ਟਰੱਕ ਡਰਾਈਵਰ ਹਰਜਿੰਦਰ ਸਿੰਘ ਨੇ ਫਲੋਰਿਡਾ ਟਰਨਪਾਈਕ ਉਤੇ ਯੂ-ਟਰਨ ਲੈ ਰਿਹਾ ਸੀ, ਜਿਸ ਕਾਰਨ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਸੀ
Hate against Sikh truck drivers grows in America after Florida accident: ਫ਼ਲੋਰੀਡਾ ’ਚ ਪਿਛਲੇ ਮਹੀਨੇ ਇਕ ਸਿੱਖ ਟਰੱਕ ਡਰਾਈਵਰ ਦੀ ਕਥਿਤ ਗ਼ਲਤੀ ਕਾਰਨ ਵਾਪਰੇ ਭਿਆਨਕ ਸੜਕੀ ਹਾਦਸੇ ਮਗਰੋਂ ਪ੍ਰਵਾਸ ਨੂੰ ਲੈ ਕੇ ਅਮਰੀਕਾ ਵਿਚ ਕੌਮੀ ਪੱਧਰ ਉਤੇ ਤਿੱਖੀ ਬਹਿਸ ਹੋ ਰਹੀ ਹੈ ਜਿਸ ਕਾਰਨ ਸਿੱਖਾਂ ਵਿਰੁਧ ਨਫ਼ਰਤੀ ਬਿਆਨਬਾਜ਼ੀ ’ਚ ਵਾਧਾ ਹੋ ਰਿਹਾ ਹੈ। ਅਜਿਹਾ ਕੈਲੀਫੋਰਨੀਆ ਦੇ ਸਿੱਖ ਟਰੱਕਿੰਗ ਭਾਈਚਾਰੇ ਦੇ ਮੈਂਬਰਾਂ ਦਾ ਕਹਿਣਾ ਹੈ। ਜ਼ਿਕਰਯੋਗ ਹੈ ਕਿ 12 ਅਗੱਸਤ ਨੂੰ ਭਾਰਤੀ ਮੂਲ ਦੇ ਟਰੱਕ ਡਰਾਈਵਰ ਹਰਜਿੰਦਰ ਸਿੰਘ ਨੇ ਫਲੋਰਿਡਾ ਟਰਨਪਾਈਕ ਉਤੇ ਯੂ-ਟਰਨ ਲੈ ਰਿਹਾ ਸੀ, ਜਿਸ ਕਾਰਨ ਉਸ ਦੇ ਟਰੱਕ ਵਿਚ ਵੱਜਣ ਮਗਰੋਂ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਸੀ।
ਇਸ ਹਾਦਸੇ ਅਤੇ ਇਸ ਤੋਂ ਬਾਅਦ ਹੋਈ ਜਾਂਚ ਤੋਂ ਬਾਅਦ ਫਲੋਰਿਡਾ ਦੇ ਰਿਪਬਲਿਕਨ ਗਵਰਨਰ ਰੌਨ ਡੀਸੈਂਟਿਸ ਅਤੇ ਕੈਲੀਫੋਰਨੀਆ ਦੇ ਡੈਮੋਕ੍ਰੇਟਿਕ ਗਵਰਨਰ ਗੈਵਿਨ ਨਿਊਸਮ ਵਿਚਾਲੇ ਬਹਿਸ ਸ਼ੁਰੂ ਹੋ ਗਈ। ਇਸ ਨਾਲ ਹੀ ਸਿੱਖਾਂ ਨੂੰ ਆਨਲਾਈਨ ਬਦਨਾਮੀ ਦੀ ਵੀ ਸ਼ੁਰੂਆਤ ਹੋ ਗਈ। ਕੈਲੀਫੋਰਨੀਆ ਦੇ ਰਿਵਰਸਾਈਡ ਦੇ ਟਰੱਕ ਡਰਾਈਵਰ ਪ੍ਰਭ ਸਿੰਘ ਨੇ ਕਿਹਾ, ‘‘ਆਨਲਾਈਨ ਬਹੁਤ ਸਾਰੀਆਂ ਨਕਾਰਾਤਮਕ ਟਿਪਣੀਆਂ ਕੀਤੀਆਂ ਜਾ ਰਹੀਆਂ ਹਨ।’’ 