ਕੋਟਕਪੂਰਾ, 28 ਦਸੰਬਰ (ਗੁਰਿੰਦਰ ਸਿੰਘ) : ਪਰਕਾਸ਼ ਸਿੰਘ ਬਾਦਲ ਅਤੇ ਸੁਖਬੀਰ ਸਿੰਘ ਬਾਦਲ ਵਲੋਂ ਇਕ ਤੋਂ ਵੱਧ ਵਾਰ ਐਲਾਨ ਕੀਤਾ ਗਿਆ ਕਿ ਪੰਜਾਬੀ ਸੂਬੇ ਦੇ ਮੋਰਚੇ ਸਮੇਤ ਹੋਰ ਪ੍ਰੋਗਰਾਮਾਂ ਮੌਕੇ ਅਕਾਲੀ ਦਲ ਲਈ ਜੇਲਾਂ ਕੱਟਣ ਵਾਲੇ ਸੰਘਰਸ਼ੀ ਯੋਧਿਆਂ ਨੂੰ ਸਨਮਾਨਤ ਕਰਨ ਦੇ ਨਾਲ-ਨਾਲ ਹਰ ਤਰਾਂ ਦੀਆਂ ਸਹੂਲਤਾਂ ਵੀ ਦਿਤੀਆਂ ਜਾਣਗੀਆਂ, ਪਰ ਸਥਾਨਕ ਫੇਰੂਮਾਨ ਚੌਕ 'ਚ ਸਥਿਤ ਜਥੇਦਾਰ ਚਾਨਣ ਸਿੰਘ (96) ਦੇ ਅੰਤਮ ਸਸਕਾਰ ਮੌਕੇ ਕੋਈ ਵੀ ਟਕਸਾਲੀ ਅਕਾਲੀ ਜਾਂ ਸਥਾਨਕ ਅਕਾਲੀ ਆਗੂ ਵੇਖਣ ਲਈ ਨਹੀਂ ਮਿਲਿਆ।
ਜਥੇ. ਚਾਨਣ ਸਿੰਘ ਨੇ ਮਾਸਟਰ ਤਾਰਾ ਸਿੰਘ ਤੇ ਪਰਕਾਸ਼ ਸਿੰਘ ਬਾਦਲ ਨਾਲ ਜੇਲਾਂ ਕੱਟੀਆਂ। ਪੰਜਾਬੀ ਸੂਬੇ ਦੇ ਮੋਰਚੇ ਮੌਕੇ ਜੇਲ ਕੱਟਣ ਦੇ ਨਾਲ-ਨਾਲ ਅਪਣਾ ਨਾਂ ਸੰਘਰਸ਼ੀ ਯੋਧੇ ਵਜੋਂ ਦਰਜ ਕਰਾਇਆ। ਉਨ੍ਹਾਂ ਦੇ ਪੁੱਤਰਾਂ ਨਰਿੰਦਰ ਸਿੰਘ ਕੁੱਕੂ ਅਤੇ ਮਾ. ਰਵਿੰਦਰ ਸਿੰਘ ਨੇ ਦਸਿਆ ਕਿ ਤਤਕਾਲੀਨ ਬਾਦਲ ਸਰਕਾਰ ਵਲੋਂ ਜਥੇ. ਚਾਨਣ ਸਿੰਘ ਨੂੰ ਸਨਮਾਨਤ ਵੀ ਕੀਤਾ ਗਿਆ, ਪਰ ਕਿਸੇ ਤਰਾਂ ਦੀ ਸਹੂਲਤ ਦੇਣ ਦੀ ਜ਼ਰੂਰਤ ਨਾ ਸਮਝੀ ਗਈ। ਇਸ ਮੌਕੇ ਪਰਵਾਰਕ ਮੈਂਬਰਾਂ, ਰਿਸ਼ਤੇਦਾਰਾਂ ਤੋਂ ਇਲਾਵਾ ਭਾਰੀ ਗਿਣਤੀ 'ਚ ਧਾਰਮਕ ਸ਼ਖ਼ਸੀਅਤਾਂ ਵੀ ਹਾਜ਼ਰ ਸਨ।
