਲ੍ਹਾ ਰਿਹਾ ਅਤੇ ਲੱਖਾਂ ਰੁਪਏ ਦੇ ਅਸ਼ਟਾਮ ਅਤੇ ਹੋਰ ਦਸਤਾਵੇਜ਼ ਬਿਨਾਂ ਕਿਸੇ ਨਿਗਰਾਨੀ ਦੇ ਪਏ ਰਹੇ।

ਸਟਾਫ ਦੀ ਗੈਰ-ਮੌਜੂਦਗੀ ਕਾਰਨ ਦੂਰ-ਦੁਰਾਡੇ ਤੋਂ ਰਜਿਸਟਰੀ ਲਈ ਆਉਣ ਵਾਲੇ ਲੋਕਾਂ ਨੂੰ ਕਰੀਬ 5 ਘੰਟਿਆਂ ਤਕ ਖੱਜਲ-ਖੁਆਰ ਹੋਣਾ ਪਿਆ। ਸਬ-ਤਹਿਸੀਲ ਵਿਚ ਵਿਜੀਲੈਂਸ ਦੀ ਇੰਨੀ ਦਹਿਸ਼ਤ ਫ਼ੈਲ ਗਈ ਕਿ ਨਾਇਬ ਤਹਿਸੀਲਦਾਰ, ਰਜਿਸਟਰੀ ਕਲਰਕ ਸਮੇਤ ਕਿਸੇ ਕਰਮਚਾਰੀ ਨੇ ਫ਼ੋਨ ਤਕ ਨਹੀਂ ਚੁੱਕਿਆ।

ਸੂਤਰਾਂ ਅਨੁਸਾਰ ਨਾਇਬ ਤਹਿਸੀਲਦਾਰ ਸਣੇ ਸਾਰੇ ਕਰਮਚਾਰੀ ਦੁਪਹਿਰ ਦੇ ਖਾਣੇ ਬਹਾਨੇ ਦਫ਼ਤਰ ਛੱਡ ਕੇ ਚਲੇ ਗਏ। ਇਸ ਦੌਰਾਨ ਪਾਣੀ ਪਿਲਾਉਣ ਵਾਲੇ ਚੌਥੇ ਦਰਜੇ ਦੇ ਕਰਮਚਾਰੀ ਵੀ ਗਾਇਬ ਰਹੇ। ਇਸ ਤੋਂ ਬਾਅਦ 6 ਵਜੇ ਤਕ ਜਦੋਂ ਕੋਈ ਕਰਮਚਾਰੀ ਦਫ਼ਤਰ ਨਹੀਂ ਆਇਆ ਤਾਂ ਇਕ ਕਰਮਚਾਰੀ ਦਫ਼ਤਰ ਨੂੰ ਤਾਲਾ ਲਗਾ ਕੇ ਚਲਾ ਗਿਆ।

ਮਾਮਲੇ ਦੀ ਜਾਂਚ ਕੀਤੀ ਜਾਵੇਗੀ:  ਨਾਇਬ ਤਹਿਸੀਲਦਾਰ

ਇਸ ਮਾਮਲੇ ’ਤੇ ਜ਼ੀਰਕਪੁਰ ਦੇ ਨਾਇਬ ਤਹਿਸੀਲਦਾਰ ਰਾਜਕੁਮਾਰ ਨੇ ਕਿਹਾ, “ਮੇਰੀ ਉੱਚ ਅਧਿਕਾਰੀਆਂ ਨਾਲ ਇਕ ਅਹਿਮ ਮੀਟਿੰਗ ਸੀ। ਕਰੀਬ 2 ਵਜੇ ਤਕ ਮੈਂ ਸਾਰਾ ਕੰਮ ਖਤਮ ਕੀਤਾ ਅਤੇ ਦਫ਼ਤਰ ਤੋਂ ਚਲਾ ਗਿਆ। ਪਤਾ ਨਹੀਂ ਮੇਰੇ ਜਾਣ ਤੋਂ ਬਾਅਦ ਸਟਾਫ ਕਿਥੇ ਚਲਾ ਗਿਆ। ਸੋਮਵਾਰ ਨੂੰ ਇਸ ਦੀ ਜਾਂਚ ਕੀਤੀ ਜਾਵੇਗੀ”।  

(For more Punjabi news apart from Rumor of vigilance raid in Zirakpur Tehsil, stay tuned to Rozana Spokesman)