ਚੰਡੀਗੜ੍ਹ, 18 ਅਕਤੂਬਰ (ਨੀਲ ਭਲਿੰਦਰ ਸਿੰਘ) : ਦੀਵਾਲੀ ਤੋਂ ਐਨ ਪਹਿਲਾਂ ਸੰਗਰੂਰ ਜ਼ਿਲ੍ਹੇ ਖ਼ਾਸਕਰ ਸੁਨਾਮ ਦੇ ਨਿੱਕੇ ਅਤੇ ਆਰਜ਼ੀ ਦੁਕਾਨਦਾਰਾਂ ਨੂੰ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਕੋਲੋਂ ਅੱਜ ਵੱਡੀ ਰਾਹਤ ਮਿਲ ਗਈ। ਹਾਈ ਕੋਰਟ ਦੇ ਇਕਹਿਰੇ ਬੈਂਚ ਨੇ ਜ਼ਿਲ੍ਹੇ ਦੇ ਇਨ੍ਹਾਂ ਦੁਕਾਨਦਾਰਾਂ ਆਦਿ ਨੂੰ ਦੋ ਦਿਨ 18 ਅਤੇ 19 ਅਕਤੂਬਰ ਦੌਰਾਨ ਦਰਮਿਆਨੇ ਪੱਧਰ ਦੇ (ਕੰਨ-ਪਾੜੂ ਨਹੀਂ) ਪਟਾਕੇ ਵੇਚਣ ਦੀ ਇਜਾਜ਼ਤ ਦੇ ਦਿਤੀ।ਦੁਕਾਨਦਾਰਾਂ ਨੇ ਦੀਵਾਲੀ ਦੀਆਂ ਛੁੱਟੀਆਂ ਕਾਰਨ ਹੰਗਾਮੀ ਤੌਰ 'ਤੇ ਛੁੱਟੀਆਂ ਵਾਲੇ ਬੈਂਚ ਕੋਲ ਪਹੁੰਚ ਕੀਤੀ ਸੀ। ਜਸਟਿਸ ਰਾਜਬੀਰ ਸ਼ੇਰਾਵਤ ਦੇ ਛੁੱਟੀਆਂ ਵਾਲੇ ਬੈਂਚ ਨੂੰ ਦਸਿਆ ਗਿਆ ਕਿ ਹਾਈ ਕੋਰਟ ਦੇ ਦੋਹਰੇ ਬੈਂਚ ਦੇ ਹੀ 13 ਅਕਤੂਬਰ 2017 ਦੇ ਹੁਕਮਾਂ ਮੁਤਾਬਕ ਜ਼ਿਲ੍ਹਾ ਪ੍ਰਸਾਸ਼ਨ ਵਲੋਂ ਪਟਾਕੇ ਵੇਚਣ ਹਿਤ ਇਛੁੱਕ ਲੋਕਾਂ ਕੋਲੋਂ ਅਰਜ਼ੀਆਂ ਮੰਗੀਆਂ ਜਾਣੀਆਂ ਸਨ ਅਤੇ ਪਿਛਲੇ ਸਾਲ ਜਾਰੀ ਅਰਜ਼ੀ ਲਾਇਸੰਸਾਂ ਦੇ ਵੀਹ ਫ਼ੀ ਸਦੀ ਇਸ ਵਾਰ ਜਾਰੀ ਕੀਤੇ ਜਾਣੇ ਸਨ ਪਰ ਪ੍ਰਸ਼ਾਸਨ ਮੁਤਾਬਕ ਪਿਛਲੇ ਸਾਲ ਜ਼ਿਲ੍ਹੇ ਅੰਦਰ ਕੋਈ ਲਾਇਸੰਸ ਜਾਰੀ ਹੀ ਨਾ ਕੀਤਾ ਗਿਆ ਹੋਣ ਕਰ ਕੇ ਇਸ ਵਾਰ ਅਦਾਲਤੀ ਹੁਕਮਾਂ ਮੁਤਾਬਕ ਵੀਹ ਫ਼ੀ ਸਦੀ ਨੂੰ ਜਾਰੀ ਕਰਨ ਹਿਤ ਅਰਜ਼ੀਆਂ ਮੰਗੀਆਂ ਹੀ ਨਹੀਂ ਗਈਆਂ।
