ਅਪਣੇ ਛੋਟੇ ਭਰਾ ਨੂੰ ਸਮੇਂ ਸਿਰ ਘਰ ਆਉਣ ਦਾ ਕਹਿਣਾ ਹੀ ਵੱਡੇ ਭਰਾ ਨੂੰ ਮਹਿੰਗਾ ਪਿਆ, ਛੋਟੇ ਭਰਾ ਨੇ ਮਾਮੂਲੀ ਗੱਲ ਨੂੰ
ਕੋਟਕਪੂਰਾ, 28 ਮਈ (ਗੁਰਿੰਦਰ ਸਿੰਘ): ਅਪਣੇ ਛੋਟੇ ਭਰਾ ਨੂੰ ਸਮੇਂ ਸਿਰ ਘਰ ਆਉਣ ਦਾ ਕਹਿਣਾ ਹੀ ਵੱਡੇ ਭਰਾ ਨੂੰ ਮਹਿੰਗਾ ਪਿਆ, ਛੋਟੇ ਭਰਾ ਨੇ ਮਾਮੂਲੀ ਗੱਲ ਨੂੰ ਲੈ ਕੇ ਤੇਜ਼ਧਾਰ ਹਥਿਆਰ ਨਾਲ ਵੱਡੇ ਭਰਾ ਨੂੰ ਮੌਤ ਦੇ ਘਾਟ ਉਤਾਰ ਦਿਤਾ। ਨੇੜਲੇ ਪਿੰਡ ਮੱਤਾ ਵਿਖੇ ਵਾਪਰੀ ਉਕਤ ਘਟਨਾ 'ਚ ਛੋਟੇ ਭਰਾ ਨੇ ਅਪਣੀ ਬਜ਼ੁਰਗ ਮਾਂ ਨੂੰ ਵੀ ਨਾ ਬਖਸ਼ਿਆ ਜੋ ਗੰਭੀਰ ਜ਼ਖ਼ਮੀ ਹਾਲਤ ਵਿਚ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਹਸਪਤਾਲ ਫ਼ਰੀਦਕੋਟ ਵਿਖੇ ਜੇਰੇ ਇਲਾਜ ਹੈ। ਪੁਲਿਸ ਸੂਤਰਾਂ ਮੁਤਾਬਕ ਨੇੜਲੇ ਪਿੰਡ ਮੱਤਾ ਦੀ ਵਸਨੀਕ 70 ਸਾਲਾ ਬਜ਼ੁਰਗ ਔਰਤ ਸਚਿਆਰ ਕੌਰ ਅਕਸਰ ਅਪਣੇ ਛੋਟੇ ਪੁੱਤਰ ਅਵਤਾਰ ਸਿੰਘ ਤਾਰੀ ਨੂੰ ਸਮੇਂ ਸਿਰ ਘਰ ਆਉਣ ਬਾਰੇ ਵਰਜਦੀ ਰਹਿੰਦੀ ਸੀ ਤੇ ਉਸ ਦਾ ਪੁੱਤਰ ਜਸਪਾਲ ਸਿੰਘ ਵੀ ਗ਼ਲਤ ਲੜਕਿਆਂ ਦਾ ਸਾਥ ਛੱਡਣ ਬਾਰੇ ਉਸ ਨੂੰ ਸਮਝਾਉਂਦਾ ਰਹਿੰਦਾ ਸੀ। ਬੀਤੀ ਅੱਧੀ ਰਾਤ ਅਵਤਾਰ ਸਿੰਘ ਨੇ ਤੇਜ਼ਧਾਰ ਹਥਿਆਰ ਨਾਲ ਅਪਣੇ ਵੱਡੇ ਭਰਾ ਦਾ ਸੁੱਤੇ ਪਏ ਦਾ ਹੀ ਬੇਰਹਿਮੀ ਨਾਲ ਕਤਲ ਕਰ ਦਿਤਾ ਜਦਕਿ ਅਪਣੀ ਬਜ਼ੁਰਗ ਮਾਂ ਦੀ ਬਾਂਹ ਅਤੇ ਸਰੀਰ ਉਪਰ ਤਲਵਾਰ ਦੇ ਕਈ ਵਾਰ ਕੀਤੇ ਜਿਸ ਨਾਲ ਉਹ ਗੰਭੀਰ ਜ਼ਖ਼ਮੀ ਹੋ ਗਈ। ਥਾਣਾ ਜੈਤੋ ਦੇ ਐਸਐਚਓ ਦਲਜੀਤ ਸਿੰਘ ਮੁਤਾਬਕ ਅਵਤਾਰ ਸਿੰਘ ਤਾਰੀ ਵਿਰੁਧ ਆਈਪੀਸੀ ਦੀ ਧਾਰਾ 302/307/324 ਤਹਿਤ ਮਾਮਲਾ ਦਰਜ ਕਰ ਕੇ ਜਸਪਾਲ ਸਿੰਘ ਦੀ ਲਾਸ਼ ਪੋਸਟਮਾਰਟਮ ਉਪਰੰਤ ਵਾਰਸਾਂ ਹਵਾਲੇ ਕਰ ਦਿਤੀ ਹੈ।
