ਭਾਰਤ ਦੇ ਅਟਾਰੀ ਸਥਿਤ 'ਇੰਟੈਗਰੇਟਡ ਚੈੱਕ ਪੋਸਟ' 'ਤੇ ਪੂਜੇ ਟਰੱਕ ਦਾ ਪੂਰੀ ਤਰ੍ਹਾਂ ਨਿਰੀਖਣ ਕਰਨ ਵਾਲਾ 'ਫੁੱਲ ਬਾਡੀ ਟਰੱਕ ਸਕੈਨਰ' ਆ ਗਿਆ ਹੈ
ਪੰਜਾਬ: ਭਾਰਤ ਦੇ ਅਟਾਰੀ ਸਥਿਤ 'ਇੰਟੈਗਰੇਟਡ ਚੈੱਕ ਪੋਸਟ' 'ਤੇ ਪੂਜੇ ਟਰੱਕ ਦਾ ਪੂਰੀ ਤਰ੍ਹਾਂ ਨਿਰੀਖਣ ਕਰਨ ਵਾਲਾ 'ਫੁੱਲ ਬਾਡੀ ਟਰੱਕ ਸਕੈਨਰ' ਆ ਗਿਆ ਹੈ ਅਤੇ ਇਹ ਸਕੈਨਰ 15 ਅਪ੍ਰੈਲ ਤੋਂ ਅਪਣਾ ਕੰਮ ਕਰਨਾ ਸ਼ੁਰੂ ਕਰ ਦੇਵੇਗਾ। ਭਾਵੇਂ ਕਿ ਪਾਕਿਸਤਾਨ ਨਾਲ ਭਾਰਤ ਦਾ ਕਾਰੋਬਾਰ ਪੁਲਵਾਮਾ ਹਮਲੇ ਮਗਰੋਂ ਕਾਫ਼ੀ ਸੀਮਤ ਜਿਹਾ ਹੋ ਗਿਆ ਹੈ, ਪਰ ਫਿਰ ਵੀ ਪੂਰੇ ਟਰੱਕ ਦਾ ਪੂਰੀ ਤਰ੍ਹਾਂ ਨਿਰੀਖਣ ਕਰਨ ਵਾਲਾ ਸਕੈਨਰ ਇੱਥੇ ਲਗਾਇਆ ਜਾ ਰਿਹਾ ਹੈ।
ਇਹ ਦੇਸ਼ ਦਾ ਪਹਿਲਾ ਅਜਿਹਾ ਸਕੈਨਰ ਹੋਵੇਗਾ, ਜਿਸ ਵਿਚ ਪੂਰੇ ਟਰੱਕ ਦੀ ਪੂਰੀ ਬਾਰੀਕੀ ਨਾਲ ਨਿਰੀਖਣ ਕਰਨ ਦੀ ਸਮਰੱਥਾ ਹੋਵੇਗਾ। ਇਸ ਨਾਲ ਟਰੱਕ ਦੇ ਮਾਲ ਨੂੰ ਅੰਦਰੋਂ ਚੈੱਕ ਕਰਨ ਦੀ ਲੋੜ ਨਹੀਂ ਪਵੇਗੀ ਬਲਕਿ ਇਸ ਸਕੈਨਰ ਰਾਹੀਂ ਪਤਾ ਚੱਲ ਜਾਵੇਗਾ ਕਿ ਟਰੱਕ ਵਿਚ ਕੋਈ ਗ਼ੈਰਕਾਨੂੰਨੀ ਵਸਤੂ ਤਾਂ ਨਹੀਂ ਲੱਦੀ ਹੋਈ।
ਲੈਂਡ ਪੋਰਟਸ ਅਥਾਰਟੀ ਆਫ਼ ਇੰਡੀਆ ਅਨੁਸਾਰ ਇਸ ਸਕੈਨਰ ਦੀ ਮਦਦ ਨਾਲ ਨਸ਼ਿਆਂ ਤੇ ਹਥਿਆਰਾਂ ਦੀ ਸਮੱਗਲਿੰਗ ਰੋਕਣ ਵਿਚ ਮਦਦ ਮਿਲੇਗੀ। ਫ਼ਿਲਹਾਲ ਅਟਾਰੀ ਬਾਰਡਰ 'ਤੇ ਇਹ ਚੈਕਿੰਗ ਨਜ਼ਰਾਂ ਤੇ ਹੱਥਾਂ ਰਾਹੀਂ ਅਤੇ ਜਾਂ ਖੋਜੀ ਕੁੱਤਿਆਂ ਦੀ ਮਦਦ ਨਾਲ ਹੋ ਰਹੀ ਹੈ, ਪਰ ਹੁਣ ਇਸ ਸਕੈਨਰ ਨਾਲ ਇਹ ਪ੍ਰਕਿਰਿਆ ਹੋਰ ਤੇਜ਼ ਹੋ ਜਾਵੇਗੀ।
