ਬਟਾਲਾ : ਗੈਂਗਸਟਰ ਰਾਣਾ ਕੰਧੋਵਾਲੀਆ ਦੇ ਕਤਲ ਮਾਮਲੇ ਵਿਚ ਹੁਣ NIA ਨੇ ਬਟਾਲਾ ਦੇ ਇੱਕ ਨਾਮੀ ਹਸਪਤਾਲ ਵਿਚ ਛਾਪੇਮਾਰੀ ਕੀਤੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਤਲਾਸ਼ੀ ਮੁਹਿੰਮ ਕਰੀਬ ਇੱਕ ਘੰਟਾ ਚੱਲੀ। ਜਾਣਕਾਰੀ ਮੁਤਾਬਕ ਗੈਂਗਸਟਰ ਰਾਣਾ ਕੰਧੋਵਾਲੀਆ ਦੇ ਕਤਲ ਦਾ ਸਬੰਧ ਇਸ ਹਸਪਤਾਲ ਨਾਲ ਹੈ। ਇਸ ਹਸਪਤਾਲ 'ਚ ਰਾਣਾ ਕੰਧੋਵਾਲੀਆ ਦੇ ਕਾਤਲਾਂ ਦਾ ਇਲਾਜ ਹੋਇਆ ਸੀ।
ਇਹ ਵੀ ਦੱਸਿਆ ਜਾ ਰਿਹਾ ਹੈ ਕਿ ਇਸ ਨਾਮੀ ਹਸਪਤਾਲ ਨੇ ਨਾ ਸਿਰਫ ਉਕਤ ਦੋਸ਼ੀਆਂ ਦਾ ਇਲਾਜ ਕੀਤਾ ਸਗੋਂ ਕਾਨੂੰਨ ਦੇ ਵਿਰੁੱਧ ਜਾ ਕੇ ਉਨ੍ਹਾਂ ਨੂੰ ਲੰਬੇ ਸਮੇਂ ਤਕ ਸੁਰੱਖਿਆ ਵੀ ਦਿੱਤੀ। ਦੱਸ ਦੇਈਏ ਕਿ ਦਿੱਲੀ ਤੋਂ ਐਨਆਈਏ ਦੀ ਟੀਮ ਦੇਰ ਰਾਤ ਕਰੀਬ 10 ਵਜੇ ਬਟਾਲਾ ਪੁੱਜੀ ਤੇ ਟੀਮ ਨੇ ਇੱਸ ਨਾਮੀ ਪ੍ਰਾਈਵੇਟ ਹਸਪਤਾਲ 'ਚ ਛਾਪਾ ਮਾਰਿਆ।
Rana Kandhowalia case: NIA raids hospital
ਇਸ ਤੋਂ ਪਹਿਲਾਂ ਵੀ ਇਹ ਹਸਪਤਾਲ ਕਈ ਵਾਰ ਪੁਲਿਸ ਦੀ ਰਡਾਰ 'ਤੇ ਆ ਚੁੱਕਾ ਹੈ ਅਤੇ ਉਕਤ ਹਸਪਤਾਲ ਦੇ ਵਿਦੇਸ਼ੀ ਗੈਂਗਸਟਰਾਂ ਨਾਲ ਨਜ਼ਦੀਕੀ ਸਬੰਧ ਦੱਸੇ ਜਾਂਦੇ ਹਨ ਅਤੇ ਕਈ ਵਾਰ ਪੁਲਿਸ ਇਸ ਮਾਮਲੇ ਦੀ ਜਾਂਚ ਕਰ ਚੁੱਕੀ ਹੈ, ਜਦਕਿ ਇਸ ਵਾਰ ਮਾਮਲਾ ਰਾਸ਼ਟਰੀ ਏਜੰਸੀ ਐਨਆਈਏ ਦੇ ਕੋਲ ਆਇਆ ਹੈ। ਹਸਪਤਾਲ ਨੇ ਮੁਲਜ਼ਮਾਂ ਬਾਰੇ ਪੁਲਿਸ ਪ੍ਰਸ਼ਾਸਨ ਨੂੰ ਸੂਚਿਤ ਕਰਨਾ ਸੀ ਪਰ ਇਸ ਨਾਮੀ ਹਸਪਤਾਲ ਨੇ ਪੁਲਿਸ ਪ੍ਰਸ਼ਾਸਨ ਨੂੰ ਕੁਝ ਵੀ ਨਹੀਂ ਦੱਸਿਆ ਸੀ। ਹਾਲਾਂਕਿ ਉਸ ਵੇਲੇ ਹਸਪਤਾਲ ਦੇ ਪ੍ਰਬੰਧਕਾਂ ਨੇ ਇਸ ਤੋਂ ਇਨਕਾਰ ਕੀਤਾ ਸੀ।
Rana Kandhowalia case: NIA raids hospital
ਇਸ ਦੇ ਲਈ NIA ਨੇ ਇਸ ਮਾਮਲੇ ਨਾਲ ਸਬੰਧਤ ਦਸਤਾਵੇਜ਼ਾਂ ਨੂੰ ਖੋਲ੍ਹਣਾ ਸ਼ੁਰੂ ਕਰ ਦਿੱਤਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਹਸਪਤਾਲ 'ਚ ਛਾਪੇਮਾਰੀ ਦੌਰਾਨ ਉਕਤ ਇਲਾਕੇ ਨੂੰ ਸੀਲ ਕਰ ਦਿੱਤਾ ਗਿਆ ਸੀ ਤੇ ਸਥਾਨਕ ਪੁਲਿਸ ਨੂੰ ਇਸ ਬਾਰੇ ਪਤਾ ਵੀ ਨਹੀਂ ਲੱਗਣ ਦਿੱਤਾ ਗਿਆ। ਟੀਮ ਦੇ ਨਾਲ ਸੀਆਰਪੀਐਫ ਦੀ ਟੀਮ ਵੀ ਦੱਸੀ ਜਾਂਦੀ ਹੈ।
NIA
ਟੀਮ ਨੇ ਹਸਪਤਾਲ ਵਿੱਚ ਰਿਕਾਰਡ ਵੀ ਚੈੱਕ ਕੀਤਾ ਅਤੇ ਹਸਪਤਾਲ ਦੇ ਮੈਨੇਜਰ ਤੋਂ ਇੱਕ ਘੰਟੇ ਤਕ ਪੁੱਛਗਿੱਛ ਕੀਤੀ ਗਈ। ਇਹ ਜਾਣਕਾਰੀ ਵੀ ਸਾਹਮਣੇ ਆ ਰਹੀ ਹੈ ਕਿ ਟੀਮ ਨੂੰ ਕੁਝ ਅਹਿਮ ਸੁਰਾਗ ਮਿਲੇ ਹਨ ਜਿਸ ਨੂੰ ਟੀਮ ਆਪਣੇ ਨਾਲ ਲੈ ਗਈ ਹੈ। ਆਉਣ ਵਾਲੇ ਸਮੇਂ ਵਿੱਚ ਇਸ ਸਬੰਧੀ ਕੋਈ ਵੱਡਾ ਖੁਲਾਸਾ ਹੋ ਸਕਦਾ ਹੈ।
