ਸੀਰੀਆ ’ਚ ਆਈਐਸਆਈਐਸ ਦੀ ਅਗਵਾਈ ਕਰਨ ਵਾਲੀ ਅਮਰੀਕੀ ਔਰਤ ਗ੍ਰਿਫ਼ਤਾਰ

ਵਾਸ਼ਿੰਗਟਨ, 30 ਜਨਵਰੀ : ਅਮਰੀਕਾ ਦੇ ਨਿਆਂ ਵਿਭਾਗ ਨੇ ਇਕ ਅਮਰੀਕੀ ਔਰਤ ’ਤੇ ਸੀਰੀਆ ਵਿਚ ਇਸਲਾਮਿਕ ਸਟੇਟ (ਆਈਐਸਆਈਐਸ) ਦੀ ਇਕ ਆਲ-ਫ਼ੀਮੇਲ ਬਟਾਲੀਅਨ ਦੀ ਅਗਵਾਈ ਕਰਨ ਅਤੇ ਸੰਗਠਨ ਨੂੰ ਸਮੱਗਰੀ ਸਹਾਇਤਾ ਪ੍ਰਦਾਨ ਕਰਨ ਦਾ ਦੋਸ਼ ਲਗਾਇਆ ਹੈ। ਸ਼ਨੀਵਾਰ ਨੂੰ ਵਿਭਾਗ ਦੇ ਇਕ ਅਧਿਕਾਰਤ ਬਿਆਨ ਦੇ ਅਨੁਸਾਰ, ਵਰਜੀਨੀਆ ਦੇ ਪੂਰਬੀ ਜ਼ਿਲ੍ਹੇ ਦੀ ਅਦਾਲਤ ਵਿਚ 2019 ਵਿਚ ਦਾਇਰ ਇਕ ਅਪਰਾਧਿਕ ਸ਼ਿਕਾਇਤ ਹੁਣ ਖੋਲ੍ਹ ਦਿਤੀ ਗਈ ਹੈ। ਇਸ ਵਿਚ ਇਲਜ਼ਾਮ ਲਗਾਇਆ ਗਿਆ ਹੈ ਕਿ ਐਲੀਸਨ ਫ਼ਲੁਕ-ਅਕਰੇਨ ਨੇ ਇਸਲਾਮਿਕ ਸਟੇਟ ਵਲੋਂ ਇਕ ਆਲ-ਮਹਿਲਾ ਫ਼ੌਜੀ ਬਟਾਲੀਅਨ ਬਣਾਈ ਅਤੇ ਉਸ ਦੀ ਅਗਵਾਈ ਕੀਤੀ।
ਅਮਰੀਕੀ ਮਹਿਲਾ ਨੂੰ ਇਸ ਤੋਂ ਪਹਿਲਾਂ ਸੀਰੀਆ ’ਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਅਪਰਾਧਿਕ ਸ਼ਿਕਾਇਤ ਦੇ ਅਨੁਸਾਰ, ਕੰਸਾਸ ਦੀ ਇਕ ਸਾਬਕਾ ਨਿਵਾਸੀ ਐਲੀਸਨ ਐਲਿਜ਼ਾਬੈਥ ਫ਼ਲੁਕ-ਅਕਰੇਨ ਉਰਫ਼ ਐਲੀਸਨ ਐਲਿਜ਼ਾਬੈਥ ਬਰੂਕਸ ਉਰਫ਼ ਐਲੀਸਨ ਏਕਰੇਨ ਉਰਫ਼ ਉਮ ਮੁਹੰਮਦ ਅਲ-ਅਮਰੀਕੀ ਉਰਫ਼ ਉਮ ਮੁਹੰਮਦ ਅਤੇ ਉਰਫ਼ ਉਮ ਜਬਰਿਲ (42) ਕਈ ਸਾਲ ਪਹਿਲਾਂ ਅਤਿਵਾਦ ਫੈਲਾਉਣ ਜਾਂ ਸਮਰਥਨ ਕਰਨ ਦੇ ਉਦੇਸ਼ ਨਾਲ ਸੀਰੀਆ ਗਈ ਸੀ। ਉਹ ਕਥਿਤ ਤੌਰ ’ਤੇ ਘੱਟੋ-ਘੱਟ 2014 ਤੋਂ ਆਈਐਸ ਵਲੋਂ ਅਤਿਵਾਦ ਨਾਲ ਸਬੰਧਤ ਕਈ ਗਤੀਵਿਧੀਆਂ ਵਿਚ ਸ਼ਾਮਲ ਸੀ। ਇਸ ਤੋਂ ਇਲਾਵਾ ਔਰਤ ’ਤੇ ਅਮਰੀਕਾ ਦੇ ਕਾਲਜ ਕੈਂਪਸ ’ਤੇ ਸੰਭਾਵਿਤ ਹਮਲੇ ਲਈ ਆਈਐਸ ਮੈਂਬਰਾਂ ਦੀ ਯੋਜਨਾ ਬਣਾਉਣ ਅਤੇ ਭਰਤੀ ਕਰਨ ਅਤੇ ਖ਼ਤੀਬਾ ਨੁਸੈਬਾਹ ਨਾਮਕ ਆਈਐਸ ਬਟਾਲੀਅਨ ਦੀ ਅਗਵਾਈ ਕਰਨ ਦਾ ਦੋਸ਼ ਹੈ। 
ਇਸ ਬਟਾਲੀਅਨ ਵਿਚ ਔਰਤਾਂ ਨੂੰ ਆਟੋਮੈਟਿਕ ਹਥਿਆਰ ਐਨ-37, ਅਸਾਲਟ ਰਾਈਫਲਾਂ, ਗ੍ਰੇਨੇਡ ਅਤੇ ਸੁਸਾਈਡ ਬੈਲਟ ਦੀ ਵਰਤੋਂ ਦੀ ਸਿਖਲਾਈ ਦਿਤੀ ਜਾਂਦੀ ਹੈ। ਉਸ ਨੇ ਕਿਹਾ ਕਿ ਫ਼ਲੁਕ-ਅਕਰੇਨ ਕਥਿਤ ਤੌਰ ’ਤੇ ਆਈਐਸ ਮੈਂਬਰਾਂ ਨੂੰ ਰਿਹਾਇਸ਼ ਪ੍ਰਦਾਨ ਕਰਨ, ਆਈਐਸ ਨੇਤਾਵਾਂ ਦੁਆਰਾ ਦਿਤੇ ਭਾਸ਼ਣਾਂ ਦਾ ਅਨੁਵਾਦ ਕਰਨ, ਬੱਚਿਆਂ ਨੂੰ ਏ.ਕੇ.-47, ਅਸਾਲਟ ਰਾਈਫਲਾਂ ਅਤੇ ਆਤਮਘਾਤੀ ਬੈਲਟਾਂ ਦੀ ਵਰਤੋਂ ਕਰਨ ਦੀ ਸਿਖਲਾਈ ਦੇਣ ਅਤੇ ਕੱਟੜਪੰਥੀ ਸਿਧਾਂਤਾਂ ਨੂੰ ਸਿਖਾਉਣ ਵਿਚ ਸ਼ਾਮਲ ਹੈ।     (ਏਜੰਸੀ)