ਦੁਕਾਨਦਾਰਾਂ ਦੇ ਵਕੀਲ ਅਮਨ ਬਾਂਸਲ ਨੇ ਬੈਂਚ ਨੂੰ ਦਸਿਆ ਕਿ ਪਟੀਸ਼ਨਰ ਨਿੱਕੇ ਦੁਕਾਨਦਾਰ ਹਨ ਅਤੇ ਬੜੀ ਹੀ ਸੀਮਤ ਮਾਤਰਾ ਵਿਚ ਦੀਵਾਲੀ ਮੌਕੇ ਅੱਗੇ ਵੀ ਪਟਾਕੇ ਵੇਚ ਕੇ ਰੋਜ਼ੀ ਰੋਟੀ ਕਮਾਉਂਦੇ ਆਏ ਹਨ। ਉਨ੍ਹਾਂ ਇਸ ਵਾਰ ਵੀ ਬੜੀ ਹੀ ਸੀਮਤ ਮਾਤਰਾ 'ਚ ਦਰਮਿਆਨੀ ਅਤੇ ਹੇਠਲੀ ਪੱਧਰ ਦੇ ਪਟਾਕੇ ਵੇਚਣ ਦਾ ਵਾਅਦਾ ਕੀਤਾ ਹੈ। ਅਪੀਲ ਕੀਤੀ ਗਈ ਕਿ ਦੀਵਾਲੀ ਦਾ ਦਿਨ ਆ ਚੁਕਾ ਹੈ ਅਤੇ ਹੁਣ ਅਰਜ਼ੀ ਲਾਇਸੰਸ ਜਾਰੀ ਕਰਨ ਦੀ ਪ੍ਰਕਿਰਿਆ ਮੁਕੰਮਲ ਕਰਨ ਦੀ ਕੋਈ ਸੰਭਾਵਨਾ ਹੀ ਨਹੀਂ ਰਹਿ ਗਈ। ਅਜਿਹੇ ਵਿਚ ਉਨ੍ਹਾਂ ਨੂੰ ਪਟਾਕੇ ਵੇਚਣ ਦੀ ਪ੍ਰਵਾਨਗੀ ਦਿਤੀ ਜਾਵੇ। ਅੱਜ ਵਾਲੀ ਸੁਣਵਾਈ ਮੌਕੇ ਪੰਜਾਬ ਸਰਕਾਰ ਵਲੋਂ ਸੀਨੀਅਰ ਡਿਪਟੀ ਐਡਵੋਕੇਟ ਜਨਰਲ ਅਮਿਤ ਮਹਿਤਾ ਅਤੇ ਸੁਨਾਮ ਦੇ ਥਾਣਾ ਮੁਖੀ ਭਰਪੂਰ ਸਿੰਘ ਵੀ ਅਪਣਾ ਪੱਖ ਰੱਖਣ ਲਈ ਮੌਜੂਦ ਰਹੇ। ਸਰਕਾਰੀ ਨੁਮਾਇੰਦੇ ਨੇ ਇਸ ਵਾਰ ਵੀ ਅਰਜ਼ੀਆਂ ਨਾ ਮੰਗੀਆਂ ਗਈਆਂ ਹੋਣ ਦੀ ਪੁਸ਼ਟੀ ਕੀਤੀ। ਬੈਂਚ ਨੇ ਸਮੂਹ ਧਿਰਾਂ ਦਾ ਪੱਖ ਸੁਣਨ ਮਗਰੋਂ ਜਿਲੇ ਅੰਦਰ ਪਿਛਲੀ ਵਾਰ ਦੀ ਤਰਜ਼ 'ਤੇ ਇਸ ਵਾਰ ਵੀ ਪਟਾਕੇ ਵੇਚਣ ਲਈ ਦੋ ਦਿਨ 19 ਅਕਤੂਬਰ ਤਕ ਦੀ ਆਗਿਆ ਦੇ ਦਿਤੀ। ਨਾਲ ਹੀ ਵੱਧ ਆਵਾਜ਼ ਅਤੇ ਧਮਾਕਾਖ਼ੇਜ਼ ਪਟਾਕੇ ਨਾ ਵੇਚਣ ਦਾ ਵੀ ਪਾਬੰਦ ਕੀਤਾ ਗਿਆ ਹੈ।