8 ਸਾਲ ਦੀ ਉਮਰ ’ਚ ਭਾਰਤ ਤੋਂ ਆਏ ਅਮਰੀਕੀ ਨਾਗਰਿਕ ਪ੍ਰਭ ਸਿੰਘ ਨੇ ਕਿਹਾ ਕਿ ਲੋਕ ਕਹਿ ਰਹੇ ਹਨ ਕਿ ਸੜਕਾਂ ਤੋਂ ‘ਪੱਗਾਂ ਬੰਨ੍ਹਣ ਵਾਲਿਆਂ ਨੂੰ ਹਟਾਓ’ ਅਤੇ ‘ਪ੍ਰਵਾਸੀਆਂ ਨੂੰ ਸੜਕਾਂ ਤੋਂ ਹਟਾ ਕੇ ਸਾਡੀਆਂ ਸੜਕਾਂ ਨੂੰ ਸੁਰੱਖਿਅਤ ਬਣਾਓ।’
ਉਨ੍ਹਾਂ ਕਿਹਾ, ‘‘ਇਹ ਸੱਭ ਕੁੱਝ ਜੱਜ ਵਲੋਂ ਸਜ਼ਾ ਸੁਣਾਏ ਜਾਣ ਤੋਂ ਪਹਿਲਾਂ ਹੁੰਦਾ ਹੈ। ਇਹ ਇਕ ਡਰਾਈਵਰ ਦੀ ਗਲਤੀ ਸੀ, ਪੂਰੇ ਭਾਈਚਾਰੇ ਦੀ ਨਹੀਂ।’’ ਅਮਰੀਕਾ ਵਿਚ ਸਿੱਖਾਂ ਦੀ ਆਬਾਦੀ 7,50,000 ਤਕ ਹੈ, ਜਿਸ ਵਿਚ ਸੱਭ ਤੋਂ ਵੱਧ ਕੈਲੀਫੋਰਨੀਆ ਵਿਚ ਹੈ। ਬਹੁਤ ਸਾਰੇ ਟਰੱਕਿੰਗ ਉਦਯੋਗ ਅਤੇ ਸਬੰਧਤ ਕਾਰੋਬਾਰਾਂ ਵਿਚ ਕੰਮ ਕਰਦੇ ਹਨ, ਜਿਸ ਵਿਚ ਪ੍ਰਮੁੱਖ ਰੂਟਾਂ ਦੇ ਨਾਲ ਰੈਸਟੋਰੈਂਟ ਅਤੇ ਟਰੱਕਿੰਗ ਸਕੂਲ ਸ਼ਾਮਲ ਹਨ। ਕੈਲੀਫੋਰਨੀਆ ਦੇ ਫੋਂਟਾਨਾ ਵਿਚ ਇਕ ਅੰਤਰਰਾਜੀ ਮਾਲ ਵਾਹਕ ਜਹਾਜ਼ ਦੇ ਮਾਲਕ ਸੁਖਪ੍ਰੀਤ ਵੜੈਚ ਨੇ ਕਿਹਾ, ‘‘ਮੈਂ ਬਹੁਤ ਸਾਰੇ ਟਰੱਕ ਡਰਾਈਵਰਾਂ ਨਾਲ ਗੱਲ ਕਰ ਰਿਹਾ ਹਾਂ ਅਤੇ ਉਹ ਕਹਿ ਰਹੇ ਹਨ ਕਿ ਲੋਕ ਹੁਣ ਸਾਨੂੰ ਵੱਖਰੇ ਨਜ਼ਰੀਏ ਨਾਲ ਵੇਖਦੇ ਹਨ।’’ ਤਿੰਨ ਬੱਚਿਆਂ ਦਾ ਪਿਤਾ ਅਤੇ ਅਪਣੇ ਪਰਵਾਰ ਦਾ ਕਮਾਉਣ ਵਾਲਾ, ਉਹ ਇਸ ਗੱਲੋਂ ਚਿੰਤਤ ਹੈ ਕਿ ਉਸ ਨੂੰ ਗਲਤ ਤਰੀਕੇ ਨਾਲ ਨਿਸ਼ਾਨਾ ਬਣਾਇਆ ਜਾਵੇਗਾ।
