ਬਠਿੰਡਾ, 13 ਦਸੰਬਰ (ਸੁਖਜਿੰਦਰ ਮਾਨ): ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਅਕਾਲੀਆਂ ਨਾਲ ਧੱਕੇਸ਼ਾਹੀਆਂ ਤੋਂ ਕਾਂਗਰਸੀਆਂ ਨੂੰ ਗੁਰੇਜ ਕਰਨ ਦੀ ਚੇਤਾਵਨੀ ਦਿੰਦਿਆਂ ਐਲਾਨ ਕੀਤਾ ਹੈ ਕਿ ਉਹ ਨਾ ਜ਼ੁਲਮ ਕਰਨਗੇ ਅਤੇ ਨਾ ਹੀ ਜ਼ੁਲਮ ਨੂੰ ਸਹਿਣਗੇ। ਅੱਜ ਇਥੇ ਅਪਣੇ ਹਲਕੇ ਦੇ ਇਕ ਸਰਪੰਚ ਦਾ ਸਥਾਨਕ ਦਿਉਲ ਹਸਪਤਾਲ 'ਚ ਹਾਲ-ਚਾਲ ਪੁੱਛਣ ਆਏ ਸ: ਬਾਦਲ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਾਂਗਰਸੀਆਂ ਦੀਆਂ ਗਿੱਦੜਭਵਕੀਆਂ ਤੋਂ ਨਾ ਡਰਨ ਦਾ ਦਾਅਵਾ ਕਰਦਿਆਂ ਕਿਹਾ ਕਿ ਇਹ  ਕਿਹੜੇ ਬਾਗ਼ ਦੀ ਮੂਲੀ ਹਨ ਅਕਾਲੀਆਂ ਨੇ ਤਾਂ ਇੰਦਰਾ ਗਾਂਧੀ ਸਹਿਤ ਵੱਡਿਆਂ-ਵੱਡਿਆਂ ਦੀਆਂ ਗੋਡਣੀਆਂ ਲਗਵਾਈਆਂ ਹਨ।
ਸ਼੍ਰੋਮਣੀ ਅਕਾਲੀ ਦਲ ਦੇ ਸਰਪ੍ਰਸਤ ਪ੍ਰਕਾਸ਼ ਸਿੰਘ ਬਾਦਲ ਨੇ ਭਲਕੇ ਸ੍ਰੀ ਅੰਮ੍ਰਿਤਸਰ ਸਾਹਿਬ ਵਿਖੇ ਅਕਾਲੀ ਦਲ ਦੀ ਵਰ੍ਹੇਗੰਢ ਮਨਾਉਣ ਦੀ ਗੱਲ ਕਰਦਿਆਂ ਕਿਹਾ ਕਿ ਅੱਜ ਤੋਂ 92 ਸਾਲ ਪਹਿਲਾਂ ਬੇਇਨਸਾਫ਼ੀ, ਜਬਰ ਤੇ ਜ਼ੁਲਮ ਵਿਰੁਧ ਹੀ ਇਸ ਦਾ ਜਨਮ ਹੋਇਆ ਸੀ ਜਿਸ ਦੇ ਚੱਲਦੇ ਇਹ ਹਰ ਧੱਕੇਸ਼ਾਹੀ ਵਿਰੁਧ ਆਵਾਜ਼ ਉਠਾਉਂਦਾ ਰਹੇਗਾ। 

ਸਥਾਨਕ ਸੰਸਥਾਵਾਂ ਦੀਆਂ ਹੋ ਰਹੀਆਂ ਚੋਣਾਂ ਬਾਰੇ ਬੋਲਦਿਆਂ ਵੱਡੇ ਬਾਦਲ ਨੇ ਇਸ ਨੂੰ ਕਾਂਗਰਸ ਦੀਆਂ ਨਾਮਜ਼ਦਗੀਆਂ ਕਰਾਰ ਦਿੰਦਿਆਂ ਕਿਹਾ ਕਿ ਇਹ ਲੋਕਤੰਤਰ ਦੇ ਨਾਂ ਉਪਰ ਧੱਕਾ ਹੋ ਰਿਹਾ, ਜਿਸ ਵਿਚ ਵਿਰੋਧੀਆਂ ਨੂੰ ਕਾਗਜ਼ ਹੀ ਨਹੀਂ ਭਰਨ ਦਿਤੇ ਜਾ ਰਹੇ।  ਪੰਜ ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਰਹੇ ਪ੍ਰਕਾਸ਼ ਸਿੰਘ ਬਾਦਲ ਨੇ ਮੌਜੂਦਾ ਕੈਪਟਨ ਸਰਕਾਰ ਨੂੰ ਮਾੜੀ ਸਰਕਾਰ ਗਰਦਾਨਿਆਂ ਆਖਿਆ ਕਿ ਇਸ ਵਿਚ ਨਾ ਵਿਕਾਸ ਦੇ ਕੰਮ ਹੋ ਰਹੇ ਹਨ ਅਤੇ ਨਾ ਹੀ ਚੋਣਾਂ ਸਮੇਂ ਕੀਤੇ ਵਾਅਦੇ ਪੂਰੇ ਕੀਤੇ ਜਾ ਰਹੇ ਹਨ, ਉਲਟਾ ਵਿਰੋਧੀਆਂ 'ਤੇ ਜਬਰ ਜ਼ੁਲਮ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਚੋਣਾਂ ਜਿੱਤਣ ਤੋਂ ਬਾਅਦ ਲੱਗਦਾ ਕੈਪਟਨ ਸਰਕਾਰ ਦੀ ਇੱਕੋ-ਇੱਕ ਨੀਤੀ ਪੰਜ ਸਾਲਾਂ ਮੌਜਾਂ ਲੁੱਟਣ ਦੀ ਰਹਿ ਗਈ ਹੈ।