ਨਹੀਂ ਖੁਲਿ੍ਹਆ ਐਂਬੂਲੈਂਸ ਦਾ ਦਰਵਾਜ਼ਾ, ਜ਼ਖ਼ਮੀ ਵਿਅਕਤੀ ਦੀ ਤੜਫ-ਤੜਫ ਕੇ ਹੋਈ ਐਂਬੂਲੈਂਸ ਵਿਚ ਹੀ ਮੌਤ

ਕੋਝੀਕੋਡ, 30 ਅਗੱਸਤ : ਕੇਰਲ ਦੇ ਕੋਝੀਕੋਡ 'ਚ ਸਕੂਟਰ ਦੀ ਟੱਕਰ ਨਾਲ ਜ਼ਖ਼ਮੀ ਹੋਏ ਇਕ ਵਿਅਕਤੀ ਦੀ ਐਂਬੂਲੈਂਸ ਦਾ ਦਰਵਾਜਾ ਨਾ ਖੁਲ੍ਹਣ ਕਾਰਨ ਗੱਡੀ ਵਿਚ ਹੀ ਮੌਤ ਹੋ ਗਈ | ਇਹ ਜਾਣਕਾਰੀ ਪੁਲਿਸ ਸੂਤਰਾਂ ਨੇ ਸਾਂਝੀ ਕੀਤੀ ਹੈ | ਉਨ੍ਹਾਂ ਦਸਿਆ ਕਿ ਜ਼ਖ਼ਮੀ ਵਿਅਕਤੀ ਨੂੰ  ਸਰਕਾਰੀ ਮੈਡੀਕਲ ਹਸਪਤਾਲ ਲਿਆਂਦਾ ਗਿਆ ਪਰ ਤਕਨੀਕੀ ਖਰਾਬੀ ਕਾਰਨ ਐਂਬੂਲੈਂਸ ਦਾ ਦਰਵਾਜਾ ਨਹੀਂ ਖੁਲਿ੍ਹਆ | ਸੋਮਵਾਰ ਨੂੰ  ਵਾਪਰੀ ਇਸ ਘਟਨਾ ਦੇ ਸ਼ਿਕਾਰ ਵਿਅਕਤੀ ਦੀ ਪਛਾਣ ਪੁਲਿਸ ਨੇ 66 ਸਾਲਾ ਕੋਇਮੋਨ ਵਜੋਂ ਕੀਤੀ ਹੈ, ਜੋ ਕਿ ਨੇੜਲੇ ਇਲਾਕੇ ਫਿਰੋਕ ਦਾ ਰਹਿਣ ਵਾਲਾ ਸੀ | ਸੂਤਰਾਂ ਨੇ ਦਸਿਆ ਕਿ ਐਂਬੂਲੈਂਸ ਦਾ ਦਰਵਾਜਾ ਕਰੀਬ ਅੱਧੇ ਘੰਟੇ ਤਕ ਫਸਿਆ ਰਿਹਾ, ਜਿਸ ਕਾਰਨ ਉਸ ਨੂੰ  ਹਸਪਤਾਲ ਦੇ ਐਕਸੀਡੈਂਟ ਵਾਰਡ 'ਚ ਸ਼ਿਫਟ ਕਰਨ ਵਿਚ ਦੇਰੀ ਹੋਈ | ਐਂਬੂਲੈਂਸ ਦੇ ਡਰਾਈਵਰ ਅਤੇ ਸਹਾਇਕ ਨੇ ਗੱਡੀ ਦਾ ਦਰਵਾਜਾ ਖੋਲ੍ਹਣ ਦੀ ਕਾਫ਼ੀ ਕੋਸ਼ਿਸ਼ ਕੀਤੀ, ਪਰ ਕਾਮਯਾਬ ਨਹੀਂ ਹੋਏ | 
ਸੂਤਰਾਂ ਨੇ ਦਸਿਆ ਕਿ ਬਾਅਦ ਵਿਚ ਨੇੜੇ ਖੜ੍ਹੇ ਲੋਕਾਂ ਨੇ ਸੀਸ਼ਾ ਤੋੜ ਕੇ ਐਂਬੂਲੈਂਸ ਦਾ ਦਰਵਾਜਾ ਅੰਦਰੋਂ ਖੋਲਿ੍ਹਆ ਪਰ ਉਦੋਂ ਤਕ ਬਹੁਤ ਦੇਰ ਹੋ ਚੁਕੀ ਸੀ | ਪੁਲਿਸ ਨੇ ਕਿਹਾ ਕਿ ਹਸਪਤਾਲ ਤੋਂ ਘਟਨਾ ਦੀ ਹੋਰ ਜਾਣਕਾਰੀ ਮਿਲਣੀ ਬਾਕੀ ਹੈ | ਸੂਬੇ ਦੀ ਸਿਹਤ ਮੰਤਰੀ ਵੀਨਾ ਜਾਰਜ ਨੇ ਇਸ ਪੂਰੇ ਘਟਨਾਕ੍ਰਮ ਦੀ ਜਾਂਚ ਦੇ ਹੁਕਮ ਦਿਤੇ ਹਨ |                 (ਏਜੰਸੀ)