8 ਸਾਲਾਂ 'ਚ 22 ਕਰੋੜ ਲੋਕਾਂ ਨੇ ਨੌਕਰੀ ਲਈ ਕੀਤਾ ਅਪਲਾਈ
ਕੇਂਦਰ ਸਰਕਾਰ ਸਿਰਫ਼ 7 ਲੱਖ ਲੋਕਾਂ ਨੂੰ ਹੀ ਦੇ ਸਕੀ ਨੌਕਰੀ
ਨਵੀਂ ਦਿੱਲੀ, 28 ਜੁਲਾਈ : ਅੱਠ ਸਾਲ ਪਹਿਲਾਂ ਕੇਂਦਰ ਵਿਚ ਸੱਤਾ ਵਿਚ ਆਈ ਮੋਦੀ ਸਰਕਾਰ ਨੇ ਉਦੋਂ ਹਰ ਸਾਲ ਦੋ ਕਰੋੜ ਨੌਜਵਾਨਾਂ ਨੂੰ ਨੌਕਰੀਆਂ ਦੇਣ ਦਾ ਵਾਅਦਾ ਕੀਤਾ ਸੀ | ਪਰ ਸਰਕਾਰ ਵਲੋਂ ਬੁਧਵਾਰ ਨੂੰ ਸੰਸਦ ਵਿਚ ਪੇਸ਼ ਕੀਤੇ ਗਏ ਅੰਕੜੇ ਹਕੀਕਤ ਦੀ ਵਖਰੀ ਤਸਵੀਰ ਬਿਆਨ ਕਰਦੇ ਹਨ | ਇਹ ਜਾਣ ਕੇ ਹੈਰਾਨੀ ਹੁੰਦੀ ਹੈ ਕਿ ਸਰਕਾਰ ਇਨ੍ਹਾਂ ਅੱਠ ਸਾਲਾਂ ਵਿਚ ਹਰ ਸਾਲ ਇਕ ਲੱਖ ਨੌਜਵਾਨਾਂ ਨੂੰ ਸਰਕਾਰੀ ਨੌਕਰੀਆਂ ਵੀ ਨਹੀਂ ਦੇ ਸਕੀ |
ਸਰਕਾਰ ਵਲੋਂ ਲੋਕ ਸਭਾ ਵਿਚ ਦਿਤੇ ਗਏ ਅੰਕੜਿਆਂ ਅਨੁਸਾਰ ਮਈ 2014 ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਸੱਤਾ ਸੰਭਾਲਣ ਤੋਂ ਲੈ ਕੇ ਹੁਣ ਤਕ ਕੁਲ 7 ਲੱਖ 22 ਹਜ਼ਾਰ 311 ਬਿਨੈਕਾਰਾਂ ਨੂੰ ਵੱਖ-ਵੱਖ ਸਰਕਾਰੀ ਵਿਭਾਗਾਂ ਵਿਚ ਸਰਕਾਰੀ ਨੌਕਰੀਆਂ ਦਿਤੀਆਂ ਗਈਆਂ ਹਨ | ਸਰਕਾਰ ਨੇ ਹਰ ਸਾਲ ਇਸ ਦੇ ਵੇਰਵੇ ਦਿਤੇ ਹਨ, ਜਿਸ ਤੋਂ ਪਤਾ ਲਗਦਾ ਹੈ ਕਿ 2018-19 'ਚ ਸਿਰਫ਼ 38,100 ਲੋਕਾਂ ਨੂੰ ਹੀ ਸੱਭ ਤੋਂ ਘੱਟ ਨੌਕਰੀ ਮਿਲੀ, ਜਦਕਿ ਹੈਰਾਨੀ ਦੀ ਗੱਲ ਹੈ ਕਿ ਇਸੇ ਸਾਲ ਸੱਭ ਤੋਂ ਵੱਧ 5 