ਲੁਧਿਆਣਾ: ਗੰਨੇ ਦਾ ਰਸ ਪੀਣ ਵਾਲੇ ਸ਼ੌਕੀਨਾਂ ਲਈ ਖੁਸ਼ਖਬਰੀ ਹੈ। ਦੱਸ ਦਈਏ ਕਿ ਹੁਣ ਰੇਹੜੀ 'ਤੇ ਮੱਖੀਆਂ ਅਤੇ ਬਿਨਾਂ ਸਾਫ-ਸਫਾਈ ਦੇ ਵਿਕ ਰਹੇ ਗੰਨੇ ਦੇ ਰਸ ਦੀ ਜਗ੍ਹਾ ਬੋਤਲ ਬੰਦ ਜੂਸ ਮਿਲੇਗਾ। ਪੰਜਾਬ ਐਗਰੀਕਲਚਰ ਯੂਨੀਵਰਸਿਟੀ (ਪੀ. ਏ. ਯੂ.) ਦੇ 'ਡਿਪਾਰਟਮੈਂਟ ਆਫ ਫੂਡ ਸਾਇੰਸ ਐਂਡ ਤਕਨਾਲੋਜੀ' ਮਹਿਕਮੇ ਨੇ ਬਿਨਾ ਕਿਸੇ ਕੈਮੀਕਲ ਕੁਦਰਤੀ ਕੀਟਾਣੂ ਰਹਿਤ ਗੰਨੇ ਦਾ ਰਸ ਤਿਆਰ ਕੀਤਾ ਹੈ। 
ਇਸ ਦੀ ਖਾਸੀਅਤ ਇਹ ਹੈ ਕਿ ਇਸ ਨੂੰ ਸਧਾਰਨ ਤਾਪਮਾਨ 'ਚ ਇੱਕ ਸਾਲ ਤੱਕ ਘਰ 'ਚ ਰੱਖਿਆ ਜਾ ਸਕਦਾ ਹੈ ਅਤੇ ਫਰਿੱਜ 'ਚ ਠੰਡਾ ਕਰਨ ਤੋਂ ਬਾਅਦ ਪੀਤਾ ਜਾ ਸਕਦਾ ਹੈ। ਸੂਬੇ 'ਚ ਪਹਿਲੀ ਵਾਰ 12 ਅਕਤੂਬਰ ਨੂੰ ਯੂਨੀਵਰਸਿਟੀ ਵਲੋਂ ਲਾਏ ਜਾ ਰਹੇ ਇਕ ਦਿਨਾ 'ਫੂਡ ਇੰਡਸਟਰੀ ਐਂਡ ਕ੍ਰਾਫਟ' ਮੇਲੇ 'ਚ ਬੋਤਲ ਬੰਦ ਗੰਨੇ ਦੇ ਰਸ ਦੇ ਨਾਲ-ਨਾਲ ਇਸ ਤਕਨਾਲੋਜੀ ਨੂੰ ਵੀ ਖਰੀਦਿਆ ਜਾ ਸਕਦਾ ਹੈ।
ਡਿਪਾਰਟਮੈਂਟ ਆਫ ਫੂਡ ਸਾਇੰਸ ਐਂਡ ਤਕਨਾਲੋਜੀ ਦੀ ਮੁਖੀ ਪੂਨਮ ਸਚਦੇਵਾ ਨੇ ਦੱਸਿਆ ਕਿ ਦੇਸ਼ 'ਚ ਸਿਰਫ ਪੀ. ਏ. ਯੂ. ਨੇ ਹੀ ਰਿਸਰਚ ਕਰਕੇ ਪਹਿਲੀ ਵਾਰ ਇੱਕ ਸਾਲ ਤੱਕ ਸਟੋਰ ਕਰਕੇ ਗੰਨੇ ਦਾ ਰਸ ਰੱਖਣ ਦੀ ਵਿਧੀ ਤਿਆਰ ਕੀਤੀ ਹੈ। ਇਸ ਤੋਂ ਪਹਿਲਾਂ ਗੰਨੇ ਦੇ ਰਸ 'ਤੇ 2 ਸੂਬਿਆਂ ਨੇ ਰਿਸਰਚ ਕੀਤੀ ਸੀ, ਜੋ ਸਿਰਫ 2 ਤੋਂ 3 ਮਹੀਨਿਆਂ ਤੱਕ ਹੀ ਸਟੋਰ ਕੀਤਾ ਜਾ ਸਕਦਾ ਹੈ।
ਉਨ੍ਹਾਂ ਨੇ ਦੱਸਿਆ ਕਿ ਗੰਨੇ ਨੂੰ ਪੂਰੀ ਤਰ੍ਹਾਂ ਧੋ ਕੇ ਥਰਮਲ ਪ੍ਰੋਸੈੱਸ ਰਾਹੀਂ ਜੂਸ ਗਰਮ ਕੀਤਾ ਗਿਆ। ਇਸ 'ਚ ਕੁਦਰਤੀ ਅਦਰਕ, ਨਿੰਬੂ, ਪੁਦੀਨਾ ਪਾਇਆ ਗਿਆ। ਫਿਰ ਇਸ ਨੂੰ ਤਕਨੀਕੀ ਵਿਧੀ ਨਾਲ ਕੀਟਾਣੂ ਰਹਿਤ ਕਰਕੇ ਬੋਤਲ 'ਚ ਬੰਦ ਕੀਤਾ ਗਿਆ। ਰਸ ਦਾ ਸਭ ਤੋਂ ਵੱਡਾ ਫਾਇਦ ਇਹ ਹੈ ਕਿ ਇਹ ਹਾਈਜੀਨਕ ਹੈ।