ਹੋਰ ਸਿੱਖਾਂ ਵਾਂਗ ਉਨ੍ਹਾਂ ਨੇ ਵੀ ਫਲੋਰੀਡਾ ਹਾਦਸੇ ਉਤੇ ਦੁੱਖ ਜ਼ਾਹਰ ਕਰਦਿਆਂ ਇਸ ਨੂੰ ਦੁਖਾਂਤ ਦਸਿਆ। ਪਰ ਉਹ ਉਮੀਦ ਕਰਦਾ ਹੈ ਕਿ ਡਰਾਈਵਰ ਨੂੰ ਨਿਰਪੱਖ ਸੁਣਵਾਈ ਮਿਲੇਗੀ ਅਤੇ ਉਹ ਚਾਹੁੰਦਾ ਹੈ ਕਿ ਲੋਕ ਸਮਝਣ ਕਿ ਇਹ ਇਕ ਵੱਖਰਾ ਹਾਦਸਾ ਹੈ। ਵੜੈਚ ਨੇ ਕਿਹਾ, ‘‘ਮੈਂ 2019 ਤੋਂ ਗੱਡੀ ਚਲਾ ਰਿਹਾ ਹਾਂ। ਮੈਨੂੰ ਇਕ ਵੀ ਟਿਕਟ ਨਹੀਂ ਮਿਲੀ ਹੈ।’’ ਨਾਰਥ ਅਮਰੀਕਨ ਪੰਜਾਬੀ ਟਰੱਕਰਜ਼ ਐਸੋਸੀਏਸ਼ਨ ਦਾ ਅਨੁਮਾਨ ਹੈ ਕਿ ਵੈਸਟ ਕੋਸਟ ਉਤੇ ਟਰੱਕ ਚਲਾਉਣ ਵਾਲੇ ਟਰੱਕਾਂ ’ਚ ਸਿੱਖ ਮੁਲਾਜ਼ਮਾਂ ਦੀ ਹਿੱਸੇਦਾਰੀ ਲਗਭਗ 40 ਫੀ ਸਦੀ ਅਤੇ ਦੇਸ਼ ਭਰ ’ਚ ਲਗਭਗ 20 ਫੀ ਸਦੀ ਹੈ।
ਸੀ.ਈ.ਓ. ਰਮਨ ਢਿੱਲੋਂ ਨੇ ਕਿਹਾ ਕਿ ਕੋਈ ਅਧਿਕਾਰਤ ਅੰਕੜੇ ਮੌਜੂਦ ਨਹੀਂ ਹਨ, ਪਰ ਵਕਾਲਤ ਸਮੂਹਾਂ ਦਾ ਅਨੁਮਾਨ ਹੈ ਕਿ ਅਮਰੀਕਾ ਵਿਚ ਲਗਭਗ 1,50,000 ਸਿੱਖ ਟਰੱਕ ਡਰਾਈਵਰ ਕੰਮ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਮਹਾਂਮਾਰੀ ਤੋਂ ਬਾਅਦ ਡਰਾਈਵਰਾਂ ਦੀ ਉੱਚ ਮੰਗ ਨੂੰ ਵੇਖਦੇ ਹੋਏ ਇਹ ਗਿਣਤੀ 2,50,000 ਤਕ ਹੋ ਸਕਦੀ ਹੈ। ਇਸ ਹਾਦਸੇ ਤੋਂ ਬਾਅਦ ਐਸੋਸੀਏਸ਼ਨ ਨੂੰ ਸਿੱਖ ਡਰਾਈਵਰਾਂ ਨੂੰ ਪਰੇਸ਼ਾਨ ਕੀਤੇ ਜਾਣ ਦੀਆਂ ਕਈ ਰੀਪੋਰਟਾਂ ਮਿਲੀਆਂ ਹਨ। ਢਿੱਲੋਂ ਨੇ ਕਿਹਾ ਕਿ ਇਕ ਘਟਨਾ ਵਿਚ ਇਕ ਸਿੱਖ ਵਿਅਕਤੀ ਨੂੰ ਓਕਲਾਹੋਮਾ ਟਰੱਕ ਸਟਾਪ ਤੋਂ ਬਾਹਰ ਕੱਢ ਦਿਤਾ ਗਿਆ ਜਦੋਂ ਉਸ ਨੇ ਨਹਾਉਣ ਦੀ ਕੋਸ਼ਿਸ਼ ਕੀਤੀ। ਸਿੱਖ ਟਰੱਕਿੰਗ ਇੰਡਸਟਰੀ ਦੇ ਹੋਰ ਲੋਕ ਇਮੀਗ੍ਰੇਸ਼ਨ ਨੂੰ ਲੈ ਕੇ ਦੇਸ਼ ਦੀ ਤਿੱਖੀ ਲੜਾਈ ਵਿਚ ਬਲੀ ਦਾ ਬੱਕਰਾ ਬਣਨ ਬਾਰੇ ਚਿੰਤਤ ਹਨ। ਕੈਲੀਫੋਰਨੀਆ ਦੇ ਸਟਾਕਟਨ ਵਿਚ ਗਿਲਸਨ ਟਰੱਕਿੰਗ ਦੇ ਸੀ.ਈ.ਓ. ਹਰਸਿਮਰਨ ਸਿੰਘ ਨੇ ਕਿਹਾ, ‘‘ਇਹ ਇਕ ਦੁਖਾਂਤ ਹੈ। ਇਹ ਇਕ ਹਾਦਸਾ ਸੀ ਅਤੇ ਹਰ ਪੰਜਾਬੀ, ਹਰ ਸਿੱਖ, ਪੀੜਤ ਪਰਵਾਰ ਲਈ ਮਹਿਸੂਸ ਕਰਦਾ ਹੈ।
ਪਰ ਜਿਸ ਤਰੀਕੇ ਨਾਲ ਇਸ ਕੇਸ ਨਾਲ ਨਜਿੱਠਿਆ ਗਿਆ ਹੈ... ਮੇਰੇ ਭਾਈਚਾਰੇ ਦੇ ਬਹੁਤ ਸਾਰੇ ਲੋਕ ਇਸ ਦੇਸ਼ ਵਿਚ ਅਪਣੇ ਭਵਿੱਖ ਨੂੰ ਲੈ ਕੇ ਡਰਦੇ ਹਨ। ਉਨ੍ਹਾਂ ਕਿਹਾ ਕਿ ਹਾਦਸੇ ਤੋਂ ਬਾਅਦ ਉਸ ਦੇ ਪੰਜ ਸਿੱਖ ਡਰਾਈਵਰਾਂ ਨੇ ਇਹ ਕਹਿੰਦੇ ਹੋਏ ਅਸਤੀਫਾ ਦੇ ਦਿਤਾ ਕਿ ਉਹ ਹੁਣ ਸੁਰੱਖਿਅਤ ਮਹਿਸੂਸ ਨਹੀਂ ਕਰਦੇ। ਸਮਰਥਨ ਦੇ ਸੰਕੇਤ ਵਜੋਂ, ਯੂਨਾਈਟਿਡ ਸਿੱਖਸ ਐਡਵੋਕੇਸੀ ਗਰੁੱਪ ਨੇ ਹਾਲ ਹੀ ਵਿਚ ਫਲੋਰਿਡਾ ਜੇਲ ਦੇ ਬਾਹਰ ਇਕ ਇਕੱਠ ਕੀਤਾ। ਉਨ੍ਹਾਂ ਨੇ ਹਾਦਸੇ ਦੇ ਪੀੜਤਾਂ ਲਈ ਅਰਦਾਸ ਕੀਤੀ ਅਤੇ ਅੰਤਿਮ ਸੰਸਕਾਰ ਦੇ ਪ੍ਰਬੰਧਾਂ ਦਾ ਖਰਚਾ ਪਰਵਾਰਾਂ ਦੀ ਮਦਦ ਕਰਨ ਦੀ ਪੇਸ਼ਕਸ਼ ਕੀਤੀ, ਜਦਕਿ ਉਨ੍ਹਾਂ ਨੇ ਸਿੱਖ ਵਿਰੋਧੀ ਭੇਦਭਾਵ ਦੀ ਨਿੰਦਾ ਕੀਤੀ।