ਕਰੋੜ 9 ਲੱਖ 36 ਹਜ਼ਾਰ 479 ਲੋਕਾਂ ਨੇ ਅਪਲਾਈ ਕੀਤਾ ਸੀ | ਹਾਲਾਂਕਿ, ਸਾਲ 2019-20 ਵਿਚ, ਸੱਭ ਤੋਂ ਵਧ 1,47,096 ਨੌਜਵਾਨ ਸਰਕਾਰੀ ਨੌਕਰੀਆਂ ਪ੍ਰਾਪਤ ਕਰਨ ਵਿਚ ਕਾਮਯਾਬ ਹੋਏ | ਦੋ ਕਰੋੜ ਦੇ ਸਾਲਾਨਾ ਦਾਅਵਿਆਂ ਦੇ ਉਲਟ, ਇਹ ਅੰਕੜੇ ਦਸਦੇ
ਹਨ ਕਿ ਸਰਕਾਰ ਅਪਣੇ ਦਾਅਵੇ ਦਾ ਇਕ ਫ਼ੀ ਸਦੀ ਭਾਵ ਹਰ ਸਾਲ ਦੋ ਲੱਖ ਨੌਕਰੀਆਂ ਦੇਣ ਵਿਚ ਵੀ ਅਸਫ਼ਲ ਰਹੀ ਹੈ |
ਜਦੋਂ ਕਿ ਇਨ੍ਹਾਂ ਅੱਠ ਸਾਲਾਂ ਵਿਚ ਸਰਕਾਰੀ ਨੌਕਰੀਆਂ ਲਈ ਅਪਲਾਈ ਕਰਨ ਵਾਲੇ ਲੋਕਾਂ ਦੀ ਗਿਣਤੀ ਦਸਦੀ ਹੈ ਕਿ ਦੇਸ਼ ਵਿਚ ਕਿੰਨੀ ਬੇਰੁਜ਼ਗਾਰੀ ਹੈ | ਇਸ ਦੌਰਾਨ ਕੁਲ 22 ਕਰੋੜ 6 ਲੱਖ ਲੋਕਾਂ ਨੇ ਅਪਲਾਈ ਕੀਤਾ ਹੈ | ਸਰਕਾਰ ਵਿਚ ਇਸ ਗੱਲ ਨੂੰ ਲੈ ਕੇ ਵੀ ਭੰਬਲਭੂਸਾ ਬਣਿਆ ਹੋਇਆ ਹੈ ਕਿ ਨੌਕਰੀ ਲੱਭਣ ਵਾਲਿਆਂ ਅਤੇ ਪ੍ਰਾਪਤ ਕਰਨ ਵਾਲਿਆਂ ਵਿਚ ਇਹ ਪਾੜਾ ਕਿਵੇਂ ਪੂਰਾ ਕੀਤਾ ਜਾਵੇਗਾ | ਜਦੋਂ ਕਿ ਵਿਰੋਧੀ ਧਿਰ ਦਾ ਦਾਅਵਾ ਹੈ ਕਿ ਭਾਵੇਂ ਸਾਰੀਆਂ ਸੂਬਾ ਸਰਕਾਰਾਂ ਨੂੰ ਛੱਡ ਦਿਤਾ ਜਾਵੇ ਪਰ ਇਕੱਲੀ ਕੇਂਦਰ ਸਰਕਾਰ ਵਿਚ ਕਰੀਬ 30 ਲੱਖ ਅਸਾਮੀਆਂ ਖ਼ਾਲੀ ਪਈਆਂ ਹਨ | ਪਰ ਸਰਕਾਰ ਇਨ੍ਹਾਂ ਨੂੰ ਭਰਨਾ ਨਹੀਂ ਚਾਹੁੰਦੀ ਕਿਉਂਕਿ ਉਹ ਇਕ-ਇਕ ਕਰ ਕੇ ਸਾਰੇ ਮਹੱਤਵਪੂਰਨ ਅਦਾਰਿਆਂ ਦਾ ਨਿਜੀਕਰਨ ਕਰਨਾ ਚਾਹੁੰਦੀ ਹੈ | (ਏਜੰਸੀ)