ਕਰਨਾਲ, 6 ਮਾਰਚ (ਪਲਵਿੰਦਰ ਸਿੰਘ ਸੱਗੂ): ਸਵੇਰੇ ਕਰਨਾਲ ਜੀ.ਟੀ. ਰੋਡ ਪਿੰਡ ਸਿਆਮਗੜ੍ਹ ਨੇੜੇ ਇਕ ਕਾਰ ਤੇ ਟਰੱਕ ਵਿਚ ਜ਼ੋਰਦਾਰ ਟੱਕਰ ਹੋਈ ਜਿਸ ਕਾਰਨ ਕਾਰ ਵਿਚ ਭਿਆਨਕ ਅੱਗ ਲੱਗ ਗਈ। ਅੱਗ ਲੱਗਣ ਕਾਰਨ ਕਾਰ ਵਿਚ ਸਵਾਰ ਇਕ 7 ਮਹੀਨੇ ਦੀ ਬੱਚੀ ਸਮੇਤ 4 ਲੋਕ ਜਿਊਂਦਾ ਸੜ ਗਏ। ਇਹ ਹਾਦਸਾ ਕਲ ਸਵੇਰੇ 3.30 ਵਜੇ ਦੇ ਕਰੀਬ ਹੋਇਆ। ਹਾਦਸੇ ਵਿਚ ਮਰਨ ਵਾਲਿਆਂ ਦੀ ਪਛਾਣ 23 ਸਾਲ ਦੇ ਸਚਿੰਤ ਚੋਪੜਾ, ਉਸ ਦੀ ਪਤਨੀ 21 ਸਾਲ ਦੀ ਭਾਵਨਾ ਚੋਪੜਾ, ਬੇਟੀ 7 ਮਹੀਨੇ ਦੀ ਜੁਸਰਿਕਾ ਅਤੇ 56 ਸਾਲ ਦੀ ਨਿਸ਼ਾ ਭੋਲਾ ਵਜੋਂ ਹੋਈ ਹੈ। ਇਹ ਮਰਨ ਵਾਲੇ ਦਿੱਲੀ ਦੇ ਹਰੀ ਨਗਰ ਦੇ ਰਹਿਣ ਵਾਲੇ ਸਨ ਅਤੇ ਇਹ ਲੋਕ ਅੰਮ੍ਰਿਤਸਰ ਤੋਂ ਦਿੱਲੀ ਜਾ ਰਹੇ ਸਨ ਤਾਂ ਕਰਨਾਲ ਨੇੜੇ ਪਿੰਡ ਸਿਆਮਗੜ੍ਹ ਦੇ ਕੋਲ ਆਉਂਦੇ ਹੀ
ਸਚਿੰਤ ਜੋ ਕਾਰ ਚਲਾ ਰਿਹਾ ਸੀ, ਦਾ ਕਾਰ ਤੋਂ ਸੰਤੁਲਨ ਵਿਗੜ ਗਿਆ ਅਤੇ ਕਾਰ ਡਿਵਾਇਡਰ ਨੂੰ ਪਾਰ ਕਰਦੀ ਹੋਈ ਦੂਜੇ ਪਾਸੇ ਆ ਰਹੇ ਟਰੱਕ ਨਾਲ ਟਕਰਾ ਗਈ। ਕਾਰ ਦੇ ਪਰਖਚੇ ਉੱਡ ਗਏ ਜਿਸ ਤੋਂ ਬਾਅਦ ਕਾਰ ਨੂੰ ਅੱਗ ਲੱਗ ਗਈ ਜਦੋਂ ਤਕ ਹਾਦਸਾਗ੍ਰਸਤ ਕੋਲ ਕੋਈ ਮਦਦ ਪਹੁੰਚਦੀ ਉਸ ਸਮੇਂ ਤਕ ਚਾਰੋ ਜਿਊਂਦਾ ਸੜ ਗਏ। ਇਸ ਦੇ ਨਾਲ ਹੀ ਟਰੱਕ ਨੂੰ ਵੀ ਅੱਗ ਲੱਗ ਗਈ।ਥਾਣਾ ਤਰਾਵੜੀ ਤੋਂ ਥਾਣਾ ਇੰਚਾਰਜ ਮੌਕੇ 'ਤੇ ਪਹੁੰਚੇ ਅਤੇ ਅੱਗ ਬੁਝਾਉਣ ਵਾਲੀਆਂ ਗੱਡੀਆਂ ਵੀ ਪਹੁੰਚ ਗਈਆਂ ਤੇ ਅੱਗ 'ਤੇ ਕਾਬੂ ਪਾਇਆ ਗਿਆ। ਲਾਸ਼ਾਂ ਨੂੰ ਬਾਹਰ ਕੱਢ ਕੇ ਕਰਨਾਲ ਦੇ ਕਲਪਨਾ ਚਾਵਲਾ ਮੈਡੀਕਲ ਕਾਲਜ ਵਿਖੇ ਪੋਸਟਮਾਰਟਮ ਲਈ ਭੇਜ ਦਿਤਾ ਹੈ ਅਤੇ ਟਰੱਕ ਚਾਲਕ ਵਿਰੁਧ ਮਾਮਲਾ ਦਰਜ ਕਰ ਕੇ ਕਾਰਵਾਈ ਕੀਤੀ ਜਾ ਰਹੀ ਹੈ।