Full body truck scanner
ਭਾਰਤ ਨੂੰ ਪੂਰੇ ਟਰੱਕ ਦਾ ਨਿਰੀਖਣ ਕਰਨ ਵਾਲਾ ਸਕੈਨਰ ਭਾਵੇਂ ਹੁਣ ਮਿਲਿਆ ਹੈ, ਪਰ ਪਾਕਿਸਤਾਨ ਆਪਣੇ ਵਾਹਗਾ ਬਾਰਡਰ 'ਤੇ ਅਜਿਹੇ ਦੋ ਸਕੈਨਰ ਪਹਿਲਾਂ ਤੋਂ ਹੀ ਵਰਤ ਰਿਹਾ ਹੈ। ਕੇਂਦਰ ਸਰਕਾਰ ਨੇ ਅਜਿਹੇ ਪੰਜ ਸਕੈਨਰ ਮਨਜ਼ੂਰ ਕੀਤੇ ਹਨ ਜਿਨ੍ਹਾਂ ਵਿਚੋਂ ਇਕ ਅਟਾਰੀ–ਵਾਹਗਾ ਬਾਰਡਰ 'ਤੇ ਲੱਗ ਰਿਹਾ ਹੈ ਤੇ ਬਾਕੀ ਦੇ ਭਾਰਤ–ਪਾਕਿਸਤਾਨ ਸਰਹੱਦ 'ਤੇ ਪੁੰਛ–ਚੌਕੰਦਾਬਾਦ (ਜੰਮੂ–ਕਸ਼ਮੀਰ), ਉੜੀ–ਸਲਾਮਾਬਾਦ ਵਿਖੇ, ਭਾਰਤ–ਬੰਗਲਾਦੇਸ਼ ਸਰਹੱਦ 'ਤੇ ਪੇਤਰਾਪੋਲ (ਕੋਲਕਾਤਾ) ਵਿਖੇ ਅਤੇ ਭਾਰਤ–ਨੇਪਾਲ ਸਰਹੱਦ 'ਤੇ ਰਕਸੌਲ (ਬਿਹਾਰ) ਵਿਖੇ ਲੱਗਣੇ ਹਨ।
ਦੱਸ ਦਈਏ ਕਿ ਅਟਾਰੀ 'ਇੰਟੈਗਰੇਟਡ ਚੈੱਕ ਪੋਸਟ' ਦਾ ਨੀਂਹ–ਪੱਥਰ ਸਾਲ 2010 ਦੌਰਾਨ ਰੱਖਿਆ ਗਿਆ ਸੀ। ਸੁਰੱਖਿਆ ਏਜੰਸੀਆਂ ਵਲੋਂ ਕਾਫ਼ੀ ਸਮੇਂ ਤੋਂ ਸਮੱਗਲਿੰਗ ਰੋਕਣ ਲਈ ਅਜਿਹੇ ਸਕੈਨਰ ਦੀ ਮੰਗ ਕੀਤੀ ਜਾ ਰਹੀ ਸੀ। ਇਸ ਸਕੈਨਰ ਦੇ ਇਕ ਪ੍ਰੋਜੈਕਟ 'ਤੇ 23 ਕਰੋੜ ਰੁਪਏ ਦਾ ਖ਼ਰਚ ਆਇਆ ਹੈ। ਹੁਣ ਦੇਖਣਾ ਹੋਵੇਗਾ ਕਿ ਇਹ ਸਕੈਨਰ ਕਾਰੋਬਾਰੀ ਸਰਹੱਦੀ ਚੈੱਕ ਪੋਸਟ 'ਤੇ ਸਮਗਲਿੰਗ ਰੋਕਣ ਵਿਚ ਕਿੰਨਾ ਕੁ ਕਾਰਗਰ ਸਾਬਤ ਹੁੰਦਾ ਹੈ।