ਸਮੂਹ ਦੇ ਕੌਮਾਂਤਰੀ ਮਾਨਵਤਾਵਾਦੀ ਸਹਾਇਤਾ ਨਿਰਦੇਸ਼ਕ ਗੁਰਵਿੰਦਰ ਸਿੰਘ ਨੇ ਕਿਹਾ, ‘‘ਬਹੁਤ ਸਾਰੇ ਪ੍ਰਵਾਸੀ ਧਾਰਮਕ ਅਤੇ ਹੋਰ ਤਸ਼ੱਦਦ ਤੋਂ ਭੱਜ ਕੇ ਇੱਥੇ ਵੱਸ ਗਏ ਹਨ ਅਤੇ ਅਸੀਂ ਅਪਣੀ ਕਾਨੂੰਨੀ ਪ੍ਰਣਾਲੀ ਵਲੋਂ ਉਨ੍ਹਾਂ ਨੂੰ ਦਿਤੇ ਗਏ ਬਰਾਬਰ ਦੇ ਮੌਕਿਆਂ ਦੀ ਕਦਰ ਕਰਦੇ ਹਾਂ।’’ 11 ਸਤੰਬਰ, 2001 ਦੇ ਹਮਲਿਆਂ ਤੋਂ ਬਾਅਦ ਵੀ ਅਮਰੀਕਾ ਵਿਚ ਨੌਜੁਆਨ ਸਿੱਖਾਂ ਨੂੰ ਸਕੂਲ ਵਿਚ ਧੱਕੇਸ਼ਾਹੀ ਤੋਂ ਲੈ ਕੇ ਨਸਲੀ ਪ੍ਰੋਫਾਈਲਿੰਗ ਅਤੇ ਨਫ਼ਰਤੀ ਅਪਰਾਧਾਂ ਤਕ ਵਿਤਕਰੇ ਦਾ ਸਾਹਮਣਾ ਕਰਨਾ ਪਿਆ ਹੈ। ਕੈਲੀਫੋਰਨੀਆ ਦੇ ਫਰੀਮੌਂਟ ’ਚ ਅਪਣੇ ਗੁਰਦੁਆਰੇ ’ਚ ਜਸਦੀਪ ਸਿੰਘ ਨੇ ਹਾਦਸੇ ਤੋਂ ਬਾਅਦ ਸਕੂਲ ’ਚ ਬੱਚਿਆਂ ਨਾਲ ਧੱਕੇਸ਼ਾਹੀ ਦੀਆਂ ਖਬਰਾਂ ਸੁਣੀਆਂ। ਉਨ੍ਹਾਂ ਕਿਹਾ, ‘‘ਪੂਰੇ ਭਾਈਚਾਰੇ ਉਤੇ ਮੁਕੱਦਮਾ ਚਲਾਇਆ ਗਿਆ ਹੈ ਕਿਉਂਕਿ ਸਾਨੂੰ ਵੱਖ ਹੀ ਪਛਾਣਿਆ ਜਾਂਦਾ ਹੈ। ਇਹ ਹਮੇਸ਼ਾ ਸੀ ਪਰ ਹੁਣ ਇਹ ਇਕ ਹੋਰ ਪੱਧਰ ਉਤੇ ਹੈ। 9/11 ’ਚ ਉਨ੍ਹਾਂ ਨੇ ਸੋਚਿਆ ਸੀ ਕਿ ਅਸੀਂ ਮੁਸਲਮਾਨ ਹਾਂ। ਪਰ ਇਸ ਵਾਰ, ਕੋਈ ਉਲਝਣ ਨਹੀਂ ਹੈ। ਇਹ ਤਾਂ ਹੋਰ ਵੀ ਬਦਤਰ ਹੈ।’’
(For more news apart from “Hate against Sikh truck drivers grows in America after Florida accident,” stay tuned to Rozana Spokesman.